ءاليا نازاربايەۆا «ۇستازدى ىزدەۋ» دەرەكتى فيلمىندە ءوز بالالارىمەن قارىم-قاتىناسى تۋرالى اڭگىمەلەپ بەردى، - دەپ حابارلايدى Qamshy.kz اقپارات اگەنتتىگى. بۇل فيلم Youtube كانالىندا پايدا بولدى. 

ءاليا نازاربايەۆانىڭ ويىنشا ۇستازدىڭ ەڭ قۇرمەتتى تۇلعا بولۋى اسا ماڭىزدى. 

«ايتپەسە، بەرگەن ءبىلىمى ءبىر باسقا، ۇيگە كەلىپ جاساعان ارەكەتى ءبىر باسقا بولۋى مۇمكىن. بالالار مۇنى سەزەدى جانە سول ءۇشىن تىڭدامايتىن بولادى. ال ەگەر، ۇستازدىڭ ويى مەن ارەكەتى ءبىر بولسا، ونداي ۇستاز سۇيىكتى بولىپ، ولار ءپاندى جاقسى كورىپ، قالايتىن (وقۋدى - اۆت.) بولادى. ايتادى عوي، سۇيىكتى پاندەر دەگەنىمىز، سۇيىكتى پەداگوگ، ءمۇعالىم، ۇستاز بار جەردە دەپ»، - دەدى نازاربايەۆا.

كەيىن ءاليا نازاربايەۆا ءوزىنىڭ ۇلكەن قىزىنان العاش رەت كەشىرىم سۇراعانىن ايتتى. 

«ۇلكەن قىزىممەن اڭگىمە بولدى. مەن قىزىمنان ومىرىمدە العاش رەت كەشىرىم سۇرادىم. مەن: «قىزىم، انا دا قاتەلەسەدى. كەشىرشى مەنى، وتىنەمىن»، دەپ ايتتىم. ەكەۋمىز دە جىلادىق. مەن دە، ول دا جىلادى. وسىدان كەيىن ىشىمدە ءبىر نارسە وزگەرگەندەي بولدى. ءبىزدىڭ قارىم-قاتىناسىمىز ودان سايىن جاقىنداي ءتۇستى. مەن قىزىما، ەگەر مەن دۇرىس ايتپاسام نەمەسە كىشى ىنىلەرىڭە، سىڭلىلەرىڭە قاتىستى دۇرىس ارەكەت جاساماسام، سەن دە ماعان كەڭەس بەر دەدىم. ساعان، سىرت كوزگە جاقسى بايقالادى عوي. بىرگە تىرىسىپ كورەيىك. ەندى مەن دە جاقسى انا بولۋدى ۇيرەنىپ ءجۇرمىن. مەنىڭشە، بۇل تاماشا پروسەسس، ول وتە تەرەڭ، ىشكى سەزىم. سەن ىشكى سەزىمدى سەزىنگەن كەزدە وزگەرە باستايسىڭ جانە سەنى قورشاعان الەم، ءوز جاقىندارىڭنان باستاپ جاقسى جاعىنا قاراي وزگەرەتىن بولادى»، - دەيدى ءاليا نازاربايەۆا.  

دەرەكتى فيلمدە 2013 جىلدان بەرى ەلىمىزدە مارينا تارگاكوۆانىڭ باسشىلىعىمەن گۋمانيستىك پەداگوگيكا ورتالىعىنىڭ جۇمىس ىستەپ جاتقانى جانە 2018 جىلى استانادا ءاليا نازاربايەۆانىڭ قولداۋىمەن گۋمانيستىك پەداگوگيكا مەكتەبى اشىلاتىنى ايتىلادى.