وعىز دوعان Qazkom بانكى قىزمەتكەرلەرىنىڭ كەشىرىم سۇراعانىن كۇتىپ ءجۇر، دەپ جازادى Qamshy.kz اقپارات اگەنتتىگى. ول ءالى بانكتى سوتقا بەرمەگەن.

– بۇل – كەشە عانا بولعان وقيعا. ءقازىر ءبىز بانكتىڭ تۇتىنۋشىلارمەن جۇمىس ىستەيتىن بولىمىنە حابارلاسىپ جاتىرمىز. ەگەر ولار قازاق حالقىنان، مەنەن كەشىرىم سۇرايتىن بولسا،  ارينە، سوتقا بەرمەيمىز. Air Astana وقيعاسىندا دا سولاي بولعان. الايدا بانك قىزمەتكەرلەرى Air Astana سەكىلدى كەشىرىم سۇراۋدان باس تارتاتىن بولسا، وندا سوتقا جۇگىنۋگە ءماجبۇر بولامىز، – دەيدى وعىز دوعان.

ول بانكتىڭ كەشىرىم سۇراۋىن قانشا ۋاقىت كۇتەتىنىن كەسىپ ايتا المادى.

– مەن ولارمەن ءالى سويلەسپەدىم. تەلەفون سوعىپ شاعىمدانعان ازاماتتارعا بانك وكىلدەرى: «بۇل ءىس قارالىپ جاتىر»، – دەگەن كورىنەدى. بۇگىن ءوزىم دە حابارلاسامىن. جاعدايعا قاراپ، سوتقا بەرۋ-بەرمەۋ تۋرالى شەشىم شىعارامىز. ءبىراق ولار كەشىرىم سۇرايدى دەپ ۇمىتتەنەمىن، – دەدى وعىز دوعان.

ەل اراسىندا وعىز دوعانعا قاتىستى ەكى ءتۇرلى پىكىر بار. باسىم كوپشىلىك ونى ءتىل كۇرەسكەرى دەپ قۇرمەتتەسە، كەيبىرى ونى قازاق ءتىلىنىڭ اتىن جامىلىپ، ارزان پيار قۋالاپ ءجۇر دەپ سانايدى.

– مەنى پيار جاساپ ءجۇر دەيتىن ادامداردىڭ سانى از. مەن قازاق ءتىلىنىڭ مامانىمىن. مەنىڭ «قازاق ءتىلىنىڭ گرامماتيكاسى» اتتى ەڭبەگىم بار. ول – قازاق ءتىل ءبىلىمى سالاسىنداعى تۇركيادا جاريالانعان العاشقى ءھام جالعىز كىتاپ. عىلىم جولىندا جۇرگەن بىزدەي ادامعا پياردىڭ ەشقانداي قاجەتى جوق، - دەدى دوعان.

قازاق ءتىلىنىڭ مارتەبەسى ءۇشىن شيرەك عاسىردان استام ۋاقىت جۇمىس ىستەپ جۇرگەنىن ايتقان وعىز دوعان بۇگىندە كۇرەس ءتاسىلىن وزگەرتكەنىن ايتادى.

– مەن جاڭا تەحنولوگيانى قولدانىپ كۇرەسە باستادىم. بار ايىرماشىلىق – وسى.  ءقازىر كەز كەلگەن ادامنىڭ قولىندا ۇيالى تەلەفون بار. وسى مۇمكىندىكتى ءتىلىمىزدىڭ ابىرويىن قورعاۋ جولىندا پايدالانىپ جاتىرمىن. سىزدەر دە بىلەتىن شىعارسىزدار، قازاق ءتىلى تەك مەنىڭ كوزىمشە عانا ەمەس، باسقا دا ازاماتتاردىڭ الدىندا قورلانىپ، تاپتالىپ جاتىر، – دەدى ول.

ايتا كەتەيىك، وعىز دوعان قىرعىزستاندا دا ءتىل ماسەلەسىن كوتەرگەن بولاتىن. بۇل جونىندە ول ءوز ۇستانىمىن ناقتى ءبىلدىردى.

– بۇل اقپارات – راس. قىرعىز ءتىلى دە – ءبىزدىڭ ءتىلىمىز. قازاق ءتىلى عانا ەمەس، تۇركى تىلدەرىنىڭ ءارقايسىسى ءبىزدىڭ انا ءتىلىمىز دەپ ەسەپتەيمىن. تۇركى تىلدەرىنىڭ قاي-قايسىسى تاپتالىپ جاتسا دا، مەن قولىمنان كەلگەن كومەكتى ايامايمىن. ەرتەڭ وزبەكستاندا دا وسىعان ۇقساس جايت بولسا، تاتارستاندا تاتار ءتىلى قورلاناتىن بولسا، جاردەم جاساۋعا دايىنمىن، – دەدى وعىز دوعان.

تۇركيالىق باق-تاردا وعىز دوعاننىڭ ستۋدەنت قىزدى زورلاماق بولدى دەگەن ايىپپەن جاۋاپقا تارتىلعانى جاريالانعان بولاتىن. سول تۋرالى سۇراعىمىزعا:

– بۇل – وتىرىك، جالا. بۇل اقپاراتتى جاريالاعان مەكەمەنى سوتقا بەرگەنبىز. وسى ماسەلەنى قوزعايتىن ازاماتتاردى زاڭدى تۇردە سوتقا بەرەتىن بولامىز. بۇل تۋرالى باسقا ايتارىم جوق. وسىنداي اقپارات تاراسا دا، بۇل جالعان اقپارات بولعاننان كەيىن قوعامدىق ماسەلەگە ارالاسا بەرەمىن. بۇعان ەشقانداي كەدەرگى جوق، – دەپ جاۋاپ بەردى وعىز دوعان.