قوعام قايراتكەرى، "ءۇي" قايىرىمدىلىق قورىنىڭ جەتەكشىسى ارۋجان ساين Facebook پاراقشاسىندا 2011 جىلى تۋعان اينا ەسىمدى قىزعا قاتىستى مالىمەت جاريالادى، دەپ جازادى Qamshy.kz اقپارات اگەنتتىگى.
"2016 جىلدىڭ باسىندا قورعا 2011 جىلى تۋعان اينا دەگەن قىزدىڭ اكەسى كومەك سۇراپ كەلدى. ول وڭەشى كۇيگەن قىزىن شەتەلگە ەمدەلۋگە جىبەرۋدى ءوتىندى. قور ءتارتىبى بويىنشا بالانىڭ اتا-اناسىنان الىنعان بارلىق مەديسينالىق جازبانى ءتۇرلى كلينيكالارعا جولدادىق. سونىمەن قاتار ءۇندىستاندىق «فورتيس» حالىقارالىق كلينيكالار جەلىسىنە قاراستى اننا ۆەربينانىڭ «مەدينديا» بولىمشەسىنە جىبەردىك.
«مەدينديا» قىزمەتكەرلەرى ءبىزدىڭ جىبەرگەن مەديسينالىق كوشىرمەلەرىمىزدى كورىپ، جاعاسىن ۇستادى. ءبىز قازاقستاندىق دارىگەرلەرمەن دە سويلەستىك. ولار دا شەتەلدىك ارىپتەستەرىنىڭ قورىتىندىسىن راستاپ وتىر. قورىتىندىعا سايكەس، جاراقاتتار ولىمگە الىپ كەلۋى مۇمكىن ەدى.
- 2012 جىلدىڭ ماۋسىم ايىندا اينا باسسۇيەك-مي جاراقاتىن العان. بالانىڭ ءوزى قۇلاپ، مۇنداي جاراقات الۋى ەكىتالاي.
- 2013 جىلدىڭ قاڭتار ايىندا (جاسى ءبىر جارىمدا ەدى) قىزدىڭ ەڭبەگىنەن ينە تابىلعان.
- 2013 جىلدىڭ مامىر ايىندا (ەكىگە دە تولماعان) قىز ۋلى سۇيىقتىق ىشكەن. ادەتتە بالالار كەزدەيسوق سىركە سۋى نەمەسە سىركە قىشقىلىن ءىشىپ قويعاندا جامان ءدامدى سەزگەننەن كەيىن تۇكىرىپ تاستايدى. ال اينانىڭ وڭەشىنەن باستاپ اسقازىنا دەيىن كۇيگەن. مۇنداي جاعداي تەك ول سۇيىقتىقتى بالاعا ماجبۇرلەپ ىشكىزگەندە عانا بولادى.
سودان بەرى اينا ءوز بەتىمەن تاماقتانا المايدى. تەك زوند ارقىلى عانا بەلگىلى ءبىر سۇيىق تاماقتاردى ىشەدى. بەس جاسىندا قىزدىڭ سالماعى سەگىز كەلىدەن ءسال عانا اساتىن.
- 2014 جىلدىڭ ءساۋىر ايىندا (جاسى – 2 جاس 8 اي) قىزدىڭ ارقاسىنا، كوكىرەك تۇسىنا ينە سۇعىلعان. ونىڭ ءبىرى جۇرەگىنە جانە ومىرتقاسىنا ءبىر ميلليمەتر عانا جەتپەي قالعان. كەيبىر ينەلەردى شىعارۋ مۇمكىن بولمادى.
قىزدى وتباسىنداعى بىرەۋ ولتىرگىسى كەلىپ جۇرگەنى انىق بولعاندىقتان، بارلىق جاعدايدى بايانداپ، باس پروكۋراتۋراعا حات جىبەردىك.
ءبىز قىزعا كومەكتەسۋگە تىرىستىق. بالانى الماتىداعى پەدياتريا جانە بالالار حيرۋرگياسى عىلىمي ورتالىعىنا جاتقىزۋدى تالاپ ەتتىك. ودان كەيىن «فورتيسكە» (ءۇندىستان) جىبەردىك. وندا قىزدىڭ اكەسى ەمنەن باس تارتىپ، قازاقستانعا قايتىپ كەلدى.
باس پروكۋراتۋرا ءبىزدىڭ شاعىمىمىزدى وقو پروكۋراتۋراسىنا جىبەردى.
