بۇرىنعى ۇلىبريتانيا ارۋى، 32 جاستاعى مودەل سوفي گرادوننىڭ ءولى دەنەسى تابىلدى. قىزدىڭ ءولىمى جايلى اقپارات تارالعان جوق، الايدا دوستارى ءسوفيدى ءوزىن-وزى ءولتىردى دەپ بولجايدى. قايعىلى وقيعادان سوڭ بريتاندىق پسيحولوگ تەلە جۇلدىزدىڭ ءومىرى مەن 500 مىڭنان اسا جازىلۋشىسى بار Instagram پاراقشاسىن زەرتتەپ كوردى.
بريتاندىق مەديسينا Instagram-دى ادامنىڭ پسيحيكاسىنا اسەر ەتەتىن ەڭ سوراقى الەۋمەتتىك جەلى دەپ سانايدى. بۇل جايلى The Sun باسىلىمى جازدى. ءسوفيدىڭ وقىرماندارى كوبىنە ۇرەي مەن كۇيزەلىسكە ۇشىراعاندار. ولاردىڭ تاراپىنان تەك نەگاتيۆ پىكىرلەر ءجيى جازىلىپ تۇرادى ەكەن.
«بۇل ادامدار قاشان دا حالىقتىڭ نازارىندا جۇرگەندىكتەن، ومىرلەرىن دە ءساندى ەتىپ كورسەتۋگە تىرىسادى. الەۋمەتتى جەلى قاراپايىم ادامدارعا دا اسەر ەتكەنىمەن، جۇلدىزدارعا دەگەن اسەرى تىپتەن كۇشتى»، - دەدى پسيحولوگ ەبيگەيل سان.
پسيحولوگتىڭ سوزىنشە، الەۋمەتتىك جەلىلەر، اسىرەسە Instagram حالىق نازارىندا جۇرگەن ادامداردىڭ پسيحيكاسىن بۇزىپ جابەرەتىن بىردەن ءبىر كۇش. سوفي گرادون ەلدەگى تانىمال Love Island رەاليتي-شوۋىنىڭ قاتىسۋشىسى بولعان. الول بريتاندىقتاردىڭ كوبى تاماشالايتىن، ءارى قاتىسۋشىلارىنىڭ ءومىرىن ءجيى تالقىلايتىن شوۋ ەكەن. سول سەبەپتى سوفي گرادوننىڭ ءومىرى حالىقتىڭ باعالاۋعا، وقىرماندارىنىڭ سانىنا بايلانىپ قالعان.
«رەاليتي-شوۋدىڭ جۇلدىزدارى ەكران ارتىنا جاسىرىنبايدى، حالىققا ءبارى ايان. ال Instagram ادامداردىڭ ءوزىن-وزى باعالاۋ دارەجەسىنە اسەر ەتەدى، جەكە ءومىرىن جويىپ، ەلدىڭ پىكىرى ول ءۇشىن ماڭىزدى سانالاتىن بولادى. جۇلدىزدار وزدەرىنە ەمەس حالىققا ۇنايتىن، حالىق قىزىعاتىن فوتولار سالۋعا تىرىسادى»، - دەدى پسيحولوگ.
ءسوفيدىڭ قازاسىن پوليسيا تەرگەگەن جوق، الايدا دوستارى ءسوفيدىڭ ءوزىن-وزى ولتىرگەنىنە سەنىمدى. ونىڭ ۇستىنە ومىرىندە قارجىلىق قيىندىقتار دا بولىپتى. الايدا ونىڭ 494 مىڭ وقىرمانى بار Inestagram پاراقشاسى ءسوفيدىڭ قيىندىققا ۇشىراعان قىزدىڭ بەينەسىن جاۋىپ، تابىستى ارۋ رەتىندە كورسەتەدى.
«شوۋدان كەتكەلى جان-جاقتان جاۋعان نەگاتيۆتەر كوڭىلىمە قاتتى ءتيدى. ول ادامداردىڭ ايتىپ، جازىپ جاتقاندارى شىندىق سەكىلدى كورىندى. جەلىدەگى مازاق ومىردەگى مازاقتان دا قورقىنىشتى. ترولدەر ادامدى ءالسىز حالگە تۇسىرەدى»، - دەپ جازدى بىردە سوفي ءوزىنىڭ Instagram-داعى پاراقشاسىنا.
Mediamix ماركەتينگتىك كومپانياسىنىڭ ستاتيستيكاسىنا سايكەس، 2018 جىلدىڭ العاشقى اپتاسىندا-اق Instagram قولدانۋشىلارىنىڭ سانى 1 ملرد-قا جەتتى. اي سايىن مىڭداعان ادام تىركەلىپ تۇرادى. الەۋمەتتىك جەلىلەردىڭ ىشىندەگى ەڭ بەلسەندىسى دە وسى Instagram.
