بۇگىن «كسەلل» اق مەن «ۇلتتىق اۋدارما بيۋروسى» قوعامدىق قورىنىڭ (بۇرىعىن – WikiBilim) بىرلەسكەن «قازاقستاننىڭ اشىق ۋنيۆەرسيتەتى» جوباسى تانىستىرىلدى، دەپ حابارلايدى Qamshy.kz اقپارات اگەنتتىگى. جوبانىڭ ماقساتى – قازاقستاندا مەملەكەتتىك تىلدەگى اشىق ونلاين ءبىلىم بەرۋدى دامىتۋ.

وعان ق.ساتبايەۆ اتىنداعى قازۇتزۋ، قبتۋ، AlmaU، SDU، ماتەماتيكا جانە ماتەماتيكالىق مودەلدەۋ ينستيتۋتى سياقتى جەتەكشى جوعارعى وقۋ ورىندارى سەرىكتەس بولدى.

بۇگىندە «قازاقستاننىڭ اشىق ۋنيۆەرسيتەتى» - OpenU.kz ءبىلىم بەرۋ پلاتفورماسىنىڭ دارىستەرىن 1000-نان استام ادام تىڭداعان. جوبانى «ۇلتتىق اۋدارما بيۋروسى» قك مەن «كسەلل» اق بىلتىر قولعا العان ەدى. «قازاقستاننىڭ اشىق ۋنيۆەرسيتەتى» پورتالىندا جوو وقىتۋشىلارىنىڭ ونلاين-دارىستەرى كەز كەلگەن ادامعا قولجەتىمدى.

2018 جىلدىڭ 10 قاڭتارىندا ونلاين-پلاتفورماعا تىركەلگەن ادامداردىڭ سانى 1013-كە جەتكەن. «بۇل – وتە جاقسى كورسەتكىش»، - دەيدى «ۇلتتىق اۋدارما بيۋروسى» قك اتقارۋشى ديرەكتورى راۋان كەنجەحان ۇلى. ونىڭ ايتۋىنشا، جوبا قازاقستاندىقتاردىڭ عىلىمي-تەحنيكالىق سالالار مەن نارىققا قاجەت وزگە دە ماماندىقتار بويىنشا تەگىن ءبىلىم الۋىنا جاعداي جاسايدى.

«ءبىزدىڭ «كەز كەلگەن ادامعا اشىق ساپالى ءبىلىم» دەگەن ميسسيامىزدى OpenU ءدال ايقىنداپ بەردى. اشىق ۋنيۆەرسيتەت پلاتفورماسىن جاساۋ قارا باستىڭ قامى ەمەس، ول – ءبىلىم ساپاسى مەن قولجەتىمدىگىن قامتاماسىز ەتەتىن قۇرال، كۇن سايىن جاقسارا تۇسەتىن، اشىق بولا تۇسەتىن قۇرال»، - دەگەن راۋان كەنجەحان ۇلى جوبانى قولداعان «كسەلل» كومپانياسىنا العىسىن ءبىلدىردى.

جوبانىڭ باس سەرىكتەسى – «كسەلل» كومپانياسى. ق.ساتبايەۆ اتىنداعى قازۇتزۋ، قبتۋ، AlmaU، SDU، ماتەماتيكا جانە ماتەماتيكالىق مودەلدەۋ ينستيتۋتىندا قىزمەت ەتەتىن جەتەكشى ماماندار دارىستەرگە ارنالعان ماتەريالداردى دايىنداۋعا ۇلەس قوسقان. ولاردىڭ قاتارىندا اكادەميك اسقار جۇمادىلدايەۆ، ارمان سۇلەيمەنوۆ، اسەل ارىن، ارداق شالقارباي ۇلى، جاسداۋرەن دۇيسەبەكوۆ سىندى ماماندار دارىسكە قاتىسۋشىلار ءۇشىن ارنايى ماتەريالدار دايىندادى.

«كسەلل» اق كوممۋنيكاسيالار ءبولىمىنىڭ جەتەكشىسى ناتاليا ەسكوۆا قازاقستاندىقتاردىڭ اشىق digital-پلاتفورمالار ارقىلى ءبىلىم الۋعا دايىن ەكەنىن ايتىپ، «كسەلل» كومپانياسىنىڭ جوبانى ءالى دە قولداي بەرەتىنىن جەتكىزدى.

