يران اسكەريلەرى احۆازدا تەراكتى ۇيىمداستىرعاندار مەن ولاردىڭ سيرياداعى ەۆفراتتىڭ شىعىس جاعالاۋىنداعى نىساندارىنا زىمىران تاستادى. بۇل تۋرالى يسلام ريەۆوليۋسياسىنىڭ كۇزەت كورپۋسىمەن بايلانىستى Sepah News پورتالى حابارلادى.

پورتالدىڭ مالىمەتىنە سايكەس، سوققىنى يسلام ريەۆوليۋسياسىنىڭ كۇزەت كورپۋسى جاسادى. تەرروريستەردىڭ كوبى مەرت بولدى. جارالانعاندار بار.

قىركۇيەكتىڭ سوڭىندا يراننىڭ احۆاز قالاسىندا اسكەري پاراد كەزىندە اتىس بولدى. سوڭعى مالىمەتتەرگە سايكەس، 28 ادام مەرت بولدى، 60 ادام جارالاندى. IRNA اگەنتتىگىنىڭ تاراتقان اقپارى بويىنشا، تەراكتىنى  ساۋد ارابياسىمەن بايلانىسى بار “احۆازداعى پاتريوتتىق اراب دەموكراتيالىق قوزعالىسى» ءوز موينىنا الدى.  

ەكى كۇننەن كەيىن يراندا تەراكتىگە قاتىسى بولۋى مۇمكىن 22 ادام ۇستالدى.

يراننىڭ جوعارى كوشباسشىسى اياتوللا الي حامەنەي تەراكت اقش-تىڭ باسشىلىعىمەن جاسالعانىن مالىمدەدى. ال يراننىڭ ءسىم باسشىسى موحامماد دجاۆاد ءزاريفتىڭ ايتۋىنشا، لاڭكەستىك ارەكەتتى «تەرروريزمگە قولداۋ بىلدىرگەن ايماقتىق دەمەۋشىلەر مەن امەريكالىق نۇسقاۋشىلار» جاسادى.  

يراننىڭ اسكەري قورعانىس كۇشى دە سودىرلار اقش جانە يزرايلمەن بايلانىسى بار دەگەن ويدا. ساۋد ارابياسى تەراكتىگە قاتىسى جوق ەكەنىن ايتادى.