الاكول اۋدانىنىڭ قابانباي اۋىلىندا «ءبارى دە راحمەت ءۇشىن!» اتتى الەۋمەتتىك دۇكەنى اشىلدى. اۋدانداعى تۇڭعىش قايىرىمدىلىق دۇكەنى كاسىپكەرلەر پالاتاسى جانىنداعى ىسكەر ايەلدەر كەڭەسىنىڭ باستاماسىمەن قۇرىلىپ، «يسكوركا» سۋپەرماركەتىندە ورنالاستى.
مۇقتاج اۋىل تۇرعىندارى، وتباسىلار مەن ەرەكشە قاجەتتىلىگى بار بالالار ءۇشىن تەگىن تۇردە ازىق-تۇلىك پەن شارۋاشىلىق تاۋارلارى، كيىمدەر مەن مەكتەپ زاتتارى بەرىلەدى.
««ءبارى دە راحمەت ءۇشىن!» دۇكەنىنە ءبىزدىڭ كاسىپكەرلەر مەن اۋىل تۇرعىندارى بەلسەندى قولداۋ ءبىلدىردى. باستاماعا ءوز ۇلەسىن قوسۋعا بارلىق ازاماتتاردى شاقىرامىز. باستىسى، بۇل ءبىر رەتتىك شارا ەمەس، كومەك تۇراقتى تۇردە كورسەتىلىپ وتىرادى»، - دەيدى دۇكەن جەتەكشىسى، كاسىپكەر عاليا كەنجاساروۆا.
ايتا كەتەيىك، قايىرىمدىلىق كورسەتۋ ورنىن اشۋ تۋرالى ۇسىنىس وسىعان دەيىن الاكول اۋدانى ىسكەر ايەلدەرىنىڭ ءبىرىنشى فورۋمىندا ايتىلعان بولاتىن.
«قابانباي اۋىلىنىڭ ايەل كاسىپكەرلەرىنىڭ باستاماسى قازىرگى كەزدەگى وتە قاجەتتى جانە ماڭىزدى ءىس دەپ ويلايمىن. ويتكەنى، بىزدەر بولماساق، قيىن جاعدايعا تاپ بولعاندارعا قول ۇشىن كىم بەرەدى؟! وسىلايشا ءبىر اۋىزدان جاسالعان كومەك مۇقتاج ازاماتتاردىڭ قۇلازىعان كوڭىلدەرىنە دەمەۋ بولادى»، - دەپ اتاپ ءوتتى الاكول اۋدانى ىسكەر ايەلدەر كەڭەسىنىڭ ءتورايىمى بارشاگۇل ساياتوۆا.
ەسكە سالساق، «ءبارى دە راحمەت ءۇشىن!» الەۋمەتتىك دۇكەندەرى تالدىقورعان، تەكەلى، قاپشاعاي قالالارىندا، سونداي-اق، اقسۋ، قاراتال، كەربۇلاق، رايىمبەك، تالعار اۋدانىندا جۇمىس ىستەيدى.
پىكىر قالدىرۋ