Qazkom-داعى داۋعا بايلانىستى وعىز دوعان ءتيىستى قۇجاتتاردى جيناپ، ونى ساۋاتتى دايىنداسا، سوتتا جەڭىپ شىعۋى بەك مۇمكىن. بۇل تۋرالى Qamshy.kz اقپارات اگەنتتىگىنە زاڭگەر، ادۆوكات ابزال قۇسپان ايتتى.

– ەگەر قازاقستان اۋماعىندا مەملەكەتتىك تىلدە قىزمەت الا الماي، سول ءۇشىن سوتتاسساڭىز، ول ىستە 100 پايىز جەڭىپ شىعاسىز. «تۇتىنۋشىلار قۇقىعى» دەيتىن امبەباپ زاڭ بار ءارى ول سوعان كەپىلدىك بەرىپ وتىر. وسى زاڭدا: «قازاقستاندا كەز كەلگەن قىزمەت كورسەتۋشى مەملەكەتتىك تىلدە قىزمەت كورسەتۋگە مىندەتتى»، – دەلىنگەن. مۇنى باسشىلىققا الساڭىز، قازاق تىلىندە قىزمەت كورسەتپەگەن كەز كەلگەن مەكەمەنى سوتقا بەرىپ، جەڭىپ شىعاسىز»، – دەدى ابزال قۇسپان.

ايتا كەتەيىك، وعىز دوعان وزىنە قازاق تىلىندە قىزمەت كورسەتۋدەن باس تارتقان Qazkom بانك بولىمشەسىنەن كەشىرىم سۇراۋىن تالاپ ەتكەن. سۇراماعان جاعدايدا، سوتتاساتىنىن مالىمدەدى.

قازاقستاننىڭ مەملەكەتتىك ءتىلى ءۇشىن كۇرەسىپ جۇرگەن تۇرىك ازاماتى بىلتىر Air Astana كومپانياسىمەن سوتتاسىپ، ناتيجەسىندە جەڭىسكە جەتكەن. Air Astana كومپانياسى بورتسەرىگىنىڭ قازاق ءتىلىن بىلمەگەنىنە نارازالىعىن ءبىلدىرىپ، قازاق تىلىندە قىزمەت كورسەتۋىن تالاپ ەتكەن وعىز دوعان اتالمىش كومپانيادان ءوز كىناسىن مويىنداپ كەشىرىم سۇراۋىن جانە مورالدىق شىعىن رەتىندە 1 تەڭگە بەرۋىن تالاپ ەتكەن. Air Astana وكىلى كەشىرىم سۇراۋدان باس تارتىپ، وعىز دوعاندى ۇلت ارازدىقتى قوزدىردى دەپ ايىپتادى. الايدا تۇرىك ازاماتىنىڭ قۇقىعىن قورعاعان زاڭگەر ابزال قۇسپاننىڭ جانە بىرنەشە بەلسەندىنىڭ ارالاسۋىمەن وعىز دوعان جەڭىپ، Air Astana كومپانياسىنىڭ بورتسەرىكتەرى جاپپاي قازاق ءتىلىن ۇيرەنۋگە مىندەتتەلدى.

سونىمەن قاتار ابزال قۇسپان ۋاقىتى تىعىز بولعاندىقتان Qazkom-داعى داۋعا بايلانىستى وعىز دوعانعا ادۆوكات بولمايتىنىن ايتتى.