رەسەيدىڭ سۋرگۋت قالاسىندا قازاقستاندىق ازىلكەش ۇياتقا قالدى. بۇل جايىندا لايف.رۋ جازادى.
سابىروۆ ونەر كورسەتىپ تۇرعاندا كورەرمەندەردىڭ ءبىرى تەلەفونمەن قاتتى سويلەسىپ، بىرنەشە رەت «اناشىم» دەپ داۋىستاپ ايقايلاعان.
ال ازىلكەش نۇرلان سابىروۆ قىزدىڭ كونسەرت زالىنان جۇگىرىپ شىققانىن كورىپ: «بۇل نە بولدى؟»، «ارام قاتتىڭ دەپ ويلايمىن» دەگەن.
كونسەرت اياقتالعاننان كەيىن قالا تۇرعىندارى جەلىدە جاس قىزدىڭ سول كەشتەگى ارەكەتىن ءسوز قىلىپ، ءمان-جايدى بىلۋگە تىرىسقان. كەيىن قىزدىڭ جاقىن قۇربىسى سول كۇنى ولاردىڭ وتباسىندا قايعىلى جاعداي ورىن الدى دەپ ماسەلەنىڭ باسىن اشتى.
كونسەرت بولعان كۇنى قىزدىڭ اناسى وعان اكەسىنىڭ قايتىس بولعانى تۋرالى حابار بەرگەن. وسى سەبەپتەن ازىلكەشتىڭ جانكۇيەرى كونسەرت كەزىندە «اناشىم» دەپ ايقاي سالىپ، زالدان جۇگىرىپ شىققان.
نۇرلان سابىروۆ كونسەرتتە بولعان قىزعا حابارلاسىپ، كەشىرىم سۇراعان.
