تۇرىك كينەماتوگرافيستەرى الماتىدا جەلتوقساننىڭ 23-27 ارالىعىندا ءوتىپ جاتقان «تۇرىك فيلمدەرىنىڭ اپتالىعى» اياسىندا ش.ايمانوۆ اتىنداعى «قازاقفيلم» كينوستۋدياسىنا كەلدى. كەزدەسۋ بارىسىندا ەكى ەلدىڭ كينو ماماندارى بىرلەسكەن جوبالاردى ءتۇسىرۋ مۇمكىندىگىن تالقىلادى دەپ حابارلايدى Qamshy.kz اقپارات اگەنتتىگى .
— مەن سىزدەرمەن تانىسىپ، كينوستۋديانى كورگەنىمە قۋانىشتىمىن. ءبىزدىڭ ورتاق مادەنيەتىمىز، تاريحىمىز، ورتاق سەنىمىمىز، ماقساتتارىمىز بار. قوجا احمەت ياساۋي، كوروعلى، قورقىت اتا سەكىلدى ورتاق تۇلعالارىمىز بار. ول قازاقتىڭ نە تۇرىكتىڭ عانا ەمەس، بۇكىل تۇركى الەمىنىڭ تۇلعاسى. ولار ومىرلەرىن جاسامپازدىقپەن وتكىزىپ، ەلدى بەيبىتشىلىككە، ىنتىماققا شاقىرعان. سونداي كەيىپكەرلەرىمىز باردا، تاريحىمىز باردا، بىزگە كوپ كينولار ءتۇسىرۋ كەرەك. ءبىر جەرگە جينالىپ تۋىندىلار شىعارساق، ءار مەملەكەت تولەيتىن قارجىسىن ورتاعا شىعارسا دەگەن وي. ورتاق فيلمدەر ءتۇسىرىپ، بۇكىل الەمگە تۇركى الەمىنىڭ بەيبىت حالىق ەكەنىن پاش ەتسەك، - دەدى تانىمال تۇرىك رەجيسسەرى ونەر كىلىچ.
«ءقازاقفيلمنىڭ» قىزمەتكەرلەرى تۇركيالىق قوناقتار – رەجيسسەر ونەر كىلىچقا، پروديۋسەر احمەت ەدەبالىعا، رەجيسسەر مۇستافا ۋگۋر ياعدجىوعلۋعا جانە جۋرناليست بەدىر اچارعا تەرريتوريا بويىنشا ەكسكۋرسيا جاساپ، وندىرىستىك مۇمكىندىكتەرىمەن تانىستىردى. كەزدەسۋ سوڭىندا ەكى تاراپ بولاشاقتا بىرلەسىپ تۇسىرەتىن جوبالاردىڭ سەنارييلەرىمەن الماستى.
سوڭعى جىلدارى «قازاقفيلم» بيۋدجەت قارجىسىن ۇنەمدەۋ جانە حالىقارالىق پروكاتقا شىعۋ ماقساتىندا شەتەلدىك پارتنەرلەرمەن كينووندىرىستى قارقىندى تۇردە دامىتۋدا(بارلىق بىرلەسكەن جوبالار ورتاق قارجىلاندىرۋ شارتى بويىنشا جۇزەگە اسادى). وسى ورايدا، پروكاتى ۇلكەن تابىسپەن وتكەن رەسەيمەن بىرلەسىپ تۇسىرگەن «28 پانفيلوۆشى» ءفيلمىن، پروكاتقا ەندى عانا شىققان ۇندىستانمەن بىرلەسكەن «تۋعان ءۇيىم - تىرەگىم» («Love you family») ءفيلمىن جانە اياقتالۋعا جاقىن قالعان «امىرە» (امىرە قاشاۋبايەۆ تۋرالى) اتتى قازاق-امەريكان ءفيلمىن، ءتۇسىرىلىم كەزەڭىندە تۇرعان قازاق-قىتاي جوباسى «كومپوزيتور» (سي سينحاي مەن باقىتجان بايقاداموۆتىڭ دوستىعى تۋرالى) ءفيلمىن اتاۋعا بولادى.
سونداي-اق، جۋىردا عانا مادەنيەت جانە سپورت ءمينيسترى ارىستانبەك مۇحامەدي ۇلى رەسەيلىك «پەرۆىي كانال» ارناسىنىڭ باس ديرەكتورى كونستانتين ەرنستپەن كەزدەسىپ، ەكى بىردەي جوبانى ورتاقتاسىپ جۇزەگە اسىراتىنى تۋرالى كەلىسىمگە قەلدى. اتالمىش جوبالاردىڭ ءبىرى 1941-1945 جىلدارى الماتىدا جۇمىس ىستەگەن بىرلەسكەن ورتالىق كينوستۋديا تاريحىن ارقاۋ ەتسە، ەكىنشىسى قازاقستاننىڭ جاڭا استاناسى – استانانىڭ قۇرىلۋى جايىندا بولماق.
پىكىر قالدىرۋ