امەريكالىق «World Wide Motion Pictures Corporation» كومپانياسى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق «نوۆىي مير» پروداكشن» جشس-مەن بىرلەسە تۇسىرگەن «اناعا اپارار جول» ءفيلمىنىڭ سولتۇستىك امەريكالىق وڭىردە ديستريبۋسيالاۋ قۇقىعىن ساتىپ الدى. ەستەرىڭىزگە سالا كەتەيىك، اتالعان فيلم بىلتىر قازاقستان اتىنان «وسكار» جانە «التىن گلوبۋسقا» «ۇزدىك شەتەل ءفيلمى» اتالىمىندا ۇسىنىلعان ەدى.
باس پروديۋسەرى ءاليا نازاربايەۆا، ال رەجيسسەرى اقان ساتايەۆ ̶ بۇل فيلمگە كىل جۇلدىزداردى جيناعان. «اناعا اپارار جول» فيلمىندە ەلىمىزدىڭ تانىمال اكتەرلەرى ̶ التىناي نوگەربەك، ءادىل احمەتوۆ، ارۋجان جازىلبەكوۆا، بەرىك ايتجانوۆ، بولات ءابدىلمانوۆ تۇسكەن. بۇل ەپيكالىق فيلمنەن كورەرمەن قازاق وتباسىسىنىڭ 1930 جىلداردان باستاپ، كۇنى بۇگىنگە دەيىنگى باستان كەشكەنىن كورە الادى.
«پروديۋسەرلەرىمىزگە، ءتۇسىرىلىم توبىمىزعا جانە ماعان دا ءبىزدىڭ ءفيلمىمىزدى اقش كينوتەاترلارىندا كورسەتەتىنى ۇلكەن ابىروي. «World Wide Motion Pictures Corporation» كومپانياسى فيلمىمىزدەن شىنايىلىقتى كورىپ، ونداعى وقيعا جەلىسى الەمنىڭ بارلىق اۋديتورياسىنا ۇعىنىقتى بولاتىنىنا سەنىم بىلدىرگەنىنە قۋانىپ وتىرمىن»، ̵ دەدى بۇل تۋراسىندا رەجيسسەر اقان ساتايەۆ.
«ءبىزدىڭ كومپانيا بىرنەشە ۇرپاقتىڭ تاريحىن باياندايتىن، ونىڭ ۇستىنە «وسكار» پرەمياسىنا ىلگەرىدە ۇسىنىلعان تەرەڭ درامانى پروكاتتاۋدى ماقتان سانايمىز»، ̵ دەگەن «World Wide Motion Pictures Corporation» كومپانياسىنىڭ باس ديرەكتورى پول د. حەنكوك ءسوزىن بىلاي دەپ جالعاستىردى: «امەريكالىق وتباسىلار، اسىرەسە انالار قاۋىمى جانعا جىلۋ سىيلايتىن ءفيلمدى قۋانا كورەدى».
«اناعا اپارار جول» ءفيلمى اقش (ءىرى مەگاپوليستەرگە دە) شەكتەۋلى پروكاتقا بيىل كۇزدە ءتۇرلى قازاقستاندىق جانە ازيا-امەريكالىق ۇيىمداردىڭ قولداۋىمەن شىعادى.
ايتا كەتەلىك، «اناعا اپارار جول» ءفيلمىنىڭ تۇساۋكەسەرى 38ء-شى حالىقارالىق ماسكەۋ كينوفەستيۆالىندە ءوتىپ، سىنشىلاردىڭ وڭ باعاسىن العان. سونىمەن قاتار، فيلم ءتۇرلى كينوفەستيۆالدەردەن جۇلدە الىپ، حالىقارالىق كورسەتىلىمدەرى وتكەن. سوڭعىسى ̶ 19 شىلدە كۇنى ۆاشينگتونداعى كارنەگي ينستيتۋتىندا ن.ءا.نازاربايەۆتىڭ باستاۋىمەن جاسالعان «رۋحاني جاڭعىرۋ» باعدارلاماسى اياسىندا ءوتتى.
