قوعامدا توقال بولساڭ ۇلدە مەن بۇلدەگە ورالاسىڭ دەگەن تۇىسىنىك قالىپتاسقان. وسىنداي پىكىرمەن وتباسىلى ەركەكپەن كوڭىل جاراستىرىپ، كەيىن وپىق جەگەندەر بارشىلىق. سولاردىڭ ءبىرى الينا. الينانىڭ باستان وتكەرگەن سۇمدىق جاعدايى جاس قىزدارعا ساباق بولادى دەگەن ۇمىتپەن، ونىڭ comode.kz-كە بەرگەن سۇحباتىن نازارلارىڭىزعا ۇسىنىپ وتىرمىز.
ەسىمىم الينا. وتكەن ءومىرىمدى ەسكە العىم كەلمەيدى. الايدا جاس قىزدار بىرەۋدىڭ ەكىنشى ايەلى بولماۋى ءۇشىن ساباق بولار دەگەن ماقساتپەن باستان وتكەرگەنىمدى ايتىپ بەرەيىن.
انام مەنى جانە مەنىڭ 4 ءىنىمدى جالعىز ءوزى تاربيەلەدى. اكەمىز ءبىزدى تاستاپ كەتتى. اۋىلدا، قارا سۋ مەن قارا ناندى جەپ وستىك. مەن مۇنداي ومىردەن ابدەن قاجىدىم. مەكتەپ بىتىرە سالا اۋىل كۆوتاسىمەن پەداگوگيكالىق ينستيتۋتقا گرانتقا ءتۇستىم.
ستۋدەنت كەزىمدە دە جوقشىلىقتىڭ زاردابىن ابدەن تارتتىم. داياشى، ەدەن جۋۋشى بولىپ جۇمىس ىستەدىم. ءتىپتى ستريپتيز بيلەمەك بولدىم (دەنە ءبىتىمىم ساي كەلمەدى). شاكىرتاقىمنان ايىرىلىپ قالماۋىم ءۇشىن ساباعىمدى جاقسى وقىدىم. جاتاقحانادا تۇردىم.
قىدىرعىم دا كەلەتىن. ادەمى كيىمگە اقشا تابۋدىڭ ءتۇرلى جولدارىن ىزدەدىم. جاقسى جىگىتپەن تانىسۋدى ارماندادىم. الماتىدا ادەمى تويىم ءوتىپ جاتقانىن ەلەستەتەتىنمىن. الايدا ماعان تەك كوشەدە دونەر ساتىپ تۇرعان ەركەكتەر عانا قىرىندايتىن.
بولاشاق كۇيەۋىممەن ساۋىق كەشىندە تانىستىق. ول مەنى ۇناتىپ قالعان ەكەن. سول كەشتە جاتاقحاناعا دەيىن جەتكىزىپ سالدى. مەن ادامدارمەن تەز ءتىل تابىسىپ كەتەمىن. سوندىقتان ونىمەن اڭگىمەمىز جاراسىپ كەتتى. 22 جاس ەرەكشەلىگى ماعان كەدەرگى بولمادى. ول ماعان اكە دە بولدى. ونىمەن تانىسقاننان كەيىن اشتىق دەگەندى بىلمەدىم. ونىڭ بالا-شاعاسى بار ەكەنىن ەكى اپتادان كەيىن، ەكىنشى ايەلى بولۋعا ۇسىنىس جاساعاندا ءبىلدىم. سول كەزدە سالافيت ەكەنىن دە ايتتى. مۇنى ەستىگەندە شوشىپ كەتتىم. ءدامحانادا ونىڭ ءوزى سەكىلدى ساقالدى دوسىمەن وتىرعان ەدىك. مەن ۇيگە قايتقىم كەلەتىنىن ايتتىم.
كەلەسى كۇنى ول ماعان اقشا بەردى. «ەكىنشى ايەلىم بولاسىڭ با الدە جوق پا؟» دەپ سۇراقتى توتەسىنەن قويدى. «سەنىڭ مۇنداي جەردە ءومىر سۇرگەنىڭدى قالامايمىن. پاتەر جالداپ بەرەيىن» دەدى. مەن اقشانى الدىم، پاتەرگە كوشتىم. ەكىنشى ايەلى بولۋعا كەلىستىم.
نەكەمىز قيىلمادى. ول ءوزى يمام ەكەنىن ايتتى. مەن جۋىنعاننان كەيىن. دۇعا وقىدى دا ماعان دا تەلەفوننان دۇعا وقىتتى. وسىدان كەيىن ول مەنى بارلىق كۇنالارىمنىڭ كەشىرىلگەنىن جانە تازارعانىمدى ايتىپ، سەندىرۋگە تىرىستى. مەن وعان سەندىم.
وسىدان كەيىن ءومىرىم توزاققا اينالدى. ول ماعان ەركەكتەرمەن سويلەسۋگە تىيىم سالدى. وقىعانىمدى قالامايتىن، ءبىراق جۇمىسقا بارۋعا مىندەتتى ەدىم. ول ۋاقىتتا بالاباقشاعا بالا كۇتۋشى بولىپ جۇمىسقا تۇرعان ەدىم. ۇزىن كويلەك كيۋگە ماجبۇرلەدى. ول مەنىڭ حيدجاپ كيگەنىمدى قالادى. الايدا مەن ءالى دايىن ەمەس ەكەنىمدى ايتىپ، باس تارتتىم.
