تۇركىستان وبلىسىنداعى اباي اۋىلىندا زورلانعان 7 جاستاعى بالانىڭ ىسىنە قاتىستى جاڭا دەرەك. بۇعان دەيىن ءوزىنىڭ قورعاۋىنداعى ءجاسوسپىرىمنىڭ زورلانعانىن دالەلدەي الماي جۇرگەن سەنىمدى وكىل ەندى باس پروكۋراتۋرانىڭ رەسمي مالىمدەمەسىنەن كەيىن مەكتەپ ديرەكتورلارى مەن تاربيە جونىندەگى ورىنباسارلارىن جانە پسيحولوگتاردى سوتقا بەرمەكشى. قۇرمانعازى ءمۇسىر سونداي-اق، قۇپيا جۇرگىزىلگەن تەرگەۋ ءىسىنىڭ كەيبىر قۇجاتتارىن پەداگوگتارعا جاريا ەتكەن تەرگەۋشىنى دە جازاعا تارتۋدى كوزدەپ وتىر. ال، اۋداندىق ءبىلىم ءبولىمى بولسا، وسى ىسكە قاتىستى ەكى ادامدى جۇمىستان بوساتىپ، ءبىرىنىڭ تاعدىرىن الداعى ۋاقىتتا شەشەتىنىن ايتىپ ۇلگەردى. بۇل تۋرالى ەۋرازيا ءبىرىنشى ارناسى حابارلايدى.
زورلانعانى دالەلدەنگەن ءجاسوسپىرىمنىڭ سەنىمدى وكىلى قۇرمانعازى ءمۇسىر وسى ىسكە قاتىستى كەيبىر ۇستازداردى جاۋاپقا تارتۋدى كوزدەپ ءجۇر. ەگەر ولاردىڭ كىناسى دالەلدەنەتىن بولسا، وندا ءبىرقاتار ادامنىڭ تاعدىرى كۇرت وزگەرۋى مۇمكىن.
«الدىن ءبىز كۇتكەن بولاتىنبىز، تەرگەۋ امالدارىن دالەلدەنەتىنىن نەمەسە دالەلدەنبەيتىنىن. بۇگىنگى تاڭدا رەسمي مالىمەت بەرىلدى باس پروكۋراتۋرامەن. دالەلدەنىپ وتىر. سول سەبەپتەن بۇگىن ارىز وتكىزەمىز پروكۋراتۋراعا. ياعني، مەكتەپ پسيحولوگتارىنا، تاربيە جونىندەگى مەكتەپ ديرەكتور ورىنباسارىنا، مەكتەپ ديرەكتورىنا قىلمىستىق ءىس قوزعاۋ بويىنشا» - دەيدى جابىرلەنۋشىنىڭ سەنىمدى وكىلى قۇرمانعازى ءمۇسىر.
سونداي-اق، ءاۋeل باستا، تەرگەۋ امالدارىن جۇرگىزگەن اۋداندىق ىشكى ىستەر ءبولىمىنىڭ قىزمەتكەرى دە زاڭ جۇزىندە جاۋاپ بەرۋى ءتيىس دەيدى قۇرمانعازى ءمۇسىر. ايتۋىنشا وزىنە بەيمالىم بولعان كەيبىر قۇجاتتار وزگەلەردىڭ قولىندا ءجۇر ەكەن.
«بىلايشا ايتقاندا، دوستۋپ بولعان. اشىپ كورىپ، ءوز ىڭعايىنا قارايتىن. نەمەسە تەرگەۋ جۇرگىزگەن تەرگەۋشى سول كىسىلەردىڭ ىڭعايىنا ويناعان. ياعني، سول كىسىلەرگە بارلىق مالىمەتتى بەرىپ، قولايلى جاعداي جاساعان» - دەيدى جابىرلەنۋشىنىڭ سەنىمدى وكىلى قۇرمانعازى ءمۇسىر.
