ەلىمىزدە بيىلعى جىلدىڭ قاڭتار ايىنان باستاپ ەڭ تومەنگى جالاقى كولەمى 28 مىڭ 284 تەڭگەنى قۇراپتى. وسى ماردىمسىز جالاقىمەن كۇنەلتىپ وتىرعان جانۇيا كەلەسى ايلىققا دەيىن قالاي جەتەدى دەگەن ساۋالعا جۋرناليستىك اۋەستىكپەن جاۋاپ ىزدەپ، ەڭبەكاقىمدى قولعا العاننان كەيىن 28 مىڭ 284 تەڭگەنى بولەك الدىم دا ءبىر ايلىق كۇنكورىس جوسپارىن جاسادىم.
اۋىلدا انام مەن اكەمە ەركەلەپ وسكەن قازاقتىڭ قىزىمىن. جاسىراتىنى جوق نە ىشەم، نە جەيمىن دەگەن ۋايىم مەندە بولعان ەمەس. بۇگىندە اتا-انامنان جىراقتا جۇرسەم دە قارجى تاپشىلىعىن ءالى كۇنگە سەزىنگەن كەزىم جوق. سەمەيگە كەلگەلى وزگە دوستارىم سەكىلدى جالعا پاتەر ىزدەپ سابىلعان جوقپىن. ءالى كۇنگە اجەمنىڭ ۇيىندە اعا جەڭگەممەن بىرگە تۇراتىندىقتان پاتەر اقى مەن كوممۋنالدىق قىزمەتتەر ءۇشىن دە شىعىندالمايمىن. جۇمىس ورنىم ۇيگە جاقىن بولعاندىقتان، جول اقىعا كەتەتىن 160 تەڭگەم دە قالتامدا قالادى. تۇسكى استى دا ۇيدەن تاسيمىن. تەك كۇندەلىكتى نان پۇلعا كەتەتىن ۇساق-تۇيەك شىعىندارىمدى ەسەپتەپ، ەكى اپتاعا كۇندەلىك جاساپ كوردىم. سونىمەن:
1 قاڭتار. جاڭا جىل قارساڭىندا ۇيدەگىلەردىڭ ءبارى استاناعا جول تارتتى. ازىرشە ۇيدە ءوزىم بي، ءوزىم قوجامىن. مەرەكەدەن قالعان تاتتى-دامدىگە تويىپ الدىم دا، قۇربىما جول تارتتىم. جولاي 1550 تەڭگەگە تورت الدىم. جول اقىسىنا 160 تەڭگەگە شىعىندالدىم.
2 قاڭتار. 90 تەڭگەگە ءبىر بولكە قارا نان، 500 تەڭگەگە جارتى كەلى ماي الدىم.
3 قاڭتار. 180 تەڭگەگە ءبىر ليمون ولشەتىپ الىپ، تۇماۋدان ەمدەلدىم. 250 گرامدىق «پيالا» ماركالى شايى ءۇشىن 690 تەڭگە تولەدىم.
4 قاڭتار. جۇمىسىم كومپيۋتەرمەن بايلانىستى بولعاندىقتان، كوزىم كوپتەن بەرى مازالاپ ءجۇر. ءوزىم تىركەلگەن اۋرۋحانادا مەديسينالىق كارتام جوعالىپ كەتكەن. ونىڭ ۇستىنە بۇل اۋرۋحانادا كوز دارىگەرى دە تاپشى بولىپ شىقتى. كەڭەس الۋ ءۇشىن ناۋقاستار ءبىر اي بۇرىن جازىلىپ قويادى ەكەن. امال جوق، اقىلى مەديسينالىق كومەككە جۇگىندىم. وفتولمولوگيالىق ورتالىققا بارسام، دارىگەردىڭ قابىلداۋى 4000 تەڭگە بولىپ شىقتى. قوسىمشا اناليز ءۇشىن 350 تەڭگە تولەدىم. كوز قىسىمىم قالپىندا، دارىگەر اللەرگيا دەگەن دياگنوز قويدى. 1550 تەڭگە كومبينيل-دۋو، 910 تەڭگە گيدروبالانس، 1890 تەڭگەگە يريفرين دارىلەرىن الدىم. 160 تەڭگە جولعا كەتتى.
