تاعدىرىڭنىڭ جاپقانىڭشا ەسىگىن،
وكپەلەۋدەن تۇرماۋ كەرەك شەشىمىڭ.
اينالاڭا ءوتۋ ءۇشىن تىك قاراپ،
بۇل ومىردە كەرەك ەكەن كەشىرىم.
كەيدە بىرەۋ تىجىرايتىپ شەكەسىن،
ءاجۋالاپ ايتسا-داعى كەكەسىن.
كەشىر ونى،شامىرقانبا،شاپشىما،
سوندا عانا مۇراتىڭا جەتەسىڭ.
كەشىرىم ەت اياعىڭنان شالعاندا،
جىلى قارا جۇمباعى كوپ جالعانعا.
ءوزىڭ كەيدە جاساي قالساڭ قاتەلىك،
"كەشىرىم"-دەگەن ءسوزدى ايتۋعا ارلانبا.
تالاي پەندە كەكتەسكەننەن سورلاعان،
وشپەندىك پەن ءوز تاعدىرىن تورلاعان،
مىڭ كەشىرىم سۇراپ تۇرىپ،تاڭىردەن،
سەن بىرەۋدى كەشىرمەسەڭ سول جامان.
وتكەن كۇننىڭ سابىرى ەكەن-كەشىرىم،
كەلەر كۇننىڭ راحىمى ەكەن-كەشىرىم.
كەشىرىمنىڭ ءسينونيمى ەكەن عوي،
ءتورت ءارىپتى"ادام"دەگەن ەسىمىڭ.
امانجول ءالتاي
پىكىر قالدىرۋ