قىتايلىق Sohu باسىلىمى رەسەيدىڭ بوسقىنداردى نە سەبەپتى ەلگە كىرگىزبەيتىنىن سارالاپ، ماتەريال دايىنداعان ەكەن. Qamshy.kz اقپارات اگەنتتىگى قىتايلىقتاردىڭ كوتەرگەن ماسەلەسى وزەكتى ەكەندىگىن ەسكەرە وتىرىپ، وقىرمان قاۋىمعا قازاق ءتىلدى اۋدارماسىن ۇسىنادى. ءبىر قىزىعى، رەسەيلىك ب ا ق-تىڭ ءوزى بۇل پروبلەماعا باسا نازار اۋدارىپ، ورىس تىلىنە اۋدارۋعا اسىعىپتى.

تەرريتورياسى رەسەيدەن كىشى بولعانىمەن حالقىنىڭ سانى ميللياردتان اساتىن جۇڭگو «جەر كولەمى ەڭ ۇلكەن مەملەكەتتە ادام سانى نەگە از؟» دەگەن ساۋالعا جاۋاپ ىزدەپ كورىپتى. ساراپشى ساۋالىنا جاۋاپ تاپتى دا. ايتۋىنشا، بۇل سۇراق اسا قاتتى ويلانۋدى قاجەت ەتپەيدى، جاي عانا رەسەي مۇسىلمانداردان قورقادى-مىس. بوسقىندار ءۇشىن رەسەيدىڭ قاقپاسى تارس جابىلعان. نەگە؟ ءارى قاراي ماقالاسىن بىلايشا وربىتەدى..

تاريحقا سەنسەك، بوسقىنداردى قابىلداۋ – مەملەكەتتەگى تۇرعىندار سانىن ءبىر ساتتە كوبەيتەتىن ءادىس. وڭتۇستىك قىتايدىڭ دامۋى – بوسقىندارمەن تىكەلەي بايلانىستى. بۇل ءادىستى وزگە ەلدەر دە ءتيىمدى پايدالاندى. ماسەلەن، ەكىنشى دۇنيەجۇزىلىك سوعىستان كەيىن فرانسيا مەن گەرمانيا جۇمىس كۇشىن تولىقتىرۋ ءۇشىن بوسقىنداردى قابىلداعان. ەسەسىنە بۇگىنگى كۇنى ەكى ەلدىڭ دەموگرافيالىق جاعدايى جوعارى. ءتىپتى جەر تەرريتورياسى جونىنەن رەسەيدەن كىشكەنتاي شۆەسياداعى حالىقتىڭ سانى رەسەيدەن اسىپ تۇسەدى.

بۇگىندە ءدال رەسەي سەكىلدى حالىق سانىنىڭ جەتىسپەۋشىلىگىنەن زارداپ شەگىپ جاتقان مەملەكەت جوق. «جاۋىنگەر ۇلت» سوعىس ارقىلى الەمدەگى جەر كولەمى جاعىنان ەڭ ۇلكەن مەملەكەت جاساي الدى، ءىرى اسكەرى مەن دەموگرافيالىق رەسۋرسىنىڭ ارقاسىندا كوركەيدى. الايدا بۇگىنگى كۇنى «سوعىسسىز قالعان» رەسەي جەرىنىڭ كوپ بولىگى تۇرعىنسىز قالعان. 17 ميلليون شارشى شاقىرىم جەردە نەبارى 140 ميلليون ادام تۇرادى ەكەن. رەسەيلىكتەردىڭ كوپ بالالى بولۋدى قالاماۋى دا – بۇعان بىردەن ءبىر سەبەپ.

سسرو-نىڭ قۇلاۋىنىڭ باستى سەبەبى – دەموگرافيا. بۇل جاعدايدى تۇزەتۋ ءۇشىن سوۆەت ۇكىمەتى ونداعان جىلدار بويى جۇمىس ىستەدى، الايدا ناتيجە بەرمەدى. ەندى رەسەيدىڭ ءبىر عانا جولى قالدى – بوسقىنداردى قابىلداۋ. ماسەلەن، تاياۋ شىعىستا بوسقىندار كوپ. ولاردى قابىلداۋ ارقىلى حالىق سانىن 10 ميلليونعا كوبەيتۋگە بولادى. ءبىراق رەسەي بوسقىنداردى كىرگىزۋگە تۇبەگەيلى قارسى. ءتىپتى ولاردىڭ ەلگە كىرىپ كەتپەسى ءۇشىن قاۋىپسىزدىك شارالارى قاتاڭ قولدانادى. نەگە؟ جاۋاپ قاراپايىم – رەسەي قورقادى.

بىرىنشىدەن، مۇسىلمان

رەسەي حالقىنىڭ 20 پايىزى مۇسىلمان. ءارى بۇل رەسەي ءۇشىن ۇلكەن قيىندىق تۋعىزىپ تۇر. بيلىك ەلدى تىك تۇرعىزعان مۇسىلمان مەملەكەتى شەشەنستان ءۇشىن مۇسىلمانداردان قورقادى. ەگەر مۇسىلمانداردى تارتاتىن بولسا، ولاردى باقىلاۋ دا مۇمكىن بولماي قالادى.

ەكىنشىدەن، وزگە ەلدىڭ قاتەلىگىن قايتالاماۋ

سوڭعى ون جىلدا كوپتەگەن مەملەكەت بوسقىنداردىڭ كەسىرىنەن جاپپاي كۇيرەۋگە ۇشىراعان. باتىس افريكاداعى كوت-د^يۆۋار، سونىمەن قاتار تاياۋ شىعىستاعى ليۆان. مۇنى باقىلاپ وتىرعان رەسەي ءوز مەملەكەتى ءۇشىن قورقادى. تەرريتورياسى كەڭ بولعانىمەن تۇرعىنى جەتكىلىكسىز، سول سەبەپتى بوسقىنداردىڭ سوققىسىنا شىداي الماۋى مۇمكىن. ەگەر ولار مەملەكەتكە قاستىق جاساسا، كەش بولادى.

ۇشىنشىدەن، رەسەي ەكونوميكاعا الاڭدايدى

بۇگىندە رەسەي ەكونوميكاسى قۇلدىراۋ شەگىندە. حالقى دا كەدەيلەنىپ بارادى. ەگەر ەلگە بوسقىندار كىرسە، جەرگىلىكتى تۇرعىندار مەن بوسقىندار اراسىندا ازىق-تۇلىككە تالاس تۋۋى مۇمكىن. ال مۇنىڭ ناتيجەسى ءىرى كوتەرىلىسكە ۇلاسادى. رەسەيدىڭ الاڭداپ وتىرعان نەگىزگى ماسەلەلەرىنىڭ ءبىرى – وسى.