جوعارعى سوت ءتوراعاسى جاقىپ اسانوۆ زاڭگەرلەر قاۋىمىنا ۇندەۋ جاريالادى. بۇل تۋرالى Qamshy.kz اقپارات اگەنتتىگى ق ر جوعارعى سوتىنىڭ باسپا ءسوز قىزمەتىنە سىلتەمە جاساپ حابارلادى.

سۋديا – ابىرويلى لاۋازىم. كەز-كەلگەن زاڭگەردىڭ ەڭ بيىك شىڭى. بۇل جاي عانا قابىلەت ەمەس، سونىمەن قاتار ايرىقشا بەدەل، ءاربىر شەشىم ءۇشىن جاۋاپتىلىقتى، ادىلەتتىلىك پەن زاڭدىلىقتى جوعارى دەڭگەيدە سەزىنە ءبىلۋ. ويشىلدار سۋديانى «سويلەيتىن زاڭ» دەپ جايدان-جاي ايتپاسا كەرەك.

ءبىزدىڭ قوعامدا سۋديالار – بيلەر سوتى ءداستۇرىن جالعاستىرۋشىلار. ولار ار-وجداننىڭ، ادىلدىكتىڭ، شەشەندىك ونەردىڭ، تەرەڭ ءبىلىم مەن باسقا دا قاسيەتتەردىڭ ەتالونىنا اينالدى. ۇلى دالانىڭ مىزعىماس ابىرويى مەن سەنىمىنە يە بولدى. قازاق حاندىعىنىڭ وركەندەۋ ءداۋىرى ايتەكە، قازىبەك جانە تولە بيلەردىڭ ەسىمدەرىمەن بايلانىستى بولۋى تەگىننەن-تەگىن ەمەس.

بۇگىندە مەملەكەت باسشىسىنىڭ تاپسىرماسىمەن رەسپۋبليكادا سوت جۇيەسىن جاڭعىرتۋ جۇرگىزىلۋدە. ونىڭ ەڭ ماڭىزدى مىندەتىنىڭ ءبىرى - سۋديالاردى ىرىكتەۋ جۇيەسىن جولعا قويۋ. سۋديالىق قىزمەتكە ەڭ لايىقتىلار مەن دايىندىعى مىقتى ۇمىتكەرلەر عانا كەلۋى ءتيىس. ول ءۇشىن كۇردەلى جانە، ەڭ باستىسى، اشىق كونكۋرس قاجەت. جوعارعى سوتتىڭ ءبىرىنشى باسىم باعدارلاماسى «ءمىنسىز سۋديا» دەپ اتالۋى دا سوندىقتان.

ءبىز سۋديالاردى ىرىكتەۋ مەن ولاردىڭ كارەرالىق ءوسۋ جۇيەسىن جەتىلدىرۋدىڭ كەشەندى شارالارىن پىسىقتاۋدامىز. بۇل جۇمىس جوعارى سوت كەڭەسىمەن بىرگە جۇرگىزىلۋدە.

وسى ورايدا سوت بىلىمىنە ەرەكشە نازار اۋدارىلىپ وتىر. بۇل – سوت بيلىگىن جاقسارتۋ مەن جاڭا زامانعى سۋديالاردى دايارلاۋدىڭ شەشۋشى فاكتورى. وسى مىندەتتى جوعارعى سوت جانىنداعى سوت تورەلىگى اكادەمياسى تولىعىمەن ورىنداپ كەلەدى. اكادەميا شەتەلدىك وزىق تاجىريبە نەگىزىندە قۇرىلعان. بۇگىنگى كۇنى ول – وقىتۋ باعدارلاماسى سوت جۇيەسىنىڭ ناقتى سۇرانىستارىن ەسكەرەتىن ەلىمىزدەگى جالعىز جوعارى وقۋ ورنى.

سوت تورەلىگى اكادەمياسىنىڭ تۇلەكتەرى باسقالارعا قاراعاندا ءبىرقاتار ارتىقشىلىقتارعا يە.

