«زيمنيايا ۆيشنيا» ويىن-ساۋدا ورتالىعىنداعى ءورت بارىسىندا نەمقۇرايلىلىعى ءۇشىن ءورت سوندىرۋشىلەر ءبولىمىنىڭ كومانديرىنە قاتىستى قىلمىستىق ءىس قوزعالدى. بۇل تۋرالى رەسەي تەرگەۋ كوميتەتىنىڭ رەسمي وكىلى سۆەتلانا پەترەنكو حابارلاعان.

ۆەدومستۆودا كورسەتىلگەندەي، №2 ءورت ءسوندىرۋ ءبولىمى قاراۋىلىنىڭ باستىعى سەرگەي گەنين تۇتانىپ جاتقان عيماراتقا باتىس جاقتاعى كىرە بەرىس ارقىلى كىرگەن.

ساۋدا ورتالىعىندا بولعانداردىڭ ءبىرى وعان ءتورتىنشى قاباتتاعى ادامى كوپ №2 كينوزالدى نۇسقاپ، كينوتەاترعا قاراي وتەتىن قىسقا جولدى دا كورسەتتى

«گەنين بۇل اقپاراتقا كوڭىل اۋدارمادى. باسقا جولمەن كەتتى. ءسويتىپ ۋاقىت جوعالتىپ العا.. ونىڭ نەمقۇرايلى ارەكەتىنىڭ كەسىرىنەن ءتورتىنشى قاباتتاعى كينوزالدا بولعان 37 ادام مەرت بولدى»، - دەلىنگەن تەرگەۋ كوميتەتىنىڭ اقپاراتىندا.

سەرگەي گەنيندى ىزدەستىرۋ شارالارى ءجۇرىپ جاتىر. الداعى ۋاقىتتا ول ۇستالىپ، تەرگەلەتىن بولادى.

ەسكە سالا كەتەيىك، 2018 جىلدىڭ 25 ناۋرىزىندا ويىن-ساۋدا ورتالىعىندا ءورت بولىپ، سونىڭ سالدارىنان 64 ادام اجال قۇشتى. ونىڭ 41ء-ى بالالار.