قازاقستان رەسپۋبليكاسىنىڭ پرەمەر-مينيسترى باقىتجان ساعىنتايەۆ وڭتۇستىك قازاقستان وبلىستىق كلينيكالىق اۋرۋحاناسىندا بولىپ، دەنساۋلىق ساقتاۋ سالاسى مەكەمەلەرىنىڭ باسشىلارىمەن كەزدەستى. وڭىردەگى وسى سالا بويىنشا قوردالانعان ماسەلەلەرمەن تانىستى. بۇل تۋرالى Qamshy.kz اقپارات اگەنتتىگى ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ حابارلايدى. 

كەزدەسۋ بارىسىندا دەنساۋلىق ساقتاۋ جۇيەسىن دامىتۋدىڭ وزەكتى ماسەلەلەرى تالقىلاندى. اتاپ ايتقاندا، اۋرۋلاردى باسقارۋ باعدارلامالارىن سيفرلاندىرۋ جانە ازىرلەۋ، اۋرۋلاردى ەمدەۋدەن ۋاقىتىلى اۋرۋلاردىڭ الدىن-الۋعا كوشۋ، مىندەتتى مەديسينالىق ساقتاندىرۋدى ەنگىزۋ، كادرلاردى دايارلاۋ، دەنساۋلىق ساقتاۋ نارىعىن ىرىقتاندىرۋ جانە جەكەمەنشىك ۇيىمداردىڭ اكىمشىلىك كەدەرگىلەرىن ازايتۋ، ينۆەستيسيالار تارتۋ، ينفراقۇرىلىمدى جەتىلدىرۋ جانە مەملەكەتتىك-جەكەشەلىك ارىپتەستىكتى دامىتۋ.

ق ر پرەمەر-مينيسترى باقىتجان ساعىنتايەۆ ۇكىمەت اتالعان ماسەلەلەردىڭ بارلىعىن ەرەكشە باقىلاۋدا ۇستاپ وتىرعانىن اتاپ ءوتتى. 2017 جىلى جەكە سەكتورعا قويىلاتىن شەكتەۋلەر 1،7 ەسە جويىلدى. بۇل دەنساۋلىق ساقتاۋ سالاسىنا سالىناتىن جەكە ينۆەستيسيالاردى ەكى ەسەگە — 44،2 ملرد تەڭگەگە دەيىن ۇلعايتۋعا جول اشادى. ءمامس جۇيەسىن ەنگىزۋ بويىنشا جۇيەلى جۇمىستار جالعاسۋدا: زاڭنامالىق بازا قۇرىلدى، وتكەن جىلدان باستاپ قور جۇمىس ىستەي باستادى، جۇمىس بەرۋشىلەر اقشا اۋدارىمدارىن جۇرگىزىپ جاتىر.

بۇدان وزگە، پرەزيدەنتتىڭ بەس الەۋمەتتىك باستاماسى اياسىندا بەرىلىپ جاتقان مۇمكىندىكتەر تالقىلاندى. بۇل — ءتيىمدى شارتتار بويىنشا تۇرعىن ءۇي ساتىپ الۋعا مۇمكىندىك بەرەتىن «7–20–25» جاڭا يپوتەكالىق باعدارلاماسى، جانە حالىقتىڭ جەكەلەگەن توپتارىنا 2019 جىلدىڭ 1 قاڭتارىنان باستاپ سالىق جۇكتەمەسىنىڭ 10 ەسەگە – 1%-كە دەيىن تومەندەۋى.

دەنساۋلىق ساقتاۋ ۆيسە-مينيسترى ءلاززات اقتايەۆا دەنساۋلىق ساقتاۋ جۇيەسىن جەتىلدىرۋ سالاسىندا قابىلدانىپ جاتقان شارالار تۋرالى ەگجەي-تەگجەيلى بايانداپ بەردى.