"سوندا رەسەي انشىلەرىن شاقىرماۋ كەرەك پە؟" – دەپ سۇرادى مەنەن استانا قالاسى اكىمىنىڭ ورىنباسارى ەرمەك امانشايەۆ اعامىز. "شاقىرۋدىڭ رەتى بولادى، شاقىرىڭىزدار، ءبىراق مەملەكەتتىك مەرەكەمىزدە ءوز انشىلەرىمىز تۇرعاندا، وزگە ەلدىڭ انشىلەرىن لەك-لەگىمەن الدىرىپ، التى ساعاتتىق كونسەرت بەرۋ ارتىق"، - دەپ جاۋاپ بەردىم.
ەندى اڭگىمە قاي جەردە، نەدەن باستالدى، نە تۋرالى بولدى، سوعان توقتالسام. ازىرەت سۇلتان مەشىتىندە استانا اكىمى اسەت ورەنتاي ۇلىنىڭ اتىنان بەرىلگەن اۋىزاشاردان شىعىپ تۇرعان ءساتىمىز ەدى. تەاتر اكتەرى نۇركەن وتەۋىل استانا اكىمىنىڭ ورىنباسارى ەرمەك امىرحانۇلىمەن سويلەسىپ كەلە جاتىر ەكەن. جانىمىزدا ايتىسكەر اقىن سەرىكزات دۇيسەنعازى، اقىن باۋىرجان قاراعىز ۇلى، تاعى بىرنەشە جىگىت تۇرعان. اڭگىمەگە مەن دە ارالاسىپ، ەرمەك اعامىزعا استانا اكىمدىگىنىڭ مادەنيەت باعىتىنداعى بىرنەشە جۇمىسىنا كوڭىلىم تولمايتىنىن، ۇنەمى رەسەيگە ەلىكتەپ، سولاردان ءانشى شاقىراتىنىن، ولارعا بيۋدجەتتەن قانشا قارجى شىعىندالاتىنىن ەلدىڭ بىلمەيتىنىن، جالپى Open Air دەگەن اشىق اسپان استىنداعى كونسەرتكە رەسەي انشىلەرىنىڭ جىل سايىن سونشا كوپ شاقىرىلاتىنىن تۇسىنبەيتىنىمدى، بۇعان قارسى ەكەنىمدى ايتقانىمدا، اكىم ورىنباسارىنىڭ اڭگىمە باسىندا كەلتىرىلگەن «تاڭعالعان جاۋابىن» ەستىدىم.
اقپارات ءۇشىن ايتا كەتەيىن، 29 مامىردا استانا اكىمدىگىنىڭ مادەنيەت جانە سپورت باسقارماسىنىڭ مۇرىندىق بولۋىمەن، «قازاق ەلى» مونۋمەنتى الدىندا، استانامىزدىڭ 20 جىلدىق مەملەكەتتىك مەرەكەسىنە ارنالعان ەڭ العاشقى شارا - Open Air كونسەرتى ءوتتى. دەنى رەسەي ەسترادا جۇلدىزدارى قاتىسقان كونسەرتتىڭ اتى «ۇلى دالا بىرلىگى» دەپ اتالىپتى. رەسەيدەن ديما بيلان، يۋليانا كاراۋلوۆا، سەرگەي لازاريەۆ، اننا سەدوكوۆا، ناتان، اننا سەمەنوۆيچ، دجيگان، ەلەنا تەمنيكوۆا، تيمۋر رودريگەز، ماكس بارسكيح، ميشا مارۆين، «گرادۋسى» توبى، Artik&Asti جانە باسقالارى، ال ءوز ەلىمىزدەن قايرات نۇرتاس، ايقىن، ءمادينا ءسادۋاقاسوۆا، كامشات جولدىبايەۆا، الىشەر كارىموۆ، ەركە ەسماحان، رينات مالساگوۆ، Ringo جانە Ninety One توبى ونەر كورسەتتى. ءبىر اقپاراتتا 50 مىڭ، تاعى بىرىندە 100 مىڭ ادام جينالدى دەلىنگەن. سونشا كوپ ادام تارتتىق، بۇل اسا ماڭىزدى دەگەن ۇستانىمدارى بولسا كەرەك. وكىنىشتىسى سول، رەسەيدەن شاقىرىلعان انشىلەرگە ءبىزدىڭ كورەرمەن سونشا ىنتىزار دەۋگە كەلمەيدى. استانا قالاسى مادەنيەت جانە سپورت باسقارماسىنىڭ باسشىسى بولات ماجاعۇلوۆتىڭ ءوزى ايتقانداي، جينالعانداردىڭ باسىم بولىگى «91» توبىن تىڭداۋ ءۇشىن كەلگەن. رەسەي انشىلەرى ۇنەمى شاقىرىلاتىن Open Air كونسەرتىنىڭ بيىل ءتورتىنشى مارتە ۇيىمداستىرىلىپ وتىرعانىن دا ايتا كەتكەن ءجون.
