بۇگىن وتىرار اۋدانىندا ىزگىلىك پەن مەيىرىمدىلىككە تولى ساۋاپتى ءىس جاسالدى. اۋدان اكىمدىگى جانىنان قۇرىلعان «مۇقتاج ازاماتتاردىڭ جەكەلەگەن توپتارىنا الەۋمەتتىك كومەك كورسەتۋ» كوميسسياسى  ارناۋلى الەۋمەتتىك كۇتىمدە جالعىزىلىكتى قارت ەسەبىندە تۇراتىن 5 ازاماتتىڭ تۇرعىن جايىن جوندەۋدەن وتكىزۋ جونىندە ۇسىنىس جاساعان بولاتىن. اتالعان ۇسىنىس نەگىزىندە ورازا ايىنىڭ سوڭعى كۇنىندە «قايىرىمدىلىق - اسىل قاسيەت» قايىرىمدىلىق اكسياسى ۇيىمداستىرىلىپ، باسپانالارى كۇردەلى جوندەۋدەن وتكىزىلىپ، قارتتارعا قاجەتتى ماتەريالدىق-الەۋمەتتىك كومەكتەر كورسەتىلدى. وسى ورايدا  اۋدان اكىمى ايتاحانوۆ  ەرلان قۋانىش ۇلى باستاعان ءبىر توپ كاسىپكەرلەر مەن زيالى قاۋىم وكىلدەرى اتالعان قاريالاردى قاسيەتتى ايت مەرەكەسىمەن قۇتتىقتاپ، شاڭىراقتارىنا باس سۇقتى.

«الدىمەن بارشاڭىزدى ەرتەڭگى ورازا ايت مەرەكەسىمەن قۇتتىقتايمىن! اۋداندىق بيۋدجەتتەن  ارناۋلى الەۋمەتتىك كۇتىمدە جالعىزىلىكتى قارت ەسەبىندە تۇراتىن 5 ازاماتتىڭ ءۇيىن جوندەۋ ءۇشىن  ءارقايسىسىنا 200 مىڭ تەڭگە بولىنگەن بولاتىن. ارينە، بۇل قاراجاتتىڭ جەتىمسىز ەكەندىگى بەلگىلى. وتىراردا كاسىبىن دوڭگەلەنتىپ وتىرعان جانى جومارت، قولى اشىق كاسىپكەرلەر از ەمەس. ورازا كەزىندە باستالعان وسى ىسكە جۇمىلا كىرىسكەن ازاماتتار از ۋاقىتتا جوندەۋ جۇمىستارىن اياقتادى. وسى ساۋاپتى ىسكە ەلباسى ن.نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى دا مۇرىندىق بولدى. رۋحاني قۇندىلىقتارىمىزدىڭ ءبىرى «اسار» ءادىسىنىڭ جاڭعىرۋىن، قيىندىق كورگەن اۋىلداستارىنا جاردەمدەسۋدى پارىزىم دەپ بىلەتىن قازاقى قالپىمىزدى كورىپ وتىرمىز. ادامدارعا قۋانىش سىيلايتىن وسىنداي اكسيا كەلەشەكتە دە جالعاسىن تابادى»  – دەگەن اۋدان باسشىسى  ەرلان ايتاحانوۆ ارنايى سىي-سياپاتتارىن دا تابىس ەتتى.

جوندەۋدەن ءوتىپ، جاڭا كۇيگە ەنگەن باسپانالارعا شاشۋىن شاشىپ، قازىنالى قارتتارمەن بىرگە قۋانعان اۋىل تۇرعىندارى دا يگىلىكتى ىسكە العىستارىن جەتكىزسە، ەلىمەن بىرگە ەمەن-جارقىن شاتتانعان قاريالار اق باتالارىن بەرىپ، ەلگە اماندىق، جۇرتقا تىنىشتىق، اۋدان باسشىسى مەن حالىققا ماڭگىلىك شۋاقتى كۇندەر تىلەدى.

"قارتتىق جەڭىپ، باسپانا جايىن جوندەۋگە كۇش-قۋات جەتپەي وتىرعان شاقتا قولداۋ ءبىلدىرىپ، مەيىرىمىن تانىتقان اۋدان باسشىسى باستاعان بارشا ىزگىلىكتى ەل ازاماتتارىنا ايتار العىسىم مول. كەڭ پەيىلدى حالقىما دا ريزامىن. بارشاڭىزعا ەكى دۇنيەنىڭ باقىتىن ءناسىپ ەتسىن!"-دەگەن تالاپتى اۋىلىنىڭ تۇرعىنى دۇيسەنكۇل وسكەنبايەۆا اجە ءوز تولقىنىسىن جاسىرا المادى.

قارتىنا دەمەۋ بولا بىلگەن وتىرارلىقتار يگىلىكتى باستاما الداعى ۋاقىتتا دا جالعاسىن تاباتىندىعىن جەتكىزدى.