وسى اپتادا الەۋمەتتىك جەلىدە قىزۋ تالقىلانعان تاقىرىپتاردىڭ ءبىرى شەتەلدىڭ «Sanofi» كومپانياسىنا قاتىستى. فارماسيەۆتيكا سالاسىنىڭ الىبى قازاقستان نارىعىندا ونىمدەرىن ساۋدالاۋ ءۇشىن بارماق باستى، كوز قىستى ارەكەتتەرگە بارعان. جانە سول ءۇشىن جاۋاپقا دا تارتىلىپتى.
بەلگىلى بولعانداي، فيرمانىڭ ورتالىعى ورنالاسقان اقش بيلىگى فارمكومپانيانىڭ بۇل بىلىقتارىن ءبىلىپ قويعان. ءسويتىپ، جەمقورلىقتى سۋ قانى سۇيمەيتىن ولار جازانىڭ ەڭ ءتيىمدى ءادىسىن قولدانعان كورىنەدى. اتى دارداي كومپانياعا 25 ملن دوللار ايىپپۇل سالىپ، ءبىراز شىعىنداتىپتى. كومپانيا بولسا بۇل ىسكە قاتىسى بارى-جوعى تۋرالى ءتىس جارماعانىمەن، ايىپپۇلدى تولەۋگە ءۇنسىز كەلىسكەن ەكەن. وسىدان كەيىن ءبارى جاقسى دەپ، ماسەلەنى جىلى جاۋىپ قويا سالۋعا بولار ەدى. الايدا، وقيعانىڭ كولەڭكەلى تۇستارى كوپ بولىپ تۇر. پارانى بەرگەندەر تۋرالى ەستىدىك. ال، پارانى العان كىمدەر سوندا؟ بۇل تۋرالى ەۋرازيا ءبىرىنشى ارناسى حابارلايدى.
ءقازىر باسىڭ اۋىرىپ، بالتىرىڭ سىزداعانى بىلاي تۇرسىن، ءسال سۋىق تيسە بولدى، جانىمىز شىعىپ ءدارىحانا جاعالايتىنىمىز بار.
الايدا، سول دەنساۋلىعىمىزعا ماڭىزدى دارى-دارمەكتىڭ ءوزى ەلگە جەمقورلىقپەن جەتكىزىلەدى ەكەن.
بۇل تۋرالى جۋىردا اقش-تىڭ قىمبات قاعازدار مەن بيرجا جونىندەگى كوميسسياسى جەكە سايتتارىندا جاريالادى. بەلگىلى بولعانداي، فرانسۋزدىڭ «Sanofi» فارمكومپانياسى ونىمدەرىن قازاقستان نارىعىندا ساۋدالاۋ ءۇشىن ەل شەنەۋنىكتەرىنە پارا بەرگەن كورىنەدى.
ءبىراق، ءقازىر جۇرتتى قىزىقتىرىپ وتىرعانى باسقا. پارانى بەرگەندەر جونىندە ەستىدىك دەيىك. ال، سوندا ونى العان كىم؟
مۇنى باس دارىگەردىڭ وزىنەن سۇراپ ءبىلۋدى ءجون كوردىك. الايدا، ول كىسى بۇل جونىنەن حابارسىز بولىپ شىقتى!
«ءبىزدىڭ ەلدە بۇل كومپانياعا يا ولاردىڭ ديستريبيۋتەرلەرىنە پارا بەرۋ، نەمەسە باسقا دا قىلمىستىق قۇقىق بۇزۋشىلىقتار فاكتىلەرى تىركەلمەگەن» - دەيدى ق ر دەنساۋلىق ساقتاۋ ءمينيسترى ەلجان ءبىرتانوۆ.
بۇل سۇراقتىڭ ەندى كوپ سۇراقتاي كوكەيىمىزدە كولكىپ قالارى ءسوزسىز! ءبىراق، قامىقپاڭىزدار!
ويتكەنى، ءار وقيعادان مەملەكەت بولسىن، ادام بولسىن، وزىنە پايدالى ءبىر دۇنيە ءتۇيىپ جاتادى!
بىزدىڭشە، ءدال وسى ماسەلەدە بىزگە اقش تاراپىنىڭ ارەكەتى ۇلگى بولۋ كەرەك.
فارمكومپانيانىڭ بارماق باستى، كوز قىستى ارەكەتكە بارعانىن ءبىلىپ قويعان ولار، كومپانياعا 25 ملن دوللار ايىپپۇل سالىپ، جەمقورلىقپەن كۇرەستىڭ جارقىن ۇلگىسىن كورسەتتى!
«ايىپپۇل تۇرعىسىنان كەلگەندە امەريكانىڭ قىلمىستىق زاڭدارى بىزگە قاراعاندا قاتال. ويتكەنى بىزدە قىلمىستىق زاڭ بويىنشا ەڭ الدىمەن زاڭدى تۇلعالاردى قىلمىسقا تارتپايمىز، ءبىز تەك جەكە تۇلعالاردى جاۋاپقا تارتامىز. ودان كەيىن تاعايىنداۋ مۇمكىن بولاتىن ايىپپۇل مولشەرى ايلىق ەسەپتىك كورسەتكىش يا پارا مولشەرىمەن عانا شەكتەلەدى» - دەيدى زاڭگەر نۇرلان نيەتۋللايەۆ.
