قاراتوبەنىڭ ونەر ادامدارى قولدارىنا دومبىرا ۇستاپ ساحنادا ءجۇرۋدىڭ ورنىنا قولدارىنا كۇرەك ۇستاپ اجەتحانا قازىپ جۇرگەنى جانىمىزعا قاتتى باتادى دەگەن تاقىرىپپەن بقو تاۋەلسىز كاسىپوداق ۇيىمىنىڭ ءتوراعاسى تالعات اقاۋوۆ ءوز فەيسبۋك پاراقشاسىندا جازبا جاريالادى. تاقىرىبى ايعايلاپ تۇرعان دۇنيەگە نازار سالماۋ مۇمكىن ەمەس. ونەر ادامدارىنىڭ قۇقى تاپتالىپ جاتىر دەگەن جانايقايعا ءبىز بەيجاي قاراي المايمىز. سوندىقتان دا وقىرمانمەن ءبولىسۋدى ءجون كوردىك. ءبىر ايتا كەتەرلىگى، ەكىنشى تاراپتىڭ دا تۇسىنىكتەمەسىن بەرۋگە دايارمىز.
قاراتوبە اۋدان اكىمى ورىنباسارى ج.سۇلتان جانە مادەنيەت ءبولىمى باسشىسى م.ەسەندوسوۆ ۇلتتىق ونەردى تاپتاماڭدار! ونەر ادامدارىمىزدى بىلاي قورلاماڭدار!
بقو اكىمى ا.كولگىنوۆتىڭ، وبلىستىق مادەنيەت باسقارماسىنىڭ باسشىسى ق.مۇساعالييەۆتىڭ، قوعامنىڭ جانە ونەر ادامدارىنىڭ نازارىنا!
ونەر ادامدارىنىڭ قۇقىعىن ءبىز حالىق بولىپ قورعاماعاندا كىم قورعايدى!
تۋعان جەرىم بقو قاراتوبە اۋدانىنا بارىپ جەرلەستەرىممەن كەزدەسكەندە مادەنيەت پەن ونەر سالاسىنداعى كەلەڭسىزدىكتەردى، ادىلەتسىزدىكتەردى كوزبەن كورىپ، قۇلاعىمەن ەستىگەندە وسى ءوڭىردىڭ پەرزەنتى رەتىندە جانىما قاتتى باتتى. قۇت دارىعان كيەلى وڭىردەن نەبىر ءدۇلدىل ءداستۇرلى انشىلەر مەن ەلگە تانىمال ونەر ادامدارى جانە حالىققا بەلگىلى مادەنيەت قايراتكەرلەرى شىققان. سولاردىڭ ءىزباسارلارى، وبلىسقا، رەسپۋبليكاعا تانىمال ونەر ادامدارىمىز (انشىلەر مەن كۇيشى جانە تەرمەشىلەردىڭ) قولدارىنا دومبىرا،قوبىز، ميكروفون ۇستاپ، كيەلى شاڭىراق ساحنادا ءجۇرىپ، اۋدانىمىزدىڭ ونەر سالاسىن ارتتىرۋعا ۇلەس قوسۋدىڭ ورنىنا وسى سالاعا تىكەلەي جاۋاپتى قاراتوبە اۋدان اكىمى ورىنباسارى ج.سۇلتان جانە مادەنيەت ءبولىمى باسشىسى م.ەسەندوسوۆ ولاردىڭ قولدارىنا كۇرەك، بالعا، شەگە، قىسقاش پەن سىر بەرىپ قويىپ اجەتحانا قازدىرىپ، اۋىر جۇمىستارعا سالىپ، ىستىق كۇننىڭ استىنا قۇل سەكىلدى قارا جۇمىسقا سالىپ جەگىپ قويىپتى.
قازاق حالقى ۇلتتىق ونەردى باعالاعان، ونەر ادامدارىن قۇرمەتتەگەن!
ەي، سۇلتان مەن ەسەندوسوۆ باستىقسىماقتار! ۇلتتىق ونەردى بىلاي تاپتاماڭدار! ونەر ادامدارىن ولاي قورلاماڭىزدار! ۋاقىتشا جۇرگەن لاۋازىمدارىڭدى پايدالانىپ، ونەر ادامدارىنا دىكىڭدەپ، قارا جۇمىسقا جەكپەڭدەر! وندايعا حالىق بولىپ جول بەرمەيمىز!
قازاق حالقى ونەردى باعالاعانىن جانە ونەر ادامدارىن قۇرمەتتەگەنىن ۇمىتپاڭدار! قولدارىڭنان ءىس كەلمەسە ورىنىڭدارىڭدى بوساتىڭدار، كرەسلوعا جابىسىپ الماي! حالىق ونەر ادامدارىنىڭ قولىنا كۇرەك ۇستاپ بيرجا جۇمىسشىلارى سەكىلدى قارا جۇمىستا جۇرگەنىن قالامايدى، كەرىسىنشە قولدارىنا دومبىرا ۇستاپ ساحنادا ءداستۇرلى ءان شىرقاپ، دومبىرانى كۇمبىرلەتىپ، اۋدانىمىزدىڭ ونەرىن دامىتۋعا، ەلىمىزدىڭ مادەنيەت سالاسىن كوتەرۋگە اتسالىسقانىن قالايدى!
جاۋاپ كۇتەمىز، وسىدان قورىتىندى شىعارۋدى تالاپ ەتەمىز!
تالعات قاتاۋوۆ، بقو تاۋەلسىز كاسىپوداق ۇيىمىنىڭ ءتوراعاسى.
پىكىر قالدىرۋ