«امىرە» ءفيلمىنىڭ وپەراتورى ماكسيم وسادچيي («9 روتا»، «ستالينگراد») تبليسيدە قىركۇيەكتىڭ 27ء-سى مەن 28ء-ى ارالىعىندا وتكەن Golden Eye («التىن كوز») اتتى حالىقارالىق كينو جانە تەلەوپەراتورلار فەستيۆالىندە Panasonic كومپانياسىنىڭ ارنايى جۇلدەسىنە يە بولدى. سونداي-اق اتالعان كينوتۋىندى فەستيۆالدىڭ ارنايى ديپلومىمەن ماراپاتتالدى.

ەستەرىڭىزگە سالا كەتسەك، ۇستىمىزدەگى جىلى ءساۋىر ايىندا جالپىۇلتتىق پروكاتقا شىققان كينوتۋىندى قازاقتىڭ تەنور داۋىستى ءبىرتۋار ءانشىcءى امىرە قاشاۋبايەۆتىڭ عۇمىرىن باياندايدى. ءفيلمدى مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق جانە ءاليدار وتەمۇراتوۆتىڭ «Dar Play» كومپانياسىمەن بىرلەسە تۇسىرگەن.

حالىقارالىق ءتۇسىرىلىم توبىنىڭ قۇرامىندا: امەريكالىق قويۋشى-رەجيسسەر دجەف ۆەسپا (Jeff Vespa). ءفيلمنىڭ سەنارييىن جازعان بەنجامين ا. ۆان دەر ۆين (Benjamin A. van der Veen). باستى رولدەردى وتاندىق اكتەرلەر سانجار مادييەۆ (امىرە) جانە ەركەبۇلان دايىروۆ (مۇستافا شوقاي) سومداعان. سونىمەن قاتار، بريتاندىق اكتەر بەن الدريدج (Ben Aldridge) جانە «وبلاست تمى»، «تري بيلبوردا نا گرانيسە ەببينگا، ميسسۋري» فيلمدەرى ارقىلى تانىلعان اۆستراليالىق اكتريسا ەببي كورنيش (Abbie Cornish) جانە باسقا دا اكتەرلەر تۇسكەن.

يننوۆاسيالىق تەحنولوگيالاردىڭ حالىقارالىق قورى ۇيىمداستىرعان ەڭ تانىمال ءىس-شارالاردىڭ ءبىرى – Golden Eye كينوفەستيۆالى گرۋزيادا 2009 جىلدان بەرى وتكىزىلىپ كەلەدى. اتالعان كينوفەستيۆال كينو-جانە تەلەوپەراتورلارعا بارشاما قولداۋ كورسەتىپ، ولاردىڭ كاسىبي دەڭگەيىن ارتتىرۋعا مۇمكىندىك بەرەدى.