زەينەپ احمەتوۆاعا حابارلاسقانىمىزدا، شىنى كەرەك، قاتتى اشۋلاندى. شالبار ءۇشىن داۋ شىعارىپ جۇرگەن جاستارعا نالىدى.
اقتوبەلىك ءتىلشى گۇلسايا ىبىراي شالبار كيىپ بارعانى ءۇشىن سۇحبات بەرمەي قويعان زەينەپ احمەتوۆاعا رەنىشىن ءبىلدىرىپ، Facebook-تەگى پاراقشاسىندا جازبا قالدىرعان ەدى. ايتۋىنشا، سۇحبات الۋ ءۇشىن الدىمەن «ونەر ورتالىعىنا» بەتتەپ، كەيىن 2 جارىم ساعات كۇتىپ، تابا الماي، اقىرى تاپقاندا قۋانىشى ۇزاققا سوزىلماپتى. شالبار كيگەنى ءۇشىن كەشىرىم سۇراعان ءجۋرناليستتى زەينەپ احمەتوۆا ەلەمەپتى-مىس.
«...قاسىنا جاقىنداپ، امانداسىپ، شالبار كيىپ كەلگەنىمە كەشىرىم سۇراپ، ءبىر اۋىز پىكىر سۇرادىم. ماعان جاقتىرماعان كۇيى كوز تاستادى دا، «شالبار كيگەن جۋرناليسكە سۇحبات بەرمەيمىن» دەدى. توسىلىپ قالدىم. ءجۇرىپ كەتتى. سوندا كەشەلى بەرى سۇحبات الىپ جۇرگەن تەليەۆيزيونششيكتەر بۇرمەلى كويلەك كيىپ، باسىنا ورامال تاعىپ پا ەكەن؟»، - دەپ جازدى گۇلسايا ىبىراي.
جەلى قولدانۋشىلاردىڭ اراسىندا باۋىرجان باتىردىڭ كەلىنى زەينەپ احمەتوۆانى جاقتاۋشىلار دا، ارەكەتىن سىناۋشىلار دا تابىلدى. ماسەلەن، ءبىرى مۇنى پرينسيپ دەپ تۇسىنسە، ەندى ءبىرى ديسكريميناسيا دەپ ءتۇيىن ءتۇيدى.
كەزىندە زەينەپ احمەتوۆادان ءوزىمنىڭ دە پىكىر العان ءساتىم ەسىمە ءتۇستى. مۇحتار اۋەزوۆ اتىنداعى دراما تەاترىندا وتكەن ءبىر اقىننىڭ 60 جىلدىق مەرەيتويىنا بارعانمىن. بۇتىمدا شالبار... تەاترعا شالبارمەن باردى دەپ سوگە كورمەڭىزدەر، جوسپارلانباعان كەش ياكي جۇمىستان اياق استى جىبەرگەن بولاتىن. كەش اياقتالعان سوڭ تالاي اقىن-جازۋشى مەن ەلىمىزدىڭ بەلدى تۇلعالارىنان ءبىر اۋىز پىكىر الۋدى ءجون كوردىم. اراسىندا زەينەپ احمەتوۆا دا بار. «ماعان بۇگىنگى كەش جايلى پىكىرىڭىزدى ايتىڭىزشى؟» دەپ سۇراعانىمدا كەشتەن شابىتتانىپ شىققان زەينەپ حانىم قۋانا-قۋانا پىكىر ءبىلدىردى. بۇل وقيعا ەسىمە تۇسكەن بويدا مۇندا ءبىر گاپ بار شىعار دەگەن ويمەن زەينەپ احمەتوۆانىڭ وزىنە حابارلاستىم. ول كىسى وقيعادان حاباردار ەكەن، اشۋعا ءمىندى. «مەنىڭ ايتىپ جۇرگەن دۇنيەلەرىمدى قۇلاقتارىڭا ىلمەي، ءبىر شالبارعا بولا سونشا داۋ تۋدىرىپ جاتسىڭدار ما؟» دەپ قارىمتا سۇراق قويدى. نە دەگەنمەن جاعدايدى ءتۇسىندىرىپ، سول وقيعا جونىندە ءبىر پىكىرىن بىلەيىن دەگەن ماقساتپەن جاۋابىن الۋعا تىرىستىم. اڭگىمە تەلەفون ارقىلى بىلايشا ءوربىدى:
«قىرىق شاقتى جۋرناليست جينالعان كەزدەسۋگە باردىم. سول جەرگە كىرەر الدىندا شالبار كيگەن اياعى اۋىر ايەل كەلدى دە سۇحبات بەرۋىمدى سۇرادى. مەن شىنىمدى ايتتىم، ونىڭ ۇستىنە زەكىپ ەمەس، كۇلىپ ايتتىم: «مەن شالبار كيگەن قىزدارعا سۇحبات بەرمەۋشى ەدىم. ءقازىر جۋرناليستەرمەن كەزدەسۋ بولادى. سوندا كىرە عوي، كەرەگىڭنىڭ ءبارىن الاسىڭ» دەدىم. ال ول كىرگەن جوق. ەگەر وعان مەنىڭ سۇحباتىم، اڭگىمەم قاجەت بولسا، كىرەر ەدى. ءبىراق الگى جۋرناليست ول جەرگە تىرناقتىڭ استىنان كىر ىزدەپ كەلگەن ادام. نەگە كىرمەدى كەزدەسۋگە؟ كەيىن «ماعان زەكىدى» دەپ جازىپ جىبەرىپتى. مەن ەشقاشان زەكىپ سويلەمەيمىن، ويىمدى اشىق ايتامىن. شالبار كيگەن قىزدارعا دا تالاي ايتتىم: «شالبار كيگەن قىزدارمەن تۇسپەۋشى ەدىم، تۇسەيىن، ءبىراق كەلەسى جولى كويلەگىڭدى كيىپ كەل» دەيمىن دە تۇسە بەرەمىن»، - دەگەن جازۋشى ءارى قاراي شالباردىڭ زيانى تۋرالى ايتتى.
