«Baikonyr Short Film Festival» بيىل دا جالعاسىن تاۋىپ، ءۇش كۇنگە جالعاسقان قىسقامەترلى فيلمدەر فەستيۆالىنىڭ جەڭىمپازدارى انىقتالدى. دەرەكتى، انيماسيالىق جانە كوركەم فيلم سەكسياسى بويىنشا ساراپقا تۇسكەن تۋىندىلار 13 اتالىم بويىنشا ماراپاتتالدى.

بايقاۋ قورىتىندىسى بويىنشا «برودۆەي تاڭداۋى» اتالىمىن «ديكيە دني» ءفيلمى (رەج.: سامعار راحىم) جەڭىپ الدى. ال «قازىلار القاسىنىڭ ارنايى جۇلدەسىن» قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ الماتىداعى وكىلدىگىنىڭ ديرەكتورى سەرگەي توحتاروۆ مىرزا رەجيسسەر امير امەنوۆكە «قىستىڭ سوڭى» ءفيلمى ءۇشىن تابىستادى. رەجيسسەر بەرىك جاحانوۆتىڭ «اسان» فيلمىندەگى اكەسىن تەك جانازاسىندا كورىپ، ءبىر ساتتە موينىنا جاۋاپكەرشىلىك جۇگىن ارقالاعان 17 جاسار بوزبالانىڭ ءرولىن سومدايتىن ازات ءجۇمادىل «ۇزدىك اكتەر» اتانسا، «ۇزدىك اكتريسا» اتالىمىن «سامال» (رەج.: شۇعىلا سەرجان) فيلمىندەگى جانەليا اليكوۆا يەلەندى. جەڭىمپازعا ارنايى كينولەنتا سيپاتىندا جاسالعان مۇسىنشەنى پروديۋسەر، تەلەجۇرگىزۋشى الاگوزوۆا بايان ماقسات قىزى تابىستادى. «ۇزدىك انيماسيالىق فيلم» جانە «ۇزدىك قويۋشى-سۋرەتشى» جۇلدەسىن قازىلار القاسىنىڭ مۇشەسى، رەجيسسەر، قويۋشى-سۋرەتشى اداي ءابىلدينوۆ «ءىىى بايقوڭىر» كينوفەستيۆالىنىڭ ءساتتى اياقتالۋىمەن بارشا كينو سۇيەر قاۋىمدى قۇتتىقتاي وتىرىپ، «وركەش» انيماسيالىق ءفيلمى ءۇشىن رەجيسسەر يۆان ارداشوۆتى ماراپاتتادى. «ۇزدىك دەرەكتى فيلم» اتالىمى قازاق ۇلتتىق ونەر ۋنيۆەرسيتەتىنىڭ «كوركەم فيلمدەر رەجيسسۋراسى» ماماندىعى بويىنشا ءبىلىم الىپ جاتقان، «ۇشقىن» ستۋدەنتتىك كينوفەستيۆالىنىڭ گران-پري يەگەرى نۇرسۇلتان نۇسقابەكوۆكە «قاساپشىنىڭ ءبىر كۇنى» تۋىندىسى ءۇشىن تابىستالدى. ال «ۇزدىك تاجىريبەلىك فيلم» جەڭىمپازىنا «يا ليۋبليۋ سموترەت، كاك ۋميرايۋت دەتي» (رەج.: الىبەك ءابدىحالىق) ءفيلمى ىلىكتى. وسى ورايدا، تەك قانا وتاندىق كوركەم فيلمدەر مەن دەرەكتى جوبالاردى كورسەتەتىن ەلىمىزدەگى تۇڭعىش ارنا «ەل ارنا» تەلەارناسىنىڭ ديرەكتورى ارمان بالتاباي ۇلى – جاس كينوگەرلەردىڭ تۋىندىلارىن ءوز جۇمىستارى تۋرالى بايانداۋىنا مۇمكىندىك بەرىپ، كورەرمەندەردىڭ جاڭا كينولاردى تاماشالاۋىنا جول اشاتىندارىن جەتكىزدى. بۇل – شىعارماشىلىعىن ەندى عانا باستاعان جاس كينوگەرلەرگە تەلەارنا تاراپىنان كورسەتىلەتىن اسا اۋقىمدى قولداۋ بولماق.

سونىمەن قاتار، «بايقوڭىر» كينوفەستيۆالىنە العاش رەت «ۇزدىك دىبىس» اتالىمى ەنىپ، رەجيسسەر ماييا عالىمنىڭ «چەمپيون» ءفيلمى جەڭىمپاز اتاندى.

سونداي-اق، «ۇزدىك وپەراتور» اتالىمى اسىرەسە دەرەكتى فيلم تۇسىرۋدەگى وپەراتورلىق جۇمىستىڭ كۇردەلىلىگىن ەسكەرە وتىرىپ، «Uzbek Elegy» ءفيلمىنىڭ رەجيسسەرى ءارى وپەراتورى باحتيار يسلاموۆقا بۇيىردى.

كۇللى كينوسۇيەر قاۋىم تاعاتسىزدانا كۇتكەن «باس جۇلدە» يەگەرى رەجيسسەر تيمۋر سەرداليننىڭ «قوش بول دوسىم» ءفيلمى بولىپ تابىلدى. سونىمەن قاتار جەڭىمپاز فيلم قازىلاردىڭ ادىلدىگىنە، كورەرمەننىڭ بيىك تالعامىنا سايكەس، «ۇزدىك رەجيسسەر» جانە «ۇزدىك سەناريي» اتالىمدارى بويىنشا دا قوس ماراپاتقا ىلىكتى.

عارىشتى باعىندىرۋ يدەياسىمەن باستالىپ، جىل سايىن اۋقىمى كەڭەيىپ كەلە جاتقان بايقاۋدىڭ كەلەر جىلى دا ءوز جالعاسىن تاۋىپ، جاس كينوگەردىڭ شىعارماشىلىق ومىرىنە داڭعىل جول اشارىنا سەنىمىمىز كامىل.

ايجان ەcەنگەلدى

ت.جۇرگەنوۆ اتىنداعى ءقۇوا

«كينوتانۋ» ماماندىعىنىڭ

IV كۋرس ستۋدەنتى