تالعار اۋدانىنداعى قىزىلقايرات اۋىلىنىڭ تۇرعىندارى 10 جىلدان بەرى مي باتپاقتان كوز اشپاي وتىر. قىستىڭ سۋىعى قايتىپ، كوكتەمنىڭ كەلگەنىنە اۋىل تۇرعىندارى قۋانبايدى. سەبەبى قار ەرىپ، لاي باسقان كوشەلەر حالىقتى ابدەن مەزى ەتكەن. اشىنعان جۇرت Qamshy.kz اقپارات اگەنتتىگىنىڭ پوشتاسىنا حات جولداپ، كومەك سۇراپتى.

قىزىلقايرات اۋىلىنىڭ ماڭىنداعى نەبارى التى كوشەدەن تۇراتىن اۋداندى ون جىلدان بەرى حالىق «كەلەشەك اۋىلى» دەپ اتاپ كەتكەن. التى كوشەنىڭ بىرەۋىنە عانا اسفالت توسەلىپتى. ونىڭ ءوزىن باسقا كوشەلەردىڭ بالشىعىن باسقان ادامدار مەن كولىكتەر ارى-بەرى جۇرگەن سايىن لاستاپ كەتەدى.

«الىپ شاھار الماتىنىڭ ىرگەسىندە ورنالاسقانىمەن، اۋدان اكىمدىگى كوز قىرىن دا سالمايدى»، - دەگەن اۋىل تۇرعىندارى قاپالى. تۇرعىندار كوشەدەگى شۇڭقىردى وزدەرى جاماپ، تاسپەن تەگىستەپ تۇرادى. الايدا جاڭبىر جاۋعان سايىن بەتى لايلانىپ، قايتادان باتپاققا اينالادى.

«كوشەدە ادام تۇگىل كولىك جۇرە المايدى. جىل سايىنعى ەسەپتىك كەزدەسۋلەردە تالقىلايتىن ماسەلەمىز – وسى. «انە سالامىز، مىنە سالامىز» دەگەن اكىمنىڭ سوزىنە سەنبەيتىن بولدىق. ەندىگى ءۇمىت وزدەرىڭىزدە!»، - دەپ جازىپتى اۋىل تۇرعىندارىنىڭ ءبىرى.

الماتى ماڭىنداعى اۋىلداردىڭ ماسەلەسى قاشان شەشىلەدى؟

Qamshy.kz اقپارات اگەنتتىگىنىڭ ءتىلشىسى الاتاۋ اۋىلدىق وكرۋگىنىڭ اكىمى قۋاتبەك سماعۇلوۆپەن سويلەستى. اكىمنىڭ ايتۋىنشا، وسى ۋاقىتقا دەيىن سۋ قۇبىرى جۇرگىزىلگەندىكتەن، اسفالت سالۋ كەلەسى كەزەككە جوسپارلانعان. ال حالىق بەكەر داۋرىعىپ وتىر.

«2016 جىلى «نۇرلى جول» باعدارلاماسى بويىنشا 517 ملن تەڭگە ءبولىندى. ول قاراجات بىلتىر قاراشادا ءبىتتى. ول اقشاعا اۋىلدىڭ ىشىندە ءبىز سۋ قۇبىرىن جۇرگىزدىك. بىلتىردان بەرى اۋىل تۇرعىندارى العىسىن ايتىپ، تازا cۋ ءىشىپ وتىر.  بۇرىندارى حالىق تاۋدىڭ باسىنداعى سۋدى بۇرىپ اكەلىپ ىشەتىن. ءقازىر، قۇدايعا شۇكىر، سۋدان تاپشىلىق كورىپ وتىرعان جوق. 2016-2017 جىلدارى باستالعان جۇمىس بارىسىندا كوشەنىڭ ءبارىن قوپارىپ، سۋ قۇبىرىن جۇرگىزدىك»، - دەدى اكىم.

سماعۇلوۆتىڭ سوزىنشە، اۋىلدى دامىتۋ، كوركەيتۋ بويىنشا جوسپار كوپ.

«ۇكىمەتتەن اقشا سۇراتتىق، ءوتىنىش جازدىق ەندى تەك جاۋاپ كۇتىپ وتىرمىز. ءقازىر گاز تارتىلىپ جاتىر. ءبارى بىتكەن سوڭ ەندىگى جوسپارىمىز اسفالت بولماق. ءبىر اۋىلدىڭ ىشىندە 80-90 كوشە بار، بيىل قىزىلقايراتتىڭ سەگىز كوشەسىنە، ودان وزگە دە اۋىلداردا 2-3 كوشەگە اسفالت سالۋ جوسپارى تۇر. وتىنىشىمىزگە جاۋاپ كەلسە، 2019 جىلى باستاپ كەتەمىز. جالپى، جوبامىز دايىن، جوسپارىمىز جاقسى»، - دەدى اكىم.

قۋاتبەك سماعۇلوۆ حالىقتان ءسال شىداۋىن ءوتىندى. سەبەبى سۋ تارتىلماي جاتىپ كوشەگە اسفالت سالىنسا، سۋ قۇبىرىن تارتۋ ءۇشىن كوشەنى قايتا قوپارۋعا تۋرا كەلەدى. ال بۇل حالىق ءۇشىن دە، ۇكىمەت ءۇشىن دە ءتيىمسىز. ونىڭ ۇستىنە، الاتاۋ اۋىلدىق وكرۋگىنە ءبىر عانا قىزىلقايرات ەمەس، 10 اۋىل قارايدى. اكىمنىڭ ايتۋىنشا، ءبارىنىڭ جاعدايىن جاساۋ ءۇشىن دە ۋاقىت كەرەك. ول الداعى بەس جىل كولەمىندە بار ماسەلە وڭىنان شەشىلەدى دەپ سەندىردى.

ايتا كەتەيىك، ەلباسى شاعىن جانە ورتا بيزنەس ءۇشىن نەسيە كولەمىن 20 ميلليارد تەڭگەگە ارتتىرۋ تۋرالى  باستاما كوتەرگەن. باستى مەجەدە اۋىل شارۋاشىلىعىن دامىتۋ ماسەلەسى تۇر. وسى رەتتە ۇكىمەت باسشىسى باقىتجان ساعىنتايەۆ ەڭبەك جانە حالىقتى الەۋمەتتىك قورعاۋ، ۇلتتىق ەكونوميكا، اۋىل شارۋاشىلىعى، قارجى مينيسترلىكتەرىنە جانە «اتامەكەن» ۇلتتىق كاسىپكەرلەر پالاتاسىنا: ءبىرىنشى، اعىمداعى جىلعا رەسپۋبليكالىق بيۋدجەتتى ناقتىلاۋ كەزىندە قوسىمشا 20 ميلليارد تەڭگە ءبولۋدى ەسكەرۋدى؛ ەكىنشى، اسىرەسە، اۋىلدىق جەرلەردە شاعىن نەسيە بەرۋ ءۇشىن قاراجاتتى ودان ءارى ءبولۋ بويىنشا ۇسىنىستار ەنگىزۋدى تاپسىرعان.

ياعني اۋىلدى كوركەيتۋگە بيلىك باسا نازار اۋداردى. بۇل باستامادان ناتيجە شىقسا، حالىق جۇمىس ىزدەپ قالاعا سابىلماي، گۇلدەنگەن اۋىلدا شارۋاسىن دوڭگەلەتىپ وتىرار ما ەدى؟!