«ءار تۇركى مەملەكەتى تۇركىستانعا بىر-بىردەن اۋدان سالىپ بەرسە»، - دەپ جازدى فەيسبۋك قولدانۋشىسى سادىق شەرىمبەك ەلباسىنىڭ تۇركىستان وبلىسىنداعى ساپارىنان كەيىن. ءتىپتى سادىق شەرىمبەك اۋدانداردى قالاي اتاۋعا بولاتىنىنا دەيىن ۇسىنىس تاستاپتى.

«ول اۋدانداردى سيمۆوليكالىق تۇردە سول ەلدەردىڭ اتىمەن ياكي استانالارىنىڭ اتىمەن اتاپ قويساق. مىسالى، تۇركيا/انكارا اۋدانى، ءازىربايجان/باكۋ اۋدانى، ماجارىستان/بۋداپەشت اۋدانى، وزبەكستان/تاشكەنت اۋدانى، تۇركىمەنستان/اشقاباد اۋدانى، تاتارستان/قازان اۋدانى»، - دەپ جازدى سادىق مىرزا.

ءسوز سوڭىندا، تۇركىستاندى كۇللى تۇركى ەلىنىڭ استاناسى دەپ ۇرانداتىپ جۇرگەن مەملەكەتتەرگە سوزدەرىن ىسپەن دالەلدەسە دەگەن نيەتىن ءبىلدىردى. ال جەلى قولدانۋشىلارى فەيسبۋك بەلسەندىسىنىڭ باستاماسىن قولداي كەتتى.  

ايتا كەتەيىك، قىركۇيەكتىڭ سوڭىندا نۇرسۇلتان نازاربايەۆ رەسمي ساپارمەن تۇركىستان وبلىسىنا باردى. ساپارى بارىسىندا تۇركىستان وبلىسىن دامىتۋداعى ءتۇرلى جولداردى اتاپ، 2-3 جىلدا ەڭسەسى بيىك وبلىس قۇرىلارىنا سەنىم ءبىلدىردى. ءارى تۇركىستاننىڭ تاعلىمى مول تاريحىنا توقتالىپ ءوتىپ، تەك قازاق ەلى ءۇشىن عانا ەمەس، بۇكىل تۇركى حالىقتارى ءۇشىن رۋحاني استانا ەكەنىن اتاپ ءوتتى.

 «قاسيەتتى تۇركىستانعا دەگەن ماقتانىش سەزىمى ءار قازاقتىڭ جۇرەگىندە ۇيالاعان. تۇركىستان تەك بىزگە عانا ەمەس، كۇللى تۇرىك جۇرتشىلىعىنا قاسيەتتى ءارى ءقادىرلى مەكەن. حالقىمىزدا «ءمادينادا مۇحاممەد، تۇركىستاندا ياسساۋي» دەگەن ءسوز بار. وسىنداي سان الۋان فاكتورلار تۇركىستاندى تۇتاس تۇران دوداسىنىڭ، ءتۇبى ءبىر تۇركى جۇرتىنىڭ رۋحاني ورتالىعىنا اينالدىردى. تۇركى الەمىنىڭ مادەني ورتالىعىن دەپ تانىلدى»، - دەدى تۇركىستانعا بارعان ساپارىندا.

ەلباسى تۇركىستاننىڭ تۇركى ەلدەرىنە ورتاق ەكەنىن بۇعان دەيىن دە تالاي مارتە ايتىپ كەلەدى. ماسەلەن تۇركى ەلدەرىنىڭ VI سامميتىندە تۇركى مەملەكەتتەرىنە وبلىستى دامىتۋدا بىرلەسىپ جۇمىس ىستەۋ كەرەكتىگىن تىلگە تيەك ەتكەن.

«ەجەلدەن قاسيەتتى سانالاتىن تۇركىستان وبلىس ورتالىعى بولدى. وسىلايشا، ءتۇبى ءبىر تۇركى حالىقتارى ءۇشىن قاستەرلى اتاۋ ءوز مارتەبەسىن الدى. بۇل – ءبىزدىڭ تۇتاستىعىمىزدى نىعايتىپ، بىرلىگىمىزدى بەكەمدەي تۇسەتىن تاريحي وقيعا»، - دەگەن ەدى مەملەكەت باسشىسى. بۇل ءسوزىن تۇركياعا ءارى قىرعىزستانعا بارعان ساپارلارىندا دا قايتالاپ وتىردى.

تۇركىستان وبلىسىن دامىتۋ جۇمىستارىن باستاپ كەتكەن مەملەكەتتەر دە جوق ەمەس. ماسەلەن 30 جىلدان بەرى بيزنەس سالاسىندا كوش باستاپ كەلە جاتقان تۇركيانىڭ «DAL Holding Investment Company» حولدينگى تۇركىستان وبلىسىنىڭ 200 گەكتار جەر اۋماعىندا ينۆەستيسيالىق قۇنى 500 ملن اقش دوللارىنا قۇرايتىن جىلىجاي سالۋعا نيەت ءبىلدىردى. بۇعان قوسا «Dilmen Dekorasyon inş. Taah. Tic. Ltd Şti» كومپانياسى 2019 جىلى تۇركىستان وبلىسىندا جيھاز شىعاراتىن فابريكانىڭ قۇرىلىسىن باستاۋدى جوسپارلاپ وتىر.

تۇركىستاندى دامىتۋدا ەلىمىزدىڭ ءار ءوڭىرى دە قالىس قالىپ جاتقان جوق. ءار وبلىس بيىل عانا قۇرىلعان جاڭا ءارى رۋحاني وبلىسقا ءبىر-بىر عيماراتتان سىيعا تارتاتىن بولدى. جالپى، ەلباسى تۇركىستاننىڭ تانىماستاي وزگەشە قالاعا اينالارىنا سەنىمدى.

مۇنىڭ ءبارىن سارالاي كەلە، جاستار اراسىندا Michael Sherimbek دەگەن اتپەن تانىمال فەيسبۋك قولدانۋشىسىنىڭ پىكىرىن نەگە قولداماسقا دەگەن وي كەلەدى.