وسى كۇنى 7 جاسار بالا مەن وعان زورلىق كورسەتتى دەگەن جاسوسپىرىمدەر وقىعان قوس مەكتەپتە تولقۋ باسىلعان جوق. وسى ىسكە قاتىستى ءبىر ءبىلىم ۇياسىنىڭ تاربيە ءىسى جونىندەگى ورىنباسارى قىزمەتىنەن كەتسە، ديرەكتوردىڭ ءبىرى زەينەت جاسىنا بايلانىستى دەمالىسقا شىعىپتى. ەكىنشى ديرەكتوردىڭ ءىسى الداعى كۇنى "نۇر وتان" پارتياسىنىڭ بيۋرو وتىرىسىندا قارالماقشى. سوندىقتان، ەكى مەكتەپتە دە ءقازىر باسقا ادامدار ۋاقىتشا جەتەكشىلىك ەتىپ جاتىر. ونىڭ ءبىرىنىڭ تىزگىنىن شارۋاشىلىق ءىسى جونىندەگى ورىنباسارىنا سەنىپ تاپسىرىلعان. ءبىراق، ەكەۋى دە بۇل ىسكە ەش قاتىسىم جوق دەيدى.
«پسيحولوگتار دا وتپۋسكىدە. ءبىر پسيحولوگىمىز شىقتى جۇمىسقا. ەندى شاراسىن قولدانعاندار قولدانىپ جاتىر، ەندى مەنىڭ بۇل بويىنشا حابارىم جوق» - دەيدى ج. بالاساعۇن اتىنداعى ورتا مەكتەپ ديرەكتورىنىڭ مىندەتىن ۋاقىتشا اتقارۋشى بيبىگۇل سمانالييەۆا.
«ەندى بولدىم، ەكى كۇن ءوتتى. جوق ءالى، ءقازىر كاپرەمونت جاساپ جاتىرمىز» - دەيدى ءو.جانىبەكوۆ اتىنداعى ورتا مەكتەبى ديرەكتورىنىڭ مىندەتىن اتقارۋشى ناريمان ءسابيتوۆ.
ايتپاقشى، وسىدان ەكى اي بۇرىن اباي اۋىلىنداعى مەكتەپتەردە استانالىق ماماندار ءبىر اپتا بويى تەكسەرۋ جۇرگىزىپتى. قۇرامىندا پروكۋراتۋرا مەن بالالار قۇقىعىن قورعاۋ كوميتەتىنىڭ قىزمەتكەرلەرى بار جۇمىس توبى ءبىرقاتار كەمشىلىكتەردى انىقتاپ بەرگەن.
«كەمشىلىكتەر بويىنشا جالعىز ابايداعى 6 مەكتەپ عانا ەمەس ول بارلىق مەكتەپتەردە كەزدەسەتىن نارسە عوي. سول بويىنشا ءىس شارا ءتۇزىپ، جۇمىس الداعى تامىزدا ديرەكتورلار جۇمىسقا تۇسەدى سول كەزدە قولعا الاتىن بولامىز» - دەيدى سارىاعاش جانە كەلەس اۋداندارى ءبىلىم ءبولىمى باسشىسىنىڭ مىندەتىن قوسا اتقارۋشى نۇرمان ۇسىپبايەۆ.
قوعام نازارىن وزىنە اۋدارعان بۇل قىلمىستىق ءىس جۋىردا سوتقا جولداندى. ايىپتاۋ اكتىسىمەن ءبىر ءجاسوسپىرىم انىقتالىپ وتىر. سەنىمدى وكىلدىڭ سوزىنشە، سوت وتىرىسى جابىق ەسىك جاعدايىندا وتەتىن كورىنەدى. ال، جابىرلەنۋشى بالاعا كەلەتىن بولساق، ول الماتىدا اناسىنىڭ جانىندا ەكەن. ەكى اپاسى اباي اۋىلىندا تۇرىپ جاتىر.