ءبىز ءوز حاتىمىزدا مىنا ماسەلەلەردى كوتەردىك:
- بالانى وتباسىنان شۇعىل تۇردە وقشاۋلاۋ. قىزدىڭ مۇنداي كۇيگە تۇسكەنىنە اكەسى دە كىنالى بولۋى مۇمكىن نەمەسە وتباسىنىڭ ءبىر مۇشەسىن قورعاشتاپ جۇرگەن بولۋى ابدەن مۇمكىن. سول ءۇشىن قۇقىققورعاۋ ورگاندارىنا شاعىمدانباي وتىر.
- بالانىڭ دەنساۋلىعىنا جۇيەلى تۇردە زاقىم كەلتىرىلسە دە، اۋداندىق اۋرۋحانا، دەنساۋلىق ساقتاۋ دەپارتامەنتى، اۋدان مەن وبلىستاعى قامقورشىلىق ورگاندارى جانە پوليسيا قاجەتتى شارانى قولعا المادى. بالاعا قاتىستى بارلىق جاعدايدى انىقتايتىن تەكسەرۋ جۇمىستارى جۇرگىزىلەتىنىن بىلسە، وتباسى قىلمىستىڭ ءىزىن جاسىرۋ ءۇشىن قىزعا زاردابىن تيگىزۋى مۇمكىن. بالا ءىز-تۇزسسىز جوعالىپ كەتۋى مۇمكىن نەمەسە ءورت بولىپ، بارلىق دايەك جويىلۋى مۇمكىن. ال جەرگىلىكتى ورگاندارى ۋاقىتتى سوزىپ، بالا ءقاۋىپتى جاعدايدا قالۋى ىقتيمال.
- بالانى شۇعىل تۇردە الماتىداعى پەدياتريا جانە بالالار حيرۋرگياسى عىلىمي ورتالىعىنا جاتقىزۋ قاجەت. وندا اينانىڭ دەنساۋلىعىن قالپىنا كەلتىرىلەدى. ءبىزدىڭ قور قىزدى شەتەلگە ەمدەلۋگە جىبەرۋگە ءازىر.
- بالانىڭ دەنساۋلىعىنا زاقىم كەلتىرۋ جانە ومىرىنە ءقاۋىپ ءتوندىرۋ بويىنشا تەرگەۋ جۇمىستارىن جۇرگىزۋ ءۇشىن شارا قولدانۋ قاجەت. ەگەر وتباسى بالاعا ءقاۋىپ توندىرەتىن بولسا، اتا-اناسىنىڭ قىزدى كورۋىنە شەكتەۋ قويىپ، ودان كەيىن اتا-انا قۇقىعىنان ايىرىپ، كىنالىلەردى جاۋاپقا تارتۋ كەرەك.
- تەرگەۋ جۇمىستارىن جۇرگىزىپ، قىزدىڭ دەنساۋلىعىنا زارداپ تيگىزگەنىن جانە دەنەسىندەگى ينەنى كورە تۇرا قۇقىققورعاۋ ورگاندارىنا شاعىمدانباي، بالانىڭ دەنساۋلىعى مەن ءومىرىن قورعاۋ ءۇشىن قاجەتتى شارا قولدانباي، قىزدىڭ دەنساۋلىعىنا ودان دا قاتتى زاقىم كەلۋىنە جانە ومىرىنە ءقاۋىپ تونۋىنە جول بەرگەن مەديسينالىق مەكەمەلەرگە جانە مەملەكەتتىك ورگاندارعا قاتىستى ءتيىستى شارالاردى قولدانۋ. جەرگىلىكتى مەكەمەلەردىڭ، دەنساۋلىق ساقتاۋ دەپارتامەنتى مەن قامقورشىلىق ورگاندارىنىڭ بالاعا ءقاۋىپ تونگەنىن تۇسىنبەۋى مۇمكىن ەمەس ەدى.
باس پروكۋراتۋراعا العاشقى حات 2016 جىلى قاڭتاردا جىبەرىلدى. ءدال سول جىلدىڭ ءساۋىر ايىندا ءبىزدىڭ كەڭسەگە كەلگەن بالا قۇقىقتارى جونىندەگى ۋاكىل زاعيپا بالييەۆاعا حاتتى بەرىپ جىبەردىك.
2017 جىلدىڭ اقپان ايىندا باس پروكۋروردىڭ ورىنباسارى اندرەي كراۆچەنكومەن كەزدەسۋ بارىسىندا جاڭادان جازىلعان حاتتى جاڭا تاعايىندالعان باس پروكۋرور جاقىپ اسانوۆقا بەرىپ جىبەردىك.
