بۇل سۋرەتتى 1945 جىلى جاپونيادا امەريكالىق ءفوتوتىلشى دجو و^دوننەل تۇسىرگەن. سۋرەتتىڭ ماعىناسى تەرەڭ، ايتارى كوپ. ءفوتوتىلشى مۇنى بىلاي سۋرەتتەدى:

«مەن ون جاس شاماسىنداعى بالانى كوردىم. ارقاسىنا ءسابي ارقالاپ العان.

ول كۇندەرى جاپونيادا ءىنى-قارىنداستارىن ارقالاپ ويناپ جۇرگەن تالاي بالانى كوردىم. الايدا بۇل بالانىڭ جاعدايى بولەك ەدى. ءسابيدى ارقالاپ الۋىنىڭ ناقتى ءبىر سەبەبى بارىن ءتۇسىندىم.

اياعىندا اياق كيىمى جوق. ءجۇزى قاتال. ال ءسابيدىڭ باسى تەربەلىپ كەلەدى، ۇيىقتاپ جاتقان شىعار دەپ ويلادىم. بالاقاي دىتتەگەن ورنىنا كەلىپ 5 نەمەسە 10 مينۋت ءۇنسىز تۇردى.

كەيىن اق بەتپەردە كيگەن ادامدار بالاعا جاقىنداپ ءجىبىن شەشە باستادى. ءسويتىپ ءسابيدى جالىنداپ تۇرعان وتتىڭ ۇستىنە قويدى.

بالا وتقا قاراپ ءۇنسىز تۇر. استىڭعى ەرنىن قاتتى تىستەپ العانى سونشا قاناپ كەتتى. ءبىراز تۇرعان سوڭ بۇرىلدى دا، تىپ-تىنىش كەتە باردى».

اقش 1945 جىلى 9 تامىزدا ناگاساكي قالاسىنا اتوم بومباسىن تاستاعان. سونىڭ سالدارىنان 140 مىڭعا جۋىق ادام اجال قۇشتى. ءتىرى قالعاندارى اۋىر دەرتكە شالدىقتى. ولگەن ادامداردىڭ دەنەلەرى بۇزىلىپ، تەرى اۋرۋلارىنا ۇلاسپاس ءۇشىن اشىق پەشتەردە ورتەلدى. ال شەشەسى قايتىس بولعان سۋرەتتەگى بالانىڭ كىشكەنتاي باۋىرى دا جارىلىستىڭ كەسىرىنەن كوز جۇمدى. ءىنىسىن ورتەۋ پەشىنە ءوز قولىمەن اكەلىپ وتىر. ول ۋاقىتتا وزگە دەنەلەر ورتەلىپ جاتقان ەدى. بالاقاي وتانداستارىن اقتىق ساپارعا تىك تۇرىپ شىعارىپ سالدى. ءتىپتى كوزىنە ءبىر ءتۇيىر جاس تا المادى.