«شالباردىڭ قىز بالا ءۇشىن قانشالىقتى زيان ەكەنىن ايتۋدان جالىقپايمىن. ايەلدىڭ باسىنا، اسىرەسە، جاس قىزداردىڭ باسىنا ءتونىپ تۇرعان ءقاۋىپ. ءقازىر بەلى، سۇيەگى جوق قىزدار كوبەيدى. تىرىستىرىپ شالبار كيگەندىكتەن بەلى مەن سۇيەگىنىڭ فورماسى وزگەرەدى. مىقىنى جوق ادام ەرتەڭ قالاي بالا تۋادى؟ وندايدا بالانى سويىپ الادى. انا مەن بالانىڭ اراسىنداعى بىزگە كورىنە بەرمەيتىن بايلانىس تولعاقتا جاتقان شىعار. اجەلەرىمىز «دۇنيەدەگى ەڭ قاتتى اۋرۋ – تولعاق، ەڭ ۇمتىلاتىن اۋرۋ دا – تولعاق» دەپ ايتىپ وتىراتىن. شىنىندا سولاي، قالاي بوساناسىڭ، سولاي ۇمىتاسىڭ. ال تەمىرمەن كەسىپ الىنعان جاعدايدا قانداي كەمدىگى شىعاتىنىن ەشكىم ايتا المايدى. انا مەن بالانىڭ اراسىنداعى بايلانىس ۇزىلە مە، مەيىرىم جويىلا ما، بەلگىسىز.
الگى قىزدار نە قالاسا، سونى كيسىن. ماعان كەلىپ-كەتەر ەشتەڭە جوق. تەك جانىم اشىعاندىقتان ايتامىن. تىرىسقان شالبار كيەدى. ول مىقىنداعى سۇيەكتىڭ فورماسىن وزگەرتەدى. ايەل ادامعا سان بەرەتىن قۇيرىقتىڭ فورماسىن وزگەرتەدى. تىرىسقان شالباردىڭ كەسىرىنەن وزدىگىنەن بالا تۋا الماي ءجۇر. جۇرت مۇنى «زەينەپ اپانىڭ مىنەزى» دەپ ويلايدى. مەن جانىم اشىعاندىقتان ايتامىن.
اۋرۋ بالاسىن العا تارتىپ، ەلدەن ايانىش كۇتۋدىڭ نە قاجەتى بار. ماقساتىم – بابامنىڭ اماناتىن ەرتەڭگى ۇرپاققا جەتكىزۋ. شالباردى بۇگىنگى زاماننىڭ كيىمى دەپ ايتارسىزدار. ءيا، مەن دە كيەمىن. الىس جولعا شىققاندا، تاۋ جاققا قىدىرۋعا بارعاندا، بۋىندارىم بوساسىن دەپ كەلىندەردىڭ ايتقانىنا قاراماي ەدەن جۋعاندا كيەمىن. ءار نارسەنىڭ ورنى بار. اسىرەسە اياعى اۋىر ايەلگە مىقىندى قىسىپ كيۋ وتە ءقاۋىپتى. «كۇرە تامىردى» وقىسا، ول قىز ءوزى دە تۇسىنەر ەدى. مەنىڭ كىتاپتارىمدى وقىماعان، وقىسا دا تۇسىنبەگەن، تۇيسىنبەگەن، سۇحبات الماقشى. ايتا بەرسىن...»، - دەپ پىكىرىن ءبىلدىردى زەينەپ احمەتوۆا.