ءالى كۇنگە دەيىن باس پروكۋراتۋرادان اينانىڭ جاعدايىنا قاتىستى جاۋاپ المادىق. ءبىزدىڭ شاعىمىمىز باس پروكۋراتۋراعا ەمەس، كامەلەتكە تولماعان بالالاردىڭ قۇقىعىن قورعاۋ بولىمىنە بارادى. اتالعان ءبولىمنىڭ قىزمەتكەرلەرىنە ءبىز سەنىمسىزدىك تانىتىپ وتىرمىز. سەبەبى ءبىزدىڭ شاعىمىمىزعا قاتىستى (شامامەن 2014 جىلدان باستاپ) بىردە-بىر جاعداي سوڭىنا دەيىن جەتكىزىلمەگەن. باس پروكۋرورلار اۋىسىپ تۇرادى. ال ول جەردە بۇرىنعى ادامدار وتىر. تەلەفون ارقىلى سويلەسكەندە باياعى ءبىر جاۋاپتى ەستيمىز. «سىزدەرگە جاۋاپ كەلمەۋى مۇمكىن ەمەس». كەشىرىڭىز، ءبىراق ماسەلە جاۋاپتا ەمەس، بالالاردىڭ قيىن جاعدايدا قالعانىندا جانە ولارعا ەشكىمنىڭ كومەكتەسپەي جاتقانىندا!
2017 جىلدىڭ اقپان ايىندا وسى ءىس تاپسىرىلعان وقو-داعى تەرگەۋشىمەن سويلەستىم. ونىڭ ەسىمى – توفيك. ول قىلمىستى ەشكىم مويىندامايتىنىن ايتىپ، مەنەن نە قالايتىنىمدى سۇرادى. ءبىز بارلىعى زاڭ بويىنشا بولعانىن قالايمىز. بالانىڭ ەندىگى جولى ءتىرى قالۋى ەكىتالاي ەكەنىن جانە قىزدى مۇنداي جاعدايعا كىمنىڭ جەتكىزىپ وتىرعانىن انىقتاۋ وتە قيىن ەكەنىن جەتكىزدىم.
ءبىزدىڭ پروكۋراتۋراعا شاعىمدانعانىمىزدى ەستىگەن قىزدىڭ اكەسى قاتتى اشۋلاندى. حاتتى قايتارىپ الۋدى تالاپ ەتتى.
ول قىزدى ەمدەۋ ءۇشىن ءبارىن ىستەپ جاتقانىن جانە قىزعا مۇنداي زاقىمدى كىم كەلتىرگەنىن بىلمەيتىنىن ايتادى. قىزدىڭ اناسى بۇل وتباسىدا ەشتەڭەنى شەشپەيتىن سەكىلدى.
ءالى كۇنگە دەيىن قىز تۋرالى ەشقانداي اقپارات بىلمەيمىز. ءتىرى مە، الدە ءولى مە، حابارىمىز جوق. قىزدىڭ اكەسى تەلەفون ءنومىرىن اۋىستىرعان سەكىلدى.
قىزعا قالاي كومەكتەسۋ كەرەگىن بىلمەيمىز. بۇل ىسپەن قۇزىرلى ورگاندار اينالىسۋعا ءتيىس.
دارىگەرلەر اينانىكىندەي جاراقات العان بالالاردى كورگەندە بىردەن پوليسياعا حابارلاسۋى قاجەت ەدى.
پوليسيا قىلمىستىق ءىس قوزعاپ، قىلمىسكەردى تابادى.
پروكۋراتۋرا بالانىڭ قۇقىعىن قورعالۋىن باقىلايدى.
سوت كۇدىكتىنىڭ كىنالى نەمەسە كىنالى ەمەس ەكەنىن انىقتاپ، جازا تاعايىندايدى.
ءبىراق مۇنىڭ ءبىرى دە بولمادى. تەرگەۋشىنىڭ ەسىمى – توفيك. مۇمكىن ءدال وسى تەرگەۋشى ابايداعى بالاعا قاتىستى ءىستى جۇرگىزگەن شىعار.
قىزعا قاتىستى ىستە ەشقانداي شۋ بولماعاندىقتان، اباي اۋىلىنىڭ 7 جاستاعى تۇرعىنىنا دا نەمقۇرايلى قاراعان شىعار؟ مۇمكىن تەك بۇل بالالارعا عانا قاتىستى ەمەس شىعار.
وسى جازبانى جازىپ وتىرعان ۋاقىتتا قۇرمانعازى مۋسىردەن قىزعا بايلانىستى ءىستى جۇرگىزگەن تەرگەۋشى مەن الگى توفيكتىڭ نومەرى بىردەي دەگەن اقپارات كەلدى"، دەپ جازدى ارۋجان ساين.
