بۇرىنعى وقو، قازىرگى تۇركىستان وبلىسىنداعى اباي اۋىلىندا تاعى ءبىر بالا ءجاسوسپىرىم شاعىندا زورلانعانىن ايتتى. بۇل تۋرالى 22 جاستاعى جىگىت «ەۋرازيا» ءبىرىنشى ارناسىنىڭ تىلشىلەرىنە ايتىپ بەرگەن ەكەن.

جىگىتتى وسىدان التى جىل بۇرىن ءبىر اۋىلدا تۇراتىن جىگىتتەر زورلاعان كورىنەدى.

«ولار مەنەن «تۇندە نە بولعانى ەسىڭدە مە؟» دەپ سۇرادى. مەنىمەن سەكسۋالدىق قاتىناستا بولعانىن جانە سونى ۆيدەوعا ءتۇسىرىپ العاندارىن ايتتى»، - دەپ ءتۇسىندىردى تۇركىستاندىق.

ەگەر بىرەۋگە ايتاتىن بولسا، ۆيدەونى بۇكىل اۋىلعا تاراتىپ، اتا-اناسىنىڭ ابىرويىن ايرانداي توگەمىز دەپ قوقان-لوقى كورسەتكەن ەكەن.

وسى كۇنگە دەيىن جىگىت بىرنەشە رەت پوليسياعا ارىز ءتۇسىرىپتى، الايدا مۇنىسى قۇر اۋرەشىلىك قانا. جىگىتتىڭ ايتۋىنشا، تىرپ ەتىپ قوزعالايىن دەگەن قۇقىق قورعاۋ ورگاندارىن كورمەپتى. قولدارىن قۇر سىلتەگەن. بۇعان جىگىت كىنالىلەردىڭ لاۋازىمدى تۋىستارى بار دەپ بولجايدى.

2012 جىلى ءوزىنىڭ زورلانعانىن ايتقان جىگىت جانىبەكوۆ اتىنداعى №73 مەكتەپتى بىتىرگەن ەكەن.

ايتا كەتەيىك، بۇدان بۇرىن جەتى جاستاعى بالانىڭ اجەسى №73 مەكتەپكە ءبىرىنشى سىنىپقا بارعان نەمەرەسىنىڭ زورلانعانىن ايتىپ، بۇل ماسەلەگە بۇكىل قازاقستان الاڭداعان ەدى. قازىرگى ۋاقىتتا شەتەلدەن ساراپشىلار قوسىلىپ، اتالمىش ىسكە قاتىستى ساراپتاما جۇمىستارى جۇرگىزىلىپ جاتىر. ءبىرىنشى سىنىپ وقۋشىسىنا قاتىستى مەملەكەت باسشىسى نۇرسۇلتان نازاربايەۆ تا پىكىر بىلدىرگەن. پرەزيدەنت بۇل ماسەلەگە قاتىستى كىنالىلەردىڭ ءالى كۇنگە تابىلماي جاتقانىنا تاڭدانىسىن بىلدىرگەن ەدى.