كۇنتىزبەگە قاراپ نە كوردىڭىز؟ «ەكى» دەگەن ساندى» دەپ جاۋاپ قاتىپ، قىزىق سۇراق قويعانىما ناليتىن شىعارسىز. نالىماڭىز، ءدال بۇگىن جىگەرىڭىزدى قۇم قىلماۋعا ۋادە بەرىڭىزشى. ويتكەنى شىلدەنىڭ ەكىسى قازاقتىڭ رۋحشىل، جىگەرلى اقىنى، سۋ جاڭا تۇركىستان وبلىسىنىڭ تۋماسى مۇحتار شاحانوۆتىڭ تۋعان كۇنى. ءوز ولەڭىن تىك تۇرىپ، تاماعىن جىرتىپ، يدەياسىن بار دۇنيە-بولمىسىمەن جەتكىزەتىن شاحانوۆ ءتىرى تۇرعاندا نەسىنە قىنجىلامىز؟! شاحانوۆشا ايتساق، تۇرمىستىڭ تاپشىلىعىن كوپ كورسەك تە، جۇرتقا ەتكەن جاقسىلىعىمىز قايتپاي، سەنگەنىمىز ساتىپ، باقىتسىز بولىپ قالساق تا ءومىر ءسۇرۋ كەرەك. سەبەبى مىناۋ عالامدا ءوز سورىڭدى ءوزىڭ جەڭبەسەڭ، ارمان جەتكىزبەيدى ەكەن. دەمەك ءومىردىڭ بارلىق ساتسىزدىكتەرى باقىتسىزدىق ەمەس. مۇنى دا ايتقان وتكىر ويلى شاحانوۆ. ەندەشە ادۋىندى جىرلارىمەن بويعا قۋات، جانعا رۋح سىيلاعان اقىندى دۇنيە ەسىگىن اشقان كۇنىمەن قۇتتىقتاي وتىرىپ پوەزياعا بومبا ولەڭدەرىمەن سىلكىنىس سىيلاعانى ءۇشىن بارشا قازاق ەلى اتىنان العىس ايتامىز. شاحانوۆتىڭ جىرلارىن جاتقا ايتىپ جۇرگەن بالالار ماڭگۇرتيزمنەن ادا، مالدىق سانادان ەركىن، قايسار داۋىستى قازاقتىڭ ازاماتى بولىپ ءوسىپ شىعاتىنىنا كامىل سەنەمىز.
بايقايمىسىڭ
بايقايمىسىڭ،
بايقايمىسىڭ
مىنا عاجاپ تاماشانى:
ءبىر ادامعا بايلانىستى ءبىر ادامنىڭ بولاشاعى.
بايىپپەنەن كوز جىبەرسەڭ اساۋ جىلدار ورىسىنە،
ءبىر ادامعا بايلانىستى ءبىر ادامنىڭ جەڭىسى دە.
بۇل زاماني قاعيدانىڭ مۇمكىن بە ەكەن كونەرمەگى،
قوزى كورپەش امان تۇرسا، بايان سۇلۋ ولەر مە ەدى؟
يساتايدى جەڭبەسە جاۋ، ماحامبەتتى جەڭەر مە ەدى،
قايران اقىن تاعدىرىنىڭ سوققىسىنا كونەر مە ەدى؟
قايران اقىن — سۇڭقار قيال، ناركەسكەن ول،باتىل ارمان،
يساتايدان ايرىلعاندا جەر باۋىرلاپ جاتىپ العان
بۇدان اسقان قايعىلى ءتۇن قونعان ەمەس باسىنا ونىڭ،
دوسى باردا الشىسىنان تۇرۋشى ەدى اسىعى ونىڭ.
و، سۇمدىق - اي،
جاۋلىق سەزىم پاراساتتى پانالاپتى،
يساتايدىڭ ولىمىمەن ماحامبەتتى جارالاپتى...
ءقادىرلىم - اۋ،
كوز جىبەرشى اساۋ جىلدار ورىسىنە،
ءبىر ادامعا بايلانىستى ءبىر ادامنىڭ جەڭىسى دە.
كەيدە مەنى مۇقاتپاق بوپ جاۋلار سەنى جاماندايدى،
ال ەگەر سەن جاماندالساڭ بۇل، ارينە، ماعان قايعى.
باسىمىزعا شيىر - شيىر كۇن تۋعاندا قۇس تانالى،
كەيدە مەنى جەڭۋ ءۇشىن جاۋلار ساعان كۇش سالادى.
تايعاق ءومىر جولدارىندا سۇرىنگەندە تىرەك الار،
سۇيەنىشىم سەن ەكەنىن ايتپاستان - اق بىلەدى ولار.
الەمنىڭ بار اجارىنان بىزگە دوستىق سىمباتتىلاۋ
مەن جادىراپ ءجۇرسىن دەسەڭ، سەن مىقتى بول،
قىمباتتىم - اۋ.
جازيرا بايدالى
پىكىر قالدىرۋ