ۇستاز دەگەن ۇعىمنىڭ قاسيەتىن قانشا سوزبەن ارلەسەڭ دە جەتكىزە الماسىڭ انىق. تەك بۇل ەسىمدى الداعى جەتىستىكتەرىڭمەن عانا ۇلىقتاي الاسىڭ دەگەنگە كەلىسەمىن. ءقازىر كىشكەنتاي عانا قيىردا مەكەن تەپكەن كۇنشالعان اۋىلىنا قاراستى مەكتەپتە قازاق ءتىلى مەن ادەبيەت ءپانى ءمۇعالىمى ءسادۋاقاسوۆا گۇلبارشىن اناس قىزى تۋرالى قالام تارتپاقپىن. ارينە كەز كەلگەن اۋىلدى مەكەندەگى وقۋشىلار، تابيعاتى اسەر ەتكەننەن بە، ايتەۋىر، ادەبيەت، قازاق ءتىلى سەكىلدى گۋمانيتارلىق پاندەرگە يكەمدى كەلەدى عوي. تەك دۇرىس جول كورسەتسەڭ بولعانى، ال وسى باعىتتا ءجوندى باعدار بەرەتىن ول ۇستاز. پەداگوگ دەگەنىمىز جاڭا ۇرپاققا عاسىرلار بويى جيناقتالعان بارلىق باعالى دۇنيەلەردى بەرىپ، جالعان سەنىمدەردى، كىناراتتار مەن كەسەلدەردى بەرمەۋگە ءتيىستى ادام. ءدال قازىرگى ءسات سانامنان سارقىپ شىققان ويلار، ءبىر ارناعا توعىسار ەمەس، ويتكەنى ايتقىم كەلەتىن جايت وتە كوپ. مەنىڭ قازىرگى شابۋىما سەبەپشى بولعان دا وسى تۇلعا بولعاندىقتان، ايتارىمدى قاعازعا سىيدىرا المايمىن با دەپ ءزارازاپ بولىپ وتىرعان كەيپىم وسى.
توپىرلاپ قالماقتارداي ايعاي شۋمەن جۇرەتىن ءبىزدىڭ سىنىپ بۇل اپايدىڭ ساباعىنا كىرگەندە مولداعا ۇيىعان جاماعاتتاي ءۇنسىز قالاتىنبىز. ول ۇستازدىڭ وراتورلىق قابىلەتىنىڭ جوعارعى شەگى دەپ پايىمدادىم. سول كىسى ارقىلى قازاقتىڭ اقىن جازۋشىلارىن تانىدىق. بۇل – اسا ماڭىزدىسى. اپاي ەشقاشان اقىن جازۋشىلاردى ءبولىپ جارمايتىن، ولارعا دەگەن قۇرمەتى ەرەكشە بولاتىن. ءوزىنىڭ ماماندىعىن ەرەكشە قۇرمەتتەيتىن، بۇل ءوزىن دە ەرەكشە قۇرمەتتەيدى دەگەن ءسوز.
ءقازىر ەكى ءسوزدىڭ باسىن قۇراپ ماقالا شيماقتاپ وتىرعانىمنىڭ ءوزى سول ادامنىڭ ارقاسى. ۇلاعاتتى ۇستاز ومىرگە باسقاشا كوزقاراسپەن قاراۋدى ۇيرەتتى. مەكتەپ وقۋشىسى رەتىندە ەمەس، ءار بالاعا تۇلعا رەتىندە قاراپ، ادام بولسىن دەگەن تىلەگى بولدى. بۇل ناعىز پەداگوگتىڭ ۇستانىمى دەپ توپشىلادىم. بايگەگە جاراتقان جىلقىداي بىزگە بار بىلگەنىن ۇيرەتىپ ءتۇرلى كىل جۇيرىكتەردىڭ دودالارىنا قوساتىن. ال بايگە اتتارىنىڭ اراسىنا تۇسكەن بولدىرما اتتىڭ ءوزى نامىسقا تىرىسىپ شاۋىپ كەتەتىنى بەلگىلى عوي. گۇلبارشىن اناس قىزى ءدال ءوزىم جەتىستىككە جەتەر جولدا ەشقاشان بەرىلمەۋدى ۇيرەتتى. تالاي جارىستاردا وماقاسىپ تۇسكەن كەزدەرىم، جۇلدەلى بولعان كۇندەرىم دە بولدى. سول ساتتە قولداۋ ءبىلدىرىپ كىشكەنتاي وقۋشىنىڭ بەتىن قاقپاي، بەلىن بۋىپ جىگەر بەرگەن بۇل ۇستازعا دەگەن شاكىرتتىك العىسىم شەكسىز.
ايتا بەرسەڭ كوپ ەندى. ءبىر ءتىلىم ۇشىندا تۇرعان جايت. جەردەن تاياق جەپ جۇرگەن كىشكەنتاي بالاعا قازاقتىڭ دانا تۇلعاسى ابايدىڭ قانشاما ولەڭدەرىن جاتتاتقانى نە دەگەن ەرلىك دەرسىڭ. جىل سايىن بار جاتتاعان ولەڭدەردى جيناقتاپ اۋدان ورتالىعىنا ساۋداعا شىققان انا مەن بالاداي باراتىنبىز. سونداعى تاۋارىمىز ۇستازدىڭ ۇيرەتكەن ءبىلىمى مەن جەڭىسكە دەگەن سەنىمى. بالا كەزدەن ۇلكەن جارىستا توپقا تۇسكەن جەتكىنشەك، ومىرىندە دە سول قىلىقتى ادەتكە اينالدىرادى ەكەن. دارىندى دەپ دارالاپ، بەلگىلى ءبىر كەسكىننەن شىعارىپ، ومىردەن ءوز جولىمدى تابۋعا دانەكەر بولدى. مىنە، مەن ءۇشىن ناعىز ءمۇعالىمنىڭ مىندەتى – وسى.
ءقازىر ەلباسى باستاۋىن اشقان باعدارلامالار وتە كوپ. ونىڭ ىشىندە مۇعالىمدەردىڭ مارتەبەسىن كوتەرۋ تۋرالى كوپتەگەن باستاما كوتەرىلگەنى بەلگىلى. وسى ورايدا ۇستاز دەگەن تۇلعانىڭ ءار تامشى ماڭداي تەرى ۇلىقتالاتىنى، ەشقاشان ۇمىتىلمايتىنىنىڭ دالەلى.
ال ماعان دەيىن، مەنەن كەيىن دە قانشاما وقۋشىعا قازاق ءتىلى، ادەبيەت ءپانىن ۇيرەتىپ، ءبىلىم نارىمەن سۋسىنداتقان ءسادۋاقاسوۆا گۇلبارشىن اناسقىزىنا ايتارىم: بۇگىندە ەكى بالانىڭ اناسى، اياۋلى اجە اتانعان ۇستازىمىزعا الداعى ومىرىڭىزدە شاكىرتتەرىڭىزدىڭ باعىندىرعان بەلەستەرىمەن شاتتانىپ، جۇمىسىڭىزدا تولاعاي تابىسقا جەتىڭىز. دەنساۋلىعىڭىز مىقتى بولىپ، قازاقستاننىڭ ۇزدىك ۇستازى بولىڭىز. ءسىز بۇعان ابدەن لايىقتىسىز!
ۋاتحان قابىلتاي ۇلى
