تەاتر جانە كينو اكتەرى تۇرسىن قۇرالييەۆتىڭ دۇنيەدەن وزعانىن حابارلاعان ەدىك. مارقۇممەن قوشتاسۋ ءراسىمى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا 3 قازان كۇنى، ساعات 10:00-دە وتەدى.  

اكتەر كوپ جىلدار بويى تالماي ەڭبەك ەتكەن ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى تۇرسىن قۇرالييەۆ تۋرالى ەستەلىك جاريالادى. 

تەاتردىڭ اعا بۋىن اكتەرى، ارامىزداعى ارداق تۇتار اقساقالىمىز، قر-نىڭ ەڭبەك سىڭىرگەن ءارتيسى، «قۇرمەت» وردەنىنىڭ يەگەرى – تۇرسىن قۇرالييەۆ اعامىز بۇگىن، ياعني، 2 قازان كۇنى 68 جاسىندا كەنەتتەن باقيلىق بولدى.

1950 جىلدىڭ 6 قاڭتارىندا جامبىل وبلىسىندا دۇنيەگە كەلگەن تۇرسىن اعا العاش ەڭبەك جولىن 1967 جىلى موسكۆاداعى م.س.ششەپكين اتىنداعى ونەر ۋچيليششەسىنە وقۋعا تۇسۋدەن، ونى 1972 جىلى ويداعىداي ءتامامداعان ول جەزقازعان  قالاسىنا بارىپ، وبلىستىق تەاتردىڭ اشىلۋىنا اتسالىسىپ، وندا ەكى-ۇش جىلداي ەڭبەك ەتىپ، 1976 جىلدان باستاپ بالالار مەن جاسوسپىرىمدەر تەاترىنا كەلىپ، مۇندا 42 جىل بويى ۇزدىكسىز ەڭبەك ەتىپتى.   

        1976 جىلدان باستاپ، وسى تەاتردا ۇزبەي قىزمەت ەتىپ كەلە جاتقان ارتيست وسى جىلدار ىشىندە تەاتر ساحناسىندا 100-گە تارتا  رولدەر سومداپتى. اكتەر قاي كەزدە بولسا دا، تەاتر ساحناسىنداعى ءوز جەتكەن بيىگىنەن تومەندەپ كورگەن ەمەس. ونىڭ ونەرى ءاردايىم دامۋ ۇستىندە تەاتر كورەرمەندەرىن قۋانتىپ كەلدى.    ول شىعارماشىلىعىن شىڭداپ، ەل سەنىمىن ودان ءارى اقتاۋ ۇدەسىندە شارشاماي-شالدىقپاي كۇنى بۇگىنگە دەيىن ەڭبەك ەتتى. تەاتر ساحناسىنداعى ارتيستىك ونەرىمەن كورەرمەن قاۋىمدى ءتانتى ەتىپ،  بيىك شىڭداردان كورىنە بىلگەن ت.قۇرالييەۆتىڭ تەاتر ساحناسىنداعى اتالعان  شىعارماشىلىق ەڭبەكتەرىنىڭ الار ورنى ەرەكشە.

        قازاقستان رەسپۋبليكاسىنىڭ ەڭبەك سىڭىرگەن ءارتيسى،  «قۇرمەت» وردەنىنىڭ يەگەرى، ۋفا قالاسىندا وتكەن حالىقارالىق تەاترلار فەستيۆالىنىڭ «اتالار داستۇرىنە قۇرمەت» سىيلىعىنىڭ لاۋرەاتى، تەاتر جانە كينو اكتەرى – تۇرسىن بايتاي ۇلىنىڭ جارقىن بەينەسى جادىمىزدا ماڭگى ساقتالادى. يمانىڭىز سالامات بولسىن، جاقسى اعا!