ءقازىر پورتالدان مىناداي كۋرستاردى تاڭداۋعا بولادى: «اقپاراتتى تاراتۋ جۇيەسى»، «بيزنەس-جوسپارلاۋ»، «Java تىلىندەگى كومپيۋتەر عىلىمدارىنا كىرىسپە»، «ماتريسالار مەن انىقتاۋىشتار»، «مەملەكەتتىك-جەكەشەلىك ارىپتەستىك»، «روبوتوتەحنيكا»، «فۋرە تالداۋى»، «Python تىلىندە باعدارلامالاۋ نەگىزدەرى»، «Scratch باعدارلامالاۋ تىلىمەن انيماسيا جانە ويىن قۇرۋ»، «Web-باعدارلامالاۋ نەگىزدەرى».

ونلاين-دارىستەر نەسىمەن ءتيىمدى؟

«ۇلتتىق اۋدارما بيۋروسى» قك اتقارۋشى ديرەكتورى راۋان كەنجەحان ۇلىنىڭ ايتۋىنشا، ستۋدەنتتەر ونلاين-دارىستەردى تەگىن ءارى ۇيىندە وتىرىپ-اق تىڭداي الادى. ياعني ۋنيۆەرسيتەتكە بارماي-اق، اۋديتورياداعى دارىستەرگە قاتىسپاي-اق ينتەرنەت ارقىلى ءبىلىم الۋعا مۇمكىندىك بار. سەمەستر اياقتالعانعا دەيىن ۋنيۆەرسيتەت قابىرعاسىندا بوي كورسەتپەي، ەمتيحاندى دا ونلاين رەجىمدە تاپسىرا الادى.

ال «ستۋدەنتتەرىم ءبىلىم السىن» دەپ كۇندە جۇمىسقا باراتىن مۇعالىمدەردىڭ كۇيى نە بولماق؟ كەز كەلگەن ستۋدەنت، ءتىپتى كەز كەلگەن ادام ءوزى ءۇشىن ءتيىمدى جولدى تاڭداۋعا ۇمتىلادى. ءتيىمدىسى – ارينە، ونلاين-دارىستەر ارقىلى ءبىلىم الۋ. ونداي جاعدايدا ءوز ءناپاقاسىن تاۋىپ وتىرعان مۇعالىمدەردىڭ قوعامداعى رولىنە نۇقسان كەلمەي مە دەگەن وي دا مازالاماي قويمايدى. بۇعان قاتىستى كەنجەحانوۆ بىلاي دەپ جاۋاپ بەردى:  

«بۇل جوبانى جاساۋعا قاتىسىپ جاتقان بارلىق وقۋ ورنى ءۇشىن وزەكتى ماسەلە. بۇگىندە ءبىلىم بەرۋ جۇيەسىندەگى ءمۇعالىمنىڭ ءرولى وزگەرىپ جاتىر. ءبىلىم بۇرىنعىداي ءمۇعالىمنىڭ توڭىرەگىندە جۇرمەيدى. بىزگە ۇناسىن، ۇناماسىن – جاعداي وزگەردى. سوندىقتان ۇستازدىق كاسىپتى تاڭداعان ادامنىڭ جاڭا زامانعا بەيىمدەلۋىنە تۋرا كەلەدى. ءبىراق ءمۇعالىمنىڭ كەرەگى جوق دەۋدەن اۋلاقپىز. ۇستاز – شاكىرتكە دۇرىس باعىت بەرۋشى. كەرىسىنشە، ماڭىزدىلىعى ارتا تۇسكەن سەكىلدى.

وقۋ ورىندارىندا كافەدرا قاشان دا كەرەك. ۋنيۆەرسيتەت اتىنان ءونلاين-دارىس الۋشى ستۋدەنتتىڭ جەتەكشىسى بولادى، ول ستۋدەنتكە تاپسىرمالار بەرەدى جانە ورىندالۋ بارىسىن ۇزدىكسىز قاداعالاپ وتىرادى. سول سەبەپتى مۇعالىمدەر مىندەتتى تۇردە قاجەت. مۇمكىن كافەدرا مۇعالىمدەرىنىڭ سانى ازايار. ول جاعىنا ءبىز جاۋاپ بەرە المايمىز، وعان وقۋ ورىندارى جاۋاپتى. الايدا ءبىز كەلىسكەن جوعارى وقۋ ورىندارى بۇل جوبانى قولداپ، قىزىعۋشىلىق تانىتىپ وتىر».

ايتا كەتەيىك، بۇل جوبا «رۋحاني جاڭعىرۋ» باعدارلاماسى اياسىندا قولعا الىندى.