«سيفرلىق تەحنيكا جانە تەحنولوگيا ينستيتۋتى» اق ديرەكتورلار كەڭەسىنىڭ شەشىمىمەن قازاقستان سەيسمولوگيا ينستيتۋتىنىڭ ديرەكتورى اۋىستى، دەپ جازادى Qamshy.kz اقپارات اگەنتتىگى.

ينستيتۋتتىڭ بۇرىنعى ديرەكتورى ءانۋار بورانبايەۆپەن ەڭبەك كەلىسىمى 12 اقپاندا بۇزىلدى. 24 اقپاندا باسشىلىققا دوسىم سۇلەيەۆ كەلەدى.

بۇگىندە سۇلەيەۆ 70 جاستا. 1970 جىلى ق. ي. ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ اۆتوماتيكا جانە ەسەپتەۋ تەحنيكاسى فاكۋلتەتىن ءبىتىرىپ، تەحنيكالىق كيبەرنەتيكا كافەدراسىندا ينجەنەر قىزمەتىنە قالدىرىلدى. ماسكەۋدەگى بولات جانە قورىتپالار ينستيتۋتىنىڭ اسپيرانتۋراسىنىڭ كۇندىزگى ءبولىمىن ءتامامداپ جانە كانديداتتىق ديسسەرتاسياسىن ءساتتى قورعاعاننان كەيىن، قازاق پوليتەحنيكالىق ينستيتۋتىنا پەداگوگ رەتىندە جىبەرىلدى.

1984 جىلدان الماتى قالالىق پارتيا كەڭەسىنىڭ ءبىلىم بەرۋ بولىمىندە جۇمىس جاسادى.

1986 جىلدىڭ ساۋىرىنەن الماتى ەنەرگەتيكالىق ينستيتۋتىندا وقۋ جۇمىسى جونىندەگى پرورەكتورى قىزمەتىن اتقاردى.

 1997 جىلدىڭ ناۋرىزىندا قازاقستان رەسپۋبليكاسىنىڭ ءبىلىم بەرۋ جانە مادەنيەت مينيسترلىگىنىڭ جوعارى جانە ارنايى ءبىلىم بەرۋ دەپارتامەنتىنىڭ ديرەكتورى قىزمەتىنە تاعايىندالدى.

2001 جىلدىڭ قاڭتارىندا ق ر پرەمەر-مينيسترى كانسەليارياسىنىڭ قوعامدىق مادەني دامۋ ءبولىمىنىڭ باستىعى قىزمەتىنە اۋىستىرىلدى.

2001 جىلدىڭ شىلدە ايىندا ق.ي. ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتتىڭ رەكتورى بولىپ تاعايىندالدى.

2004 جىلدىڭ قازان ايىنان باستاپ قازاقستان رەسپۋبليكاسىنىڭ ۇلتتىق عىلىم اكادەمياسىنىڭ جەر تۋرالى عىلىم ءبولىمىنىڭ ءتوراعاسى بولىپ كەلەدى. سونىمەن قوسا، ول «دوس-مۇقاسان» ءانسامبلىنىڭ نەگىزىن سالۋشى جانە العاشقى باسقارۋشىسى.