5 قاڭتار. تەلەفونىمدا بىرلىك تاۋسىلدى. 790 تەڭگەگە «سۇحبات +» تاريفىنە قوسىلدىم. بۇل تاريف تە جاڭا جىلدان باستاپ 190 تەڭگەگە قىمباتتاپتى.
6 قاڭتار. 870 تەڭگەگە تومات پاستاسىن، 355 تەڭگەگە 2 كەلى ماكارون، 910 تەڭگەگە 2 ليتر كۇنباعىس مايىن الىپ، توڭازىتقىشىمدى قالتامداعى قارجىما سايكەس تولتىرىپ قويدىم. سورەدە سامساپ تۇرعان شۇجىقتارعا كوزىم ءتۇسىپ كەتسە دە، ءوزىمدى توقتاتتىم.
7 قاڭتار. 1540 تەڭگە پياز، ورامجاپىراق جانە كارتوپقا كەتتى.
8 قاڭتار. بۇل كۇنى سۇتكە 350 تەڭگە، نانعا 60 تەڭگە جۇمسادىم.
9 قاڭتار. انام مەن اكەم جىبەرگەن ەت تاۋسىلدى. امال جوق اي سوڭىنا بەلوكتى ديەتا ۇستانۋعا تۋرا كەلەدى. 260 تەڭگەگە ون جۇمىرتقا الدىم.
10 قاڭتار. 195 تەڭگەگە بوتقا كرۋپاسىنا ، 60 تەڭگە نانعا كەتتى.
11 قاڭتار. 135 تەڭگەگە 5 جۇمىرتقا، 255 تەڭگەگە «سۋشكي»، - دەپ اتالاتىن قىتىرلاق نان الدىم.
12 قاڭتار. 345 تەڭگەنى ايرانعا، 60 تەڭگەنى نانعا، 500 تەڭگەنى تۇسكى اسقا تولەدىم.
13 قاڭتار. 650 تەڭگەگە شاش جۋاتىن سۋ سابىن (شامپۋن)، 210 تەڭگەگە سابىن، 380 تەڭگەگە كرەم الدىم. (مىنا تۇرىممەن ءسان سالوندارىنىڭ ەسىگىنەن دە قاراي المايتىن ءتۇرىم بار.)
14 قاڭتار. بۇگىن جەكسەنبى. ءبىر نان مەن ءسۇت الدىم دا، ۇيدە جاتىپ دەمالدىم. قىدىرۋعا شامام جوق.
15 قاڭتار. قىرسىق شالعاندا ەسكى ەتىگىمنىڭ تابانى قاققا ءبولىندى. ەڭ از جالاقىعا كۇنەلتەتىندەر ءۇشىن باعاسى ءتيىمدى «جانساياعا» بازارىن بەتكە الدىم. ساتۋشى اپكەممەن ءتاۋىر ساۋدالاسىپ، ءبىر اياق كيىم ءۇشىن 8 مىڭ تەڭگەگە شىعىندالدىم. جۇقا باس كيىمىمنەن دە سۋىق ءوتىپ بارادى. الايدا ليميت شەكتەۋلى. سوڭعى تيىنىمدى ساناپ اۆتوبۋسقا وتىردىم.
ءدامدى تاعام جەگىپ كەپ سىلەكەيىم شۇبىرىپ-اق كەلەدى. ەتىگىم امان بولعاندا، ءالى ءبىر اپتا تويىپ تاماق ىشەر مە ەدىم؟ مايعا قۋىرىلعان ماكاروننان ابدەن مەزى بولسام دا ءوزىمدى «شىداۋ كەرەك»، - دەپ قامشىلاپ، ديۆانعا قيسايا كەتتىم.
ءبىر كەزدە ويدا جوقتا اكەم مەن انام كەلىپ، اۋىلدان اكەلگەن قازى-قارتاسىن، سارى مايى مەن كىلەگەيىن، سارى باۋىرساعىن الدىما توستى. قازى-قارتانى كورگەندە انام مەن اكەمدى ساعىنعانىم دا ەسىمنەن شىعىپ كەتكەندەي...ايتەۋىر قۋانىشىمدا شەك جوق.
ويانىپ كەتسەم، ءتۇسىم ەكەن. سونىمەن 28 مىڭ 284 تەڭگە تەك ەكى اپتاعا جەتتى. اش ادامنىڭ تۇسىنە تاماقتان باسقا نە كىرسىن؟
جادىرا تولەگەن قىزى
