نازىم ماماندىعى بويىنشا بۋحگالتەر. ءبىر بالاسى بار. قىستىڭ ايىندا قايتا-قايتا اۋىرا بەرگەن بالاسى ءۇشىن جۇمىستان سۇرانعانى باستىعىنا دا، ۇجىمىنا دا ۇناماي جۇرگەن. «اساننىڭ قىزۋى كوتەرىلدى» دەپ ەنەسى قوڭىراۋ شالعاندا باستىعىنىڭ كوزىنە تىكە قاراپ، تاعى قالاي سۇرانارىن بىلمەي دال بولعان. جۇمىستان شىعارىپ جىبەرمەي تۇرعاندا اقىسى تولەنبەيتىن دەمالىسقا شىعايىن دەپ جۇرگەندە اياعىنىڭ اۋىرلاعىنان بىلەدى. سونداعى قۋانعانى-اي! ءبۇيتىپ ءسوز ەتىپ، ءوزىن ىڭعايسىز سەزىنگەن جۇمىسى قۇرىسىن! بولاشاقتا باسقا جەرگە اۋىسامىن دەپ شەشىم قابىلدادى ىشتەي. ول قايدان ءبىلسىن، ەكى بالاڭ بولا تۇرىپ جايلى، جاقسى جۇمىسقا تۇرۋ وڭاي ەمەستىگىن؟
اۋلاداعى كورشىممەن بولعان اڭگىمەدەن كەيىن وسىنداي ءپالساپالىق ويعا بەرىلدىم. بەس جاسار جانە ءۇش جاسار بالا تاربيەلەپ وتىرعان اكتريسا قۇربىم ەسىمە ءتۇستى. ول دا بىردە «پورتفوليومدى (كاسىبي فوتوسەسسيا كەزىندە فوتولاردىڭ جيىنتىق پاپكاسى-اۆت.) جىبەرسەم، ۇنايمىن، كاستينگكە بارسام، تالانتىممەن ءتانتى ەتەمىن، ال «ەكى بالام بارىن» بىلسە، ۇناماي قالامىن. اتالمىش رولگە جاس جاعىنان، ومىرلىك تاجىريبەم جاعىنان بولسىن ساي كەلىپ تۇرسام دا مەنەن جاس ءارى بالا-شاعاسى جوق اكتريسا ىزدەپ الەك بولادى. سونداعى قورقىنىشتارى – تۇسىرىلىمگە تولىققاندى قاتىسا الماي، بالا جىلاسا قاشىپ كەتەدى ەكەنمىن. ەكى بالانى باعىپ، قارنىن اش قالدىرماي، كيىمىن كىرلەتپەي وسىرگەن، كۇيەۋىن ۇساق-تۇيەكپەن مازالاي بەرمەيتىن، ازىق-تۇلىكتى دە ءوزى تاسيتىن، ءۇيدى مۇنتازداي تازا قىلىپ ۇستاۋعا تىرىساتىن ايەل ءبىر جۇمىستى دۇرىستاپ ىستەي المايدى دەپ كىم ايتتى؟!» دەپ قىنجىلدى.
تەليەۆيدەنيادا جۇمىس ىستەگەن كەزىم ەسىمە ءتۇستى. ەر-ازاماتتاردىڭ دەنى ءۇيلى-باراندى، ال قىز-قىرقىن جاعى كۇيەۋگە شىقپاعان. ولار كۇندىز-تۇنى قازاق تەليەۆيدەنياسى ءۇشىن ايانباي ەڭبەك ەتەدى. سودان بولار، جىگىتپەن تانىسىپ، اڭگىمە جاراستىراتىن ۋاقىتتارى جوق. باستىقتار دا تۇسكى استى تەز ءىشىپ، تۇنگە دەيىن قالىپ ىستەيتىن قىزمەتكەرلەردى قاتتى جاقسى كورەدى. كۇيەۋگە شىعىپ، بالالى بولىپ، توعىزدان التىعا دەيىن وتىرىپ ەڭبەكتەنسە، جۇمىس ونبەيدى دەپ كىم ايتتى؟! تۇنگە دەيىن وتىراتىن "ەڭبەكقور" شابىتى كەلمەي جۇرگەن، تۇستە ۇيىقتاپ، ەندى ويانعان جۇمىسكەر بولۋى دا عاجاپ ەمەس قوي؟!
ءبىز رەزيۋمەنى تولتىرعاندا ءبارىن بۇگە-شۇگەسىنە دەيىن تولتىرىپ جازامىز. تۋعان كۇنى، وتباسىلىق جاعدايى، تۋعان جەرى دەگەنگە قوسا قانداي رۋعا جاتاتىنىن جازۋ عانا قالعان سياقتى. شەتەلدە رەزيۋمە جازۋ بارىسىندا وتباسىلىق جاعداي دەگەندى مۇلدەم جازبايدى. سەبەبى بۇل سۇراقتىڭ جاۋابى ماماننىڭ قانشالىقتى كاسىبىنە ادال، ەڭبەكقور ەكەندىگىن انىقتاۋعا كومەكتەسە المايتىن فاكتور ەكەن.
