قىرعىزستاندا 20 جاستاعى بۋرۋلاي تۋردالى قىزىنىڭ ولىمىنە بايلانىستى تەرگەۋ جۇمىستارى اياقتالدى.

قىرعىزستان ىشكى ىستەر ءمينيسترىنىڭ بۇيرىعىمەن شۋ وبلىسى ىشكى ىستەر باس باسقارماسىنىڭ باسشىسى نۇرلان سارچايەۆ، ونىڭ ەكى ورىنباسارى جانە جايىل اۋداندىق ىشكى ىستەر ءبولىمىنىڭ باسشىسى قىزمەتتەرىنەن بوستالدى.

جايىل ىشكى ىستەر ءبولىمىنىڭ تەرگەۋشىسى دە قىز الىپ قاشۋ جونىندە تۇسكەن ارىزدى دەر كەزىندە قاراماعاندىقتان، "قىرعىز ميليسياسى قىزمەتكەرلەرىنىڭ ابىرويىن ءتۇسىردى" دەگەن ايىپپەن جۇمىسىنان بوساتىلعان.

قىزمەتتىك تەرگەۋ بويىنشا ىشكى ىستەر ورگاندارىنىڭ جالپى 23 قىزمەتكەرى جازاعا تارتىلعان.

قىزمەتتىك تەرگەۋدىڭ قورىتىندىسى پروكۋراتۋراعا جىبەرىلگەن. جايىل اۋدانى پروكۋراتۋراسى ميليسيا قىزمەتكەرلەرىنە قاتىستى قىلمىستىق كودەكستىڭ 316-بابى ("نەمقۇرايلىلىق") بويىنشا ءىس قوزعاعان.

27 مامىردا شۋ وبلىسى جايىل ىشكى ىستەر ءبولىمى عيماراتىندا 20 جاستاعى بۋرۋلاي تۋرداالى قىزى قازا تاپتى. ميليسيا بولىمىندە ونى الىپ قاشقان جىگىت پىشاقتاپ ولتىرگەن، كەيىن ءوزىن دە جارالاعان. ءقازىر جىگىت اۋرۋحانادا جاتىر.

قىرعىزستان پرەزيدەنتى سوورونباي جەەنبەكوۆ پرەمەر-مينيستر مۇحاممەدكالىي ابىلعازييەۆپەن كەزدەسۋىندە ميليسيا بولىمىندە مەرت بولعان بۋرۋلاي تۋرداالى قىزىنىڭ ولىمىنە جول بەرگەندەردى اياۋسىز جازالاۋدى تالاپ ەتكەن.