ول اپتاسىنا ءبىر رەت قانا ۇيگە كەلەتىن. مەن ونىڭ ق ۇلى سەكىلدى بولدىم. ول كەلگەندە ءۇي مۇنتازداي تازا تۇرۋ كەرەك. ءۇي اياق كيىمى جىلى بولۋ قاجەت. ول كەلگەندە ونى ءوزىم اياعىنا كيگىزەتىنمىن. داستارحان جايىلىپ تۇرۋ كەرەك. ءبىر كۇنى كامپيت سالاتىن ىدىستا مارمەلاد تۇرعانىن كورىپ، سول ءۇشىن ۇرىسقانى بار. سەبەبى مارمەلادتا جەلاتين بار. ال جەلاتيندە شوشقانىڭ مايى بار. شۇجىقتى دا جەۋگە بولمايتىن. حالال بولعاننىڭ وزىندە وندا شوشقا ەتى بار دەپ كۇدىكتەنەتىن. تۇرىپ تاماق جەسەم ايقايلايتىن. تۇرىپ تاماق جەۋ كۇنا ەكەنىن ايتاتىن.
ايەلدەرگە زات سەكىلدى قارايدى. ايەل كۇيەۋىنىڭ ايتقانىن بۇلجىتپاي ورىنداۋ كەرەك دەپ ەسەپتەيتىن. ماعان مۇلدە كومەكتەسپەيتىن. بارلىعىن ءوزىم جاساپ، ءوزىم شەشەتىنمىن. تۋىستىق قاتىناسىمىز بولماسا وزگە ەركەكتەن كومەك سۇراۋعا رۇقسات بەرمەيتىن. ال تۋىس ەر ادامداردان تەك ىنىلەرىم عانا بولدى.
ول ماعان اقشانى ساناپ بەرەتىن. پاتەر اقىسى، كوممۋنالدى شىعىندار دەگەندەي. ەگەر بىرنارسە ساتىپ العىم كەلسە ول زاتتىڭ قانشالىقتى قاجەت ەكەنىن ءتۇسىندىرۋىم كەرەك. ەگەر ساتىپ العىم كەلەتىن زات ماعان كەرەك ەمەس دەپ شەشسە اقشا بەرمەيتىن. توقالداردىڭ بارلىعى قىمبات پاتەردە تۇرادى، ادەمى كولىكپەن جۇرەدى دەگەن پىكىردى جوققا شىعارعىم كەلەدى.
زاڭدى ايەلىنىڭ كولىگى بار ەكەنىن بىلەتىنمىن. ءۇش بالاسىندا دا ءبىر-بىر كولىكتەن بولدى. كىشىسى مەكتەپتە وقىسا دا جەكە كولىگىمەن جۇرەتىن. وزىندە ءۇش كولىگى بار ەدى. وتباسىمەن ۇلكەن ۇيدە تۇردى. جىلىنا ەكى رەت وتباسىمەن دەمالۋعا باراتىن. بارلىق تۋىستارىنا كومەكتەسەتىن. تەك ماعان عانا كومەكتەسپەيتىن.
قاس جۇلۋ، بالاعات ءسوز ايتۋ حارام ەكەنىن ايتاتىن. ءبىراق ءوزىنىڭ اۋزىنان اق يت كىرىپ، كوك يت شىعاتىن. بولماشى سەبەپكە بولا ۇرىساتىن. «جاڭا جىلىڭمەن» دەپ قۇتتىقتاعان دۇكەنشىگە «راقمەت» دەپ ايتقانىم ءۇشىن ۇرىس ەستىگەنىم ەسىمدە.
ول تەلەگرامدا يسلامدى دارىپتەيتىن بىرنەشە پاراقشاعا جازىلعان. ماعان دا ءتۇرلى اۋديو، ۆيدەو جىبەرىپ وتىراتىن.
جاس ايەل ءۇشىن وزىنەن 22 جاس ۇلكەن ەركەكپەن ءومىر ءسۇرۋ وتە قيىن. ول كوپ اۋىراتىن. مەن وعان ەكپە جاساپ، ماي جاعىپ، ارنايى تاماق پىسىرەتىنمىن. وسىعان قاراماستان مەن ونى تۇسىنبەيتىنىمدى ايتىپ شاعىمداناتىن.
وسىنىڭ بارىنە نە ءۇشىن شىداعانىمدى بىلمەيمىن. ول ماعان ەكى رەت «تالاق» دەپ ايتقان كەزى بولدى. قاتتى ۋايىمدادىم. كەتپەۋىن ءوتىندىم. ەكىنشى رەت «قايدا بارساڭ، وندا بار» دەپ اجىراسىپ كەتتىم. بىرنەشە كۇننەن كەيىن جاقسى جىگىتتى جولىقتىردىم. ەكەۋىمىز بىرگە تۇردىق. كوپ ۇزاماي تۇرمىسقا شىعۋعا ۇسىنىس جاسادى.
سالافيتپەن تۇرعانىم ومىرىمدەگى ۇلكەن قارا داق سەكىلدى. ەندى ونىڭ جەكە مەنشىگى ەمەس ەكەنىمدى تۇسىنگەندە ءجيى قوڭىراۋ شالىپ، حات جازىپ مازامدى الدى. مەنى دە، جىگىتىمدى دە ءولتىرىپ كەتەمىن دەپ قورقىتتى. بۇل ارەكەتتەرىن قويماسا، بولعان جاعدايدى ايەلىنە ايتىپ بەرەتىنىمدى ايتقاندا بارلىعى ساپ تىيىلدى. قۇربىما دا ايەلىنىڭ بايلانىس تەلەفونىن بەرىپ قويعانىمدى ايتتىم. ايەلىنەن ول قاتتى قورقاتىن.