ەندى مەندە سۇراق: رەسەيدىڭ مەملەكەتتىك مەرەكەسىنە قازاق ەلىنەن قانشا ءانشى شاقىرىلادى؟ شاقىرىلا ما ءوزى؟ بىزگە كەلگەن (كەلەتىن) رەسەي انشىلەرىنە قانشا قارجى ءبولىندى، قايدان ءبولىندى جانە كىم رۇقسات بەردى؟ دوستىعىمىز بەن بىرلىگىمىزدى كورسەتكىسى كەلسە رەسەيدەن، وزبەكستان، قىرعىز ەلى، باسقا دا الىس-جاقىن ەلدەردەن نەگە بىر-بىردەن ءانشى شاقىرىلمايدى؟ نەلىكتەن ءبىز ۇنەمى رەسەيدەن شاقىرامىز؟ نەگە ءبىز رۋحانياتىمىزعا قاتىسى جوق وسىنداي شارالارعا رۋحاني جاڭعىرۋدىڭ بەلگىسىن قويىپ قويامىز؟
ايتپاقشى، ەرمەك امانشايەۆپەن بولعان قىسقا اڭگىمە بارىسىندا، ءبىز ءوز ونەرىمىزدى تۇگەندەپ وتىرمىز، سوندىقتان رەسەيدەن شاقىرعاننىڭ دا ايىبى جوق دەگەن پىكىر ايتىلدى. كەلىسپەيمىن. شەتتەن كەلگەندەر مەملەكەتتىڭ قولداۋىمەن قىمبات، ءزاۋلىم سارايلاردا ونەر كورسەتىپ جاتقاندا، ءبىزدىڭ «شانشار»، «الداراسپان» سياقتى ونەر ۇجىمدارى ءوز ەسەبىنەن جارتىلاي قاراڭعى، كونسەرت وتكىزۋگە ارنالماعان جەرلەردە حالىق جيناۋعا ءماجبۇر. «ونەر قىراندارى» سياقتى قولداۋشىسى جوق تەاترلاردىڭ جايى ايتپاسا دا تۇسىنىكتى. وسى جەردە وقىرماندارعا سۇراعىم: استانانىڭ 20 جىلدىعىندا قانداي انشىلەردى، تەاترلاردى، باسقا دا ونەر ۇجىمدارىن قولداۋ كەرەك دەپ سانايسىز؟ مۇمكىن بۇل ۇسىنىسىمىزدى استانا اكىمدىگى قابىل الار؟
جىعىلعانعا جۇدىرىق دەمەكشى، استانا كۇنىنە وراي رەسەي كوماندالارىنىڭ قاتىسۋىمەن كۆن-نەن ەۋرازيا كۋبوگى وتەتىن بولىپتى. جارناماسىن قاتەلەسىپ «كۋبوگى» دەپ جازىپ قويعان. ويىنعا رەسەيدەن التى، بىزدەن ەكى توپ قاتىسادى. ال، ءوز جاستارىمىزعا جاقىن «جايدارمان» ويىنشىلارى استانا كۇنىندە بار ما ەكەن ءوزى؟
ءمادي ماناتبەك
