اقش پرەزيدەنتى دونالد ترامپ «ۇلكەن جەتىلىك» سامميتىندەگى جەلىدە تارالعان سۋرەتكە قاتىستى پىكىر ءبىلدىردى.
الەم بويىنشا قىزۋ تالقىلانعان سۋرەتتە ۇستەلدە وتىرعان ترامپقا گەرمانيا كانسلەرى انگەلا مەركەل تەسىلە قاراپ تۇر. مەركەلدىڭ جانىندا وزگە دە ەۋروپا باسشىلارى جينالعان. باسشىلاردىڭ كوزقاراسى، ترامتىڭ جالعىز وتىرعانى – الەۋمەتتىك جەلىنى ءبىر شۋلاتقان ەدى. ءوز كەزەگىندە ترامپ سۋرەتكە قاتىستى پىكىر بىلدىرە وتىرىپ، ب ا ق وكىلدەرىن سىنادى.
«انگەلا مەركەلمەن قارىم-قاتىناسىمىز جاقسى، ءبىراق وتىرىكشى ب ا ق كەلىسسوز بارىسىنان ناشار سۋرەتتەردى جاريالاپ قويعان. وندا قۇددى ءبىر اقش-تىڭ بىردە-بىر پرەزيدەنتى سۇرامايتىن دۇنيەنى تالاپ ەتىپ تۇرعاندايمىن»، - دەپ جازدى امەريكالىق باسشى Twitter-دەگى پاراقشاسىندا.
سونىمەن قاتار، انگەلا مەركەل مەن وزگە باسشىلاردىڭ كۇلىپ تۇرعان سۋرەتتەرىن جاريالاپ، حالىقتى سەندىرگىسى كەلگەنگە ۇقسايدى.
G7 ءسامميتى 8-9 ماۋسىمدا كۆەبەك قالاسىندا وتكەن. باستاپقىدا قاتىسۋشى ەلدەر ورتاق كومميۋنيكە قابىلدادى دەپ ايتىلدى، الايدا ترامپ كەيىنىرەك بۇل قۇجاتتى قولدامايتىنىن مالىمدەدى.
