قازاقستاننىڭ سىرتقى ىستەر ءمينيسترى قايرات ءابدىراحمانوۆ قىتايدا ۇستالعان 12 قازاقستاندىقتىڭ توعىزى بوساتىلعانىن مالىمدەدى.
ءمينيستردىڭ ايتۋىنشا، قوس ازاماتتىق العان ەتنيكالىق قازاقتاردىڭ ماسەلەسى ۇكىمەتتىڭ باستى نازارىندا.
«ءبىز كۇن سايىن بۇل ماسەلە بويىنشا جۇمىس جۇرگىزەمىز. Cاۋىردە دەلەگاتتارىمىز قىتايعا ەكى رەت ساپارلاپ بارىپ، وسى ماسەلەنى تالقىلادى. سونىڭ ىشىندە قىتايدا ۇستالعان 12 قازاقستان ازاماتىنىڭ ماسەلەسى قوزعالدى. جۇڭگو تاراپى قحر ازاماتتىعىنان شىعۋ پروسەدۋراسىن دۇرىس راسىمدەمەگەن. كەلىسسوزدەردىڭ قورىتىندىسى بويىنشا 12 ادامنىڭ توعىزى بوساتىلدى. قالعان ءۇش ازامات بويىنشا جان-جاقتى جۇمىس جۇرگىزىلىپ جاتىر»، - دەدى مينيستر ۇكىمەت وتىرىسىنىڭ ۇزىلىسىندە.
سونىمەن قاتار ءابدىراحمانوۆ مينيسترلىككە جۇگىنگەن قىتايدا ۇستالعان قازاقستاندىقتاردىڭ تاعدىرىنا بەيجاي قارامايتىنىن جەتكىزدى. بۇگىندە سىرتقى ىستەر مينيسترلىگىندە قيىندىققا تاپ بولعان 170-تەي ەتنيكالىق قازاق تۋرالى اقپارات بار.
بىلتىردان بەرى قىتايداعى ەتنيكالىق قازاقتاردىڭ جاپپاي قىسىمعا ۇشىراعانى جايلى اقپارات دۇركىن-دۇركىن جاريالانىپ جاتىر. بىرنەشە اي بۇرىن Qamshy.kz اقپارات اگەنتتىگى وسى ماسەلەگە قاتىستى ق ر سىرتقى ىستەر ءمينيسترى ءابدىراحمانوۆقا بىرنەشە ساۋال جولداعان ەدى.
ال مينيسترلىك كەلىپ تۇسكەن شاعىمدارعا بايلانىستى جۇڭگو سىرتقى ىستەر مينيسترلىگىنە جۇڭگو اۋماعىندا قاماۋعا الىنعان قازاقستان ازاماتتارى جايلى ءتيىستى نوتالاردى جولداي وتىرىپ، ق ر ازاماتتارىنا كونسۋلدىق-قۇقىقتىق كومەك كورسەتىپ جاتقانىن ايتقان.
جۋىردا عانا Qamshy.kz اقپارات اگەنتتىگى قازاقستانداعى وتباسىنا جەتۋ ءۇشىن شەكارانى امالسىزدان زاڭسىز كەسىپ وتكەن سايراگۇل ساۋىتبايدىڭ ماسەلەسىنە قاتىستى ق ر ۇقك شەكارا قىزمەتىنە ساۋال جولدادى.
جالپى، قىتايدا ۇستالعان ەتنيكالىق قازاقتاردىڭ ماسەلەسى وسى ۋاقىتقا دەيىن باسەڭسىمەسە ۋشىعىپ تۇردى. بىرنەشە رەت باس قوسىپ، بۇل ماسەلەنى تالاي تالقىلاعان قوعام بەلسەندىلەرىنىڭ بار ءۇمىتى بيلىكتە بولدى. ەلىمىزدىڭ قۇزىرلى ورگاندارى شەكارانىڭ ەكى جاعىندا قالعان قازاقتاردىڭ جانايقايىنا قۇلاق اسىپ، ماسەلەلەردى شەشەدى دەپ ۇمىتتەندى. ق ر سىرتقى ىستەر مينيسترلىگىنىڭ ارالاسۋىمەن وڭىنان شەشىلە باستاعان بۇل كۇردەلى ماسەلەنىڭ كۇرمەۋى تاياۋ ارادا شەشىلەدى دەگەن سەنىمدەمىز.
