اعامنىڭ جالدامالى پاتەرىنە ءجيى بارىپ تۇرامىن. جەڭگەي ەكەۋى جۇمىستا. ءۇش بالاسىنا باس-كوز كەرەك. ولار تۇرىپ جاتقان اۋدان - قالانىڭ ەسكى اۋماعى. كوپقاباتتى ءۇي - كەڭەس زامانىنان قالعان باسقالقا. سول «حرۋششيەۆكاعا» قاراما-قارسى جۇرت «مالوسەمەيكا» اتايتىن جاتاقحانا تيپتەس عيمارات تۇر. سوندا بارعان سايىن ءبىر كورىنىس الدىمنان شىعادى: قارسى بەتتەگى ءۇيدىڭ ءۇشىنشى قاباتىنداعى تەرەزە الدىندا 4-5 جاسار قىز بالانىڭ قالقايىپ وتىرعانى. قاشان كورسەم سولاي. كەيدە قىز اينەكتەن سىرتقا ءۇڭىلىپ تۇرادى؛ كەيدە قۋىرشاعىمەن وينايدى؛ كەيدە سۋرەت سالادى؛ كەيدە سول تەرەزەنىڭ پودوكوننيگىندە بۇك ءتۇسىپ جاتادى. ۇستىنە قىزىل كورپەشە جامىلعانىن بايقايمىن. ءبۇلدىرشىننىڭ تۇراعى - تەرەزە الدىنداعى تابانشا تاقتايدىڭ ەرنەۋى. ال اعاش جيەكتى تەرەزە – كونەنىڭ كوزى.
كۇرەڭ پەردە ءتۇسىرۋلى – كىشكەنتاي قىز ءوز الەمىندە. سىرتتاعى ادامعا پەردەنىڭ بەرگى جاعىنداعى قىزدىڭ قۇپيا مەكەنى - قۋىرشاقتار تەاترىنىڭ ساحناسى ىسپەتتى. ءبىراق، قىز تاعدىرى – قۋىرشاق ەمەس. ول وزىنە سونداي شاعىن الەم جاساپ العانداي... ونى سونشالىق شاعىن الەمگە ەنگىزىپ جىبەرگەندەي. قوڭىر قونجىعىن قونجيتىپ قويىپ، اڭگىمەلەسكەنىن بالكونعا شىعىپ تىڭدايمىن. اشىق جەلدەتكىشتەن جىڭىشكە ءۇنى ەستىلەدى:
- بالپاعىم، مەن وسكەنشە، ەكەۋىمىز تەرەزەنىڭ الدىندا ۇيىقتايمىز. ايتپەسە، ءبارىمىز توسەككە سىيمايمىز عوي. سوسىن اكەم، ۇلكەن ءۇي ساتىپ الادى، سوسىن مەنىڭ ۇلكووون بولمەم بولادى. سوسىن سەنى ءوز توسەگىمە الىپ جاتام.
كەنەت جابىق تۇرعان پەردە ىسىرىلىپ، ار جاعىنان بالا كوتەرگەن ايەل شىقتى.
- قىزعالداق، جۇرە عوي، ءشايىڭدى ءىش.
بالكون ءتورتىنشى قاباتتا بولعاندىقتان، ءبارى الاقانداعىداي كورىنەدى. ءۇي-جايلارى ۋىسىما سىيعانداي-اق ەكەن. ءبىر بولمەدە: كەرەۋەت، شكاف، ۇستەل. ۇستەل باسىندا تاعى ەكى ادام وتىر... تەرەزەنىڭ تۇسىنان قوڭىر جەل كۇرسىندى. پاتەردەن پياز سالىپ قۋىرعان كارتوپ پەن جورگەكتىڭ ءيىسى اڭقىدى.
ال كورشى اينەكتىڭ الدى قاپتاعان گۇل. ولاردى ورىس كەمپىر سۋعارىپ، باپتاپ ءجۇر. كەيبىرىنىڭ ءتۇبىن قوپسىتىپ، تامىر جايعاندارىن ۇلكەنىرەك گۇلساۋىتقا وتىرعىزىپ الەك.
تەرەزەنىڭ الدىندا جايقالعان گۇلدەرمەن قاتار كۇن كوزىنە تالاسا تالپىنىپ قىزعالداق قىز جەلكىلدەپ ءوسىپ كەلەدى.
سان تەرەزە – سان تاعدىر.
ايبەك ورالحان
