ق ر بالا قۇقىقتارى جونىندەگى ۋاكىلى زاعيپا بالييەۆا وقو-دا زورلاندى دەگەن جەتى جاسار بالانىڭ اجەسى مەن اپايى بالانى قورعاۋ ءۇشىن استاناعا ءوز ەركىمەن بارعاندارىن ايتتى ، - دەپ حابارلايدى Tengrinews.kz.

"مەنىڭ مىندەتىم - بالانىڭ قۇقىعىن قورعاپ، ونى قاۋىپسىزدىكپەن قامتاماسىز ەتۋ. مەن ونى ءوزىم الىپ كەتە سالعان جوقپىن. زاڭدى وكىلى - اجەسى، اپايىمەن كەزدەستىم. ولارعا "ءقازىر استاناعا بارىپ، ساراپتاما جاساۋعا قالاي قارايسىزدار؟ سىزدەرگە بارلىق جاعدايدى جاساپ بەرەمىن. مەنىمەن بىرگە بارعىلارىڭىز كەلسە، جۇرىڭىزدەر. بيلەتتى ساتىپ الىپ بەرەمىن. سىزدەردى ەشكىم مازالايمايدى. ءقاۋىپسىز جەردە بولاسىزدار" دەدىم. ءوز مىندەتىمدى اتقاردىم"، - دەپ ءتۇسىندىردى بالييەۆا.

مۇنىڭ الدىندا زاعيپا بالييەۆا زورلىق كوردى دەلىنگەن جەتى جاسار بالانىڭ اناسى ونىمەن بايلانىسقا شىققانىن ايتىپ، بالانىڭ بۇگىن اناسىمەن كەزدەسەتىنىن ايتقان بولاتىن.

سونداي-اق، وسىعان دەيىن ق ر بالا قۇقىقتارى جونىندەگى ۋاكىلى زاعيپا بالييەۆانىڭ زورلىق كوردى دەلىنگەن وقۋشى بالامەن كەزدەسكەنى حابارلانعان بولاتىن. بالييەۆانىڭ ايتۋىنشا، بالانىڭ دەنساۋلىعى مەن قۇقىعىن قورعاۋ ماقساتىندا تەرگەۋشى بالاعا ەشكىمنىڭ دە قانداي دا ءبىر سۇراق قويا المايتىن قاۋلى شىعارعان. 

ەسكە سالايىق، جەلىدە وقو-نىڭ سارىاعاش اۋدانىنداعى اباي اۋىلىندا جەتى جاسار بالا زورلاندى دەگەن اقپارات تاراعان. كەيىن TVK مالىمەتىنشە، وقو ءىىد وكىلدەرى بۇل دەرەككە قاتىستى ق ر قىلمىستىق كودەكسىنىڭ 121-بابىنىڭ 4-بولىگى ("سەكسۋالدىق سيپاتتاعى زورلىق-زومبىلىق ارەكەتتەرى") بويىنشا قىلمىستىق ءىس قوزعالعانىن حابارلاعان. الايدا كۇدىكتىلەر نەمەسە ۇستالىپ، قامالعاندار جايلى ەشقانداي مالىمەت تۇسپەدى. ارتىنشا ءبىلىم جانە عىلىم ۆيسە-مينيسترى بيبىگۇل اسىلوۆا ساراپتاما قورىتىندىسى وقۋشى بالانىڭ زورلانعانىن راستاعانىن حابارلاعان.