قازاق اۋەلدەن-اق جەتىمىن جىلاتپاعان ەل. بۇل ءسوزدى قوشقارباي اۋىلىنىڭ (اقمولا وبلىس) تۇرعىندارى دالەلدەدى. TengriMIX پورتالى سول اۋىلدىڭ مەيىرىمدى تۇرعىندارى جايىندا وقيعامەن ءبولىستى، دەپ جازادى Qamshy.kz اقپارات اگەنتتىگى.

90 جىلداردىڭ سوڭىندا جەرگىلىكتى كاسىپكەر «شوققاراعاي» شارۋا قوجالىعىنىڭ باسشىسى قايىركەن حاسەنوۆتىڭ باستاماسىمەن قوشقاربايدا مەكتەپكە ارنالعان جاڭا عيمارات سالىندى. بۇل وقۋ عيماراتى اۋىل ءومىرىنىڭ قوعامدىق جانە مادەني ورتالىعىنا اينالدى.

الايدا بىرنەشە جىل بۇرىن وقۋشىلاردىڭ ازدىعىنىڭ كەسىرىنەن ورتالىقتىڭ جابىلىپ قالۋ ءقاۋپى ءورشىپ تۇردى. قوشقاربايدا تۋعان بالالار ەر جەتىپ، اۋىلدان كەتتى. 200 تۇرعىنى بار اۋىل ەسكىرە باستادى. مۇنى بايقاعان حاسەنوۆتىڭ ايەلى، وقۋ ورتالىعىن 20 جىل باسقارعان مۋسليما قاسىم قىزى جاعدايدى ءوز قولىنا الدى. اۋىلداستاردى شاقىرىپ، ۇجىمدى جيناپ بالالار ۇيىنە بارۋدى ۇسىندى، جەتىم بالالارمەن تانىسىپ، ۇيلەرىنە الىپ كەتۋدى ۇيعاردى.

«مەكتەپتى دە ساقتاپ قالامىز، ساۋاپتى ءىس جاسايمىز. جاقىندا زەينەتكەرلىككە شىعامىن، بالالاردى ءوسىرىپ، جىلۋلىعىم مەن مەيىرىمىمدى توگۋگە ۋاقىتىم دا جەتكىلىكتى بولادى. ارالارىڭىزدا دا اتا-انا قامقورلىعىنان ادا قالعان بالالارعا قامقور بولامىن دەگەندەر بار بولار؟! جاقسىلىق جاساۋ  - ءبارىمىزدىڭ قولىمىزدان كەلەدى»، - دەگەن ەدى مۋسليما اپاي سول ۋاقىتتا.

قوشقاربايلىقتار بۇل ويدى قۇپتاپ، اقكول بالالار ۇيىنە اتتانعان. تاربيەلەنۋشىلەرمەن تانىسىپ، سويلەسىپ، 11 بالانى اۋىلعا الىپ كەتەدى. ارينە، وزگە بالانى الىپ كەتىپ، مەيىرىمىڭدى توگۋ وڭاي ەمەس، تۇرعىندار قوبالجىدى، جۇرەكتەرىندە ۇرەي دە بولعان. ونىڭ ۇستىنە، تۋعان بالالارى بۇعان قالاي قارايتىنى تاعى بار. قازىرگى ۋاقىتتا اۋىل تۇرعىندارى ىستەگەن ىستەرىنە وكىنبەيدى.

«ءۇش بالامىز ءار ءتۇرلى قالادا جۇمىس جاسايدى، ءوز شاڭىراقتارىن قۇردى. ۇلكەن وتباسىعا ارنالىپ سالىنعان ۇيدە كۇيەۋىم ەكەۋمىز جالعىز قالدىق. ءۇش جىل بۇرىن تالعات پايدا بولعاندا ءومىرىمىز جاڭا ارناعا اۋىستى، تۇبەگەيلى وزگەردى. ول بىزگە ۇيرەنىسىپ، ءبىز وعان باۋىر باسىپ قالدىق. ەندى، مىنە، كەنجەمىز ۇيدە دە، باقشا دا ءبىزدىڭ كومەكشىمىزگە اينالدى. كۇيەۋىم كەي كەزدەرى ونى ورىسكە الىپ كەتىپ، تەحنيكا مەڭگەرۋدى ۇيرەتەدى. ءبىزدىڭ تۋعان ۇلدارىمىزبەن دە جاقسى ارالاسادى، بىرگە دەمالادى. اكەسى شاحمات ويناۋدى دا ۇيرەتتى، ەندى شاحمات ويناۋ تالعاتتىڭ سۇيىكتى ىسىنە اينالدى. ونىڭ ۇستىنە سپورتپەن شۇعىلدانعاندى دا جانى سۇيەدى»، - دەدى مۋسليما قاسىم قىزى.

تالعات ءوزىن اسىراپ العان اكەسىنە قاتتى ۇقسايدى ەكەن.

باعلان مەن گۇلنار بايماحانوۆتار دا ءبىر بالانى قامقورلىقتارىنا الماق بولادى. الايدا اعايىندى اندرەي مەن سەرگەي كەكيندەردى كورگەندە، «بۇلار – ءبىزدىڭ بالالارىمىز» دەپ ويلاعان. كەيىنىرەك ولاردىڭ تۋعان قارىنداسى گاليانى دا اسىراپ الدى. بالالار بىر-بىرىمەن تاتۋ تۇرادى، اناسىنا ءۇي شارۋاسىنا، اكەسىنە باقشادا كومەكتەسەدى. قازاق تىلىندە سويلەۋدى ۇيرەنىپ، جاڭا باۋىرلارىمەن دە تەز ءتىل تابىسىپ كەتتى.

ال نۇرعازيندەر وتباسى بىردەن 4 بالامەن تولىقتى. ولار ساشا، ماشا، كوليا چۋريكوۆ جانە ساشا سلوبودياندى ءوز قامقورلىقتارىنا الدى.

«بالا بولعان سوڭ شۋلايدى، ەركەلەيدى. ەڭ باستىسى بالالار ءۇشىن ءۇيىمىز جايلى. ءبىز سوعان قۋانامىز. ءارقايسىسى ءارتۇرلى بولعانىمەن، ولاردىڭ ەندىگى وتباسى ءبىر»، - دەدى ولاردىڭ اناسى كۇناراي نۇرعازينا.

ارداق-جاميبا جۇمابايەۆالار، ەركەش-بيبىگۇل توكەنوۆالار، بارحات-عاليا بايماحانوۆالار دا بالالار ۇيىنەن كەلگەن جەتىمدەردىڭ باسىنان سيپاپ، مەيىرىمدەرىن توگىپ كەلەدى.