ورال قالاسىندا مەملەكەتتىك تاپسىرىستى ورىندايتىن 44 جەكە بالاباقشا بار. ال بالانى مەملەكەتتىك بالاباقشا كەزەگىنە قويۋ، جولداما بەرۋ تولىعىمەن اۆتوماتتاندىرىلعانى بەلگىلى. بۇل باعىتتا ارنايى پورتال قىزمەت ەتەدى. وسى ورايدا ورال قالالىق ءبىلىم بەرۋ ءبولىمىنىڭ باسشىسى جانسۇلۋ تورەمۇراتوۆا مەن ق ر ءبىلىم جانە عىلىم مينيسترلىگى جانىنداعى جۇمىس توبىنىڭ مۇشەسى ەۆگەنيي ششەربانوۆتان اتالمىش جۇيەنىڭ ارتىقشىلىعىن بىلگەن ەدىك.
ورال قالالىق ءبىلىم بەرۋ ءبولىمىنىڭ باسشىسى جانسۇلۋ مەڭەش قىزىنىڭ ايتۋىنشا، ءبىلىم بەرۋ سالاسىنداعى سيفرلاندىرۋ سىبايلاس جەمقورلىقتىڭ الدىن الۋ باعىتىندا قۇرىلعان. ءبىر جاعىنان اتا-انالارعا دا ىڭعايلى. ولار قۇزىرلى ورگاندارعا بارماي-اق، ۇيدە، جۇمىستا وتىرىپ بالاباقشا كەزەگىن باقىلاي الادى. ال باعدارلامانى قۇراستىرۋشى ەۆگەنيي ششەربانوۆتىڭ سوزىنشە، بالالاردى بالاباقشا كەزەگىنە قويۋ جانە بالاباقشالارعا قابىلداۋ ەرەجەسى 2017 جىلى وزگەرگەن.
- بۇل بارلىق ەلدە سىبايلاستىققا جول بەرمەۋ ماقساتىندا جاسالعان باعدارلاما. ەلەكتروندى جۇيە كەزەگىنە ءبىلىم بەرۋ ءبولىمى، بوبەكجاي باسشىلارى ارالاسا المايدى. كەزەككە ءار اتا-انا بالا دۇنيەگە كەلگەن جىلى تىركەلەدى. سەبەبى بۇلدىرشىندەر بالاباقشادا جاس ەرەكشەلىگىنە قاراي بولىنەدى. ماسەلەن، «بوبەكجايدان 100 بالاعا ورىن بوسادى، مەنىڭ بالام نەگە قابىلدانبادى» دەگەندەر قاي جىلعى بالالاردىڭ بۇل ورىندى بوساتقانىن قاراۋى كەرەك،- دەيدى ول.
بوبەكجايدان ورىن ءبولۋ جىل بويى ۇزدىكسىز جۇرگىزىلەدى. اسىرەسە، بالالاردىڭ ءبىرازى بالاباقشادان مەكتەپكە كەتەتىن جاز ايىندا ورىن كوپ بوسايدى. اقپاراتتىق جۇيەگە ءوتىنىش بەرۋ ەلەكتروندى ۇكىمەت پورتالى ارقىلى، حقكو جانە ءبىلىم بەرۋ كەڭسەسى ارقىلى جۇرگىزىلەدى. بارلىق وتىنىشتەردى روبوت تەكسەرەدى. جەڭىلدىكتەر ەكى سانات بويىنشا جاسالادى ەكەن. كەزەكتەن تىس اسكەري جانە ارنايى ورگان قىزمەتكەرلەرىنىڭ بالالارى قابىلدانسا، ءبىرىنشى كەزەكتە ەرەكشە ساناتتاعى بالعىندار مەن مۇمكىندىگى شەكتەۋلى اتا-انانىڭ، كوپبالالى وتباسىنىڭ بالالارى مەن قامقورلىقتاعى بالعىندار تۇر. ماسەلەن، زاشاعانداعى «زاڭعار» بالاباقشاسىن مىسالعا الساق، بۇل اۋداندا اسكەري قىزمەتشىلەر مەن مەملەكەتتىك قىزمەتكەرلەر كوپ تۇراتىندىقتان، مۇندا بالانى بالاباقشا كەزەگىنە تۇرعىزۋ وڭاي ەمەس. ءوز كەزەگىندە جانسۇلۋ مەڭەش قىزى جەكە بالاباقشالار دا مەملەكەتتىك تاپسىرىستى ورىندايتىندىقتان، وندا تولەماقى 12 مىڭ تەڭگەدەن اسپايتىنىن ەسكەرتتى.
