وسكەمەندەگى «حاليفا التاي» مەشىتىنىڭ باس يمامى گولليۆۋد اكتەرلارىنىڭ مەشىتكە كىرگەنىنە قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى. 

جاقىندا گولليۆۋد جۇلدىزدارى ەريك روبەرتس، باي لين، مارك داكاسكوس جانە كەري-حيرويۋكي تاگاۆا دەرەكتى فيلمگە ءتۇسۋ ءۇشىن شقو-عا باردى. اكتەرلاردىڭ «حاليفا التاي» مەشىتىندەگى فوتوسۋرەتتەرى قوعامدا ءتۇرلى پىكىر تۋعىزدى. الەۋمەتتىك جەلى قولدانۋشىلارى وزگە ءدىن وكىلدەرىنىڭ مۇسىلمانشا قول جايعانىن تالقىعا سالدى. اسىرەسە، اشىق-شاشىق كيىنەتىن، فيلمدەرگە جالاڭاش تۇسەتىن باي ءليننىڭ مەشىتكە كىرگەنىنە نارازىلىق تانىتتى.

وسىعان بايلانىستى Qamshy.kz اقپارات اگەنتتىگى «حاليفا التاي» مەشىتىنىڭ باس يمامى ەرمەك مۇقاتايمەن سويلەستى.

ەرمەك مۇقاتاي: مەشىتتىڭ ەسىگى بارىنە اشىق. مەشىت تەك عيبادات ورنى ەمەس، ول – قوعامدىق، رۋحاني ورىن. كىم كورەمىن، ارالايمىن دەسە دە، ءوز ەركى. قوناقتارعا قالانى ارالاتۋ وسى مەشىتتەن باستالدى. گولليۆۋد اكتەرلارىن ءبىز شاقىرعان جوقپىز، ولار بىزگە قوناق بولىپ كەلە جاتىر دەپ حابارلاندى.

ولار كەلدى، كوردى، ارالادى. اللانىڭ ۇيىنە قۇرمەت كورسەتتى. مىسالى، كەري تاگاۆا مەشىتكە كىرەردە باس ءيىپ سالەم بەردى، شىعاردا دا تاعزىم ەتىپ قوشتاستى.

ەريك روبەرتس جاقىندا جول اپاتىنا ۇشىراپتى. ول كىسىگە كوپ قيمىلداۋعا بولمايدى ەكەن. سوعان قاراماستان، ارباسىنان ءتۇسىپ، تىزەرلەپ وتىرىپ قولىن جايدى.

كىم بىلەدى، كەيبىرى وسىدان كەيىن يسلام ءدىنىن قابىلداۋى مۇمكىن. باي لين ءوز ەلىندە پورنوجۇلدىز شىعار، ءبىراق مەشىتكە اشىق-شاشىق كەلگەن جوق قوي. جابىق كيىنگەن، باسىن بۇركەگەن.

Qamshy.kz: شاشى كورىنىپ تۇر عوي...

ەرمەك مۇقاتاي: كورىنە بەرسىن. ەڭ باستىسى، باسى جابىق. كىم بولسا دا كەلسىن، كورسىن. ءوز وتانداستارىمىز دا مەشىتكە كەلگەندە باستارىنا ءبىر جاپىراق ورامالدارىن جاۋىپ وتىرا بەرەدى.

Qamshy.kz: «باي لين مەشىتتە بۋدديزم ءراسىمىن جاسادى» دەپ ايىپتاپ جاتقاندار بار. بۇعان نە دەيسىز؟

ەرمەك مۇقاتاي: وندا تۇرعان ەشتەڭە جوق. ول يمامدارمەن امانداسىپ، ءوز قۇرمەتىن كورسەتتى. پايعامبارىمىز كەزىندە حريستيان الەمىنىڭ كوشباسشىلارىن كۇتىپ العان. ولاردىڭ ۇيىنە كىرىپ، قال-جاعدايلارىن سۇراعان. ءقازىر رۋحاني جاڭعىرامىز دەيمىز دە، تار شەڭبەردە ويلايمىز. بۇل – الەمدىك تاجىريبەدە بار نارسە. ىستامبۇلداعى ءزاۋلىم-زاۋلىم مەشىتتەردى دىنىنە قاراماي، بارلىعى ارالايدى.

Qamshy.kz: الەمدىك تاجىريبە دەمەكشى، Facebook پاراقشاسىندا ءبىر كىسى: «ارابياداعى مەككەگە پورنوجۇلدىز تۇگىلى وزگە دىندەگى ادامدى كىرگىزبەيدى. ال قازاقتىڭ مەشىتى «پروحودنوي دۆور» سياقتى، ەندى الەمدى شۋلاتقان پورنوجۇلدىزدىڭ مەشىت تورىندە تايراڭداۋى قالىپ ەدى»،- دەپ وتىر.

ەرمەك مۇقاتاي: مەككە – قاسيەتتى ورىن.

Qamshy.kz: ءبىزدىڭ مەشىتتەر شە؟

ەرمەك مۇقاتاي: ايىرماشىلىعى جەر مەن كوكتەي. ول جەردىڭ ءبىر قۇمىرسقاسىن، ءبىر شىبىنىن ولتىرۋگە بولمايدى.

مەشىتكە وزگەلەردىڭ كىرۋىنە تىيىم سالىپ تاستاساق، ءدىنىمىزدى قالاي جەتكىزەمىز؟ ونىمەن سويلەسپەي، سۇحباتتاسپاي، «سەن كۇناھارسىڭ» دەپ ات-تونىمىزدى الا قاشساق، دۇرىس بولمايدى عوي.

ايتپاقشى، «اكتەرلار مەشىتكە اياق كيىممەن كىردى» دەپ سىن ايتىپ جاتقاندار بار. ءبىز ولارعا ارنايى اياق كيىم دايىنداعانبىز. سونى كيدى. يمامدار اقىماق ەمەس. پانا ىزدەپ كەلگەن ادامنىڭ بارىنە مەشىتتىڭ ەسىگى اشىق.

Qamshy.kz: اڭگىمەڭىزگە راقمەت!