ونىڭ سەبەبى مىناداي:

ءبىرىنشىسى. بولاشاق سۋديالاردى جوعارعى سوتتىڭ سۋديالارى مەن جەتەكشى ساراپشىلار وقىتادى. وقۋ بارىسىندا سۋديالاردىڭ كۇندەلىكتى جۇمىسىنداعى مىسالدار كەڭىنەن قولدانىلادى. شەتەلدىك، سونىڭ ىشىندە ۇزدىك قۇقىق مەكتەپتەرىندەگى تاجىريبەگە ەرەكشە نازار اۋدارىلادى.

ەكىنشىسى – پراكتيكالىق ماشىق: وقىتۋ مەرزىمىنىڭ 60%-ى سوت ورگاندارىندا تاجىريبەدەن وتۋگە ارنالعان.

ءۇشىنشىسى – شىنشىلدىق، ادالدىق، بەيتاراپتىلىق سياقتى جەكە قاسيەتتەردى دامىتۋ. ءوزىن-وزى جەتىلدىرە ءبىلۋ. تۇلعالىق دامۋ بويىنشا ۇزدىك باعدارلامالاردى قولدانۋ. اكادەميادا بۇعان اسا ءمان بەرىلەدى.

ىرىكتەۋ ساپاسىن ارتتىرۋ ماقساتىندا ماگيسترانتتاردى قابىلداۋ ءتارتىبى وزگەرتىلدى.

ەمتيحاننىڭ ءبىرى – قۇقىق سالالارى بويىنشا ناقتى كەيستەردى شەشۋ.

بۇدان كەيىن ەسسە جازىلادى. ۇمىتكەر ءوزى جايلى، ءوزىنىڭ ەڭبەك جولى جانە نە ءۇشىن اكادەميا ماگيسترانتى بولعىسى كەلەتىنى تۋرالى اڭگىمەلەپ بەرۋى ءتيىس.

قاجەتتى ۇپاي جيناعان ءاربىر ۇمىتكەردىڭ كاسىبي قاسيەتتەرىن انىقتاۋ ءۇشىن ءوزىم جانە جوعارى سوتتىڭ باسقا دا وكىلدەرى ولارمەن اڭگىمەلەسۋ وتكىزەمىز.

اكادەميانى قارجىلاندىرۋ ەرەجەسىنە سايكەس ۇمىتكەرلەر مەملەكەتتىك قىزمەتشى بولۋى ءتيىس ەكەندىگىن بىردەن اتاپ وتكىم كەلەدى. وقۋ كەزىندە ولاردىڭ ەڭبەك ءوتىلى مەن جالاقىسى ساقتالادى. سونىمەن قاتار سۋديالىققا ۇمىتكەرلەردىڭ زاڭگەرلىك جۇمىس وتىلىنە قاتىستى قويىلاتىن زاڭ تالاپتارى بار.

ەگەر جىگەرلى بولساڭىز، الدىڭىزعا ماقسات قويىپ، سوعان ۇمتىلساڭىز جانە ءوز ءومىرىڭىزدى زاڭ مەن قوعامعا قىزمەت ەتۋگە ارنايمىن دەسەڭىز، وندا ءسىزدى سوت تورەلىگى اكادەمياسىنىڭ ماگيستراتۋراسىنا شاقىرامىن. بۇل وقۋ ورنىندا سۋديا بولۋ ءۇشىن قاجەتتى ءبىلىم مەن قابىلەتكە يە بولاسىز.

قابىلداۋ بارىنشا وبەكتيۆتى تۇردە وتەدى. مەن كوميسسيانىڭ جۇمىسى اشىق، ءادىل بولاتىنىنا كەپىلدىك بەرەمىن. اكادەمياعا ەڭ لايىقتىلار عانا تۇسەدى.

ءبىز قازاقستاننىڭ سوتتارىندا ۇزدىكتەردىڭ ۇزدىگى جۇمىس جاساعانىن قالايمىز! سولاردىڭ ءبىرى بولىڭىز! ەلىمىزدىڭ دامۋىنا ءوز ۇلەسىڭىزدى قوسىڭىز! ءسىزدى كۇتەمىز!

جوعارعى سوتتىڭ

ءتوراعاسى                                                                                                                     ج. اسانوۆ