ءتىرى ادامدى ءولدىنىڭ قاتارىنا جاتقىزۋ ءبىزدىڭ قازاقستاندا سيرەك ورىن الاتىن جاعداي ەمەس. ءتىپتى ءبىر ادام ەكى رەت ولەدى. ءانشى قاجىمۇرات شەشەنقۇل ەمحاناعا بارسا، "ءسىز ولگەنسىز" دەگەن جاۋاپتى ەستىگەندە تاڭ قالعاننان توبە شاشى تىك تۇرعان. سۇمدىق جايتتى ءانشى الماتى ارناسىنا اڭگىمەلەپ بەرگەن ەكەن.

 «ورتاق بازاعا كىرىپ، مەنىڭ دەرەكتەرىمدى ەنگىزدى. اقپاراتقا سەنسەك، مەن 2013 جىلى قايتىس بولعان ازاماتپىن» دەيدى قاجىمۇرات. ەڭ قىزىعى، مۇنداي جاعدايدى قاجىمۇرات باسىنان ءبىرىنشى رەت كەشىپ جاتقان جوق. 2013 جىلى تۋعان ءىنىسىن ءولتىرىپ كەتىپتى. ءىنىسىنىڭ قازاسىنان كەيىن ءبىر جىل وتكەن سوڭ ماشينانى ءوز اتىنا اۋدارۋ كەزىندە ىنىسىمەن بىرگە ءوزىنىڭ دە مارقۇم ساناتىندا ەكەنىن بىلگەن.

«2014 جىلى بازادا مەنى «ولگەن» دەپ تىركەپتى. ۇزاققا سوزىلعان دالەلدەۋ پروسەسىنەن كەيىن قۇزىرلى ورگاندار قاتەلىكتەرىن مويىندادى. سودان بەرى ءتورت جىلدا ءبارى جاقسى بولاتىن. ال، ەندى ءبارى قايتادان باستالدى. جەكە كۋالىگىمدى دە اۋىستارعانمىن. ءوزىم ءتىرىمىن بە، ءولىمىن بە، بىلمەي قالدىم» دەپتى قاجىمۇرات شەشەنقۇل.

حقكو-نا بارعان قاجىمۇرات ءوزىنىڭ شاعىمىن جەتكىزەدى. بەلگىلى بولعانداي، قۇجاتتارى بويىنشا ءبارى دۇرىس. ياعني ءتىرى.

«بىزگە ءبىر كليەنت «ەمحاناعا بارسام، سەن تىرىلەردىڭ قاتارىندا جوقسىڭ دەپ ايتتى» دەپ شاعىمدانىپ كەلدى. ءبىز ءوز بازامىزدى تەكسەردىك. ءبارى دۇرىس. دەمەك ەمحانانىڭ بازاسىن جاڭارتۋ شارت» دەدى حقكو مەدەۋ اۋداندىق باسقارماسىنىڭ ءبولىم جەتەكشىسى سابينا تاۋان.

ەمحاناداعىلار بولسا، بازانى ۋاقىتىلى جاڭارتىپ وتىراتىندارىن ايتىپ الەك بولدى. دەگەنمەن وزدەرىنەن كەتكەن قاتەلىكتى مويىنداپ وتىر.