جۇدىرىقتاي جۇرەگىنە ادام زاتقا دەگەن ماحابباتىن سىيدىرعان جانداردىڭ شەكسىز ەرلىگىنە، باتىلدىعىنا، باتىرلىعى كۋا بولىپ جاتامىز. مۇنداي ءومىر مىسالدارى ءوءمىردى باعالاۋعا، سۇيىسپەنشىلىك پەن ماحابباتقا باۋليدى. سوندىقتان يندونەزيادا بولعان تابيعات اپاتى كەزىندە 100 ءومىردى ساقتاپ قالۋ ءۇشىن ءوز ءومىرىن قۇربان ەتكەن ازاماتتىڭ ەرلىگى تۋرالى جازباقپىز. يندونەزيادا بولعان تابيعات اپاتىندا 100 ادامنىڭ ءومىرىن ساقتاپ قالۋ ءۇشىن ءوز ءومىرىن قۇربان ەتكەن 21 جاستاعى جىگىتتىڭ ارەكەتى كوپكە وي سالادى. ول ءوز ءومىرى قانشا قىمبات بولسا دا ۇشاقتاعى جۇزدەن اسا ءومىر باعالىراق دەپ ءتۇيدى. اققان جۇلدىزداي قىسقا عۇمىر كەشسە دە ارتىندا وشپەس ءىز قالدىردى. ءومىرى قىل ۇستىندە بولعان جۇزدەن اسا ادامعا جاقىندارىمەن قاۋىشۋعا، ويداعى جوسپارىن ىسكە اسىرۋعا، ارمانىنا ۇمتىلۋعا مۇمكىن بەردى. مۇنداي ەرلىككە بارۋ ءۇشىن ادامعا رۋحاني كەمەلدىك، كەڭ جۇرەك پەن باتىرلىق قاجەت-اق.
يندونەزيا تۇرعىندارى مەن دۇنيەجۇزىندەگى الەۋمەتتىك جەلى قولدانۋشىلارى 21 جاستاعى انتونيۋس گۋناۆان اگۋنگتىڭ جەر سىلكىنىسى كەزىندە جاساعان ەرلىگىن ءسوز ەتىپ جاتىر. ول جولاۋشى لاينەرىن اپات ايماعىنان الىپ شىعۋ ءۇشىن ءوز ءومىرىن قۇربان ەتتى.
وتكەن جۇمادا اۋە ديسپەچەرى سۋلاۆەسي ارالىنداعى پالۋ اۋەجايىندا جولاۋشىلار ۇشاعىن باسقارعان. ول تابيعي اپات كەزىندە ۇشاق ۇشىپ كەتكەنشە قۇلاعالى تۇرعان ديسپەچەر بولمەسىنەن كەتۋدەن باس تارتقان. ۇشاق اۋەگە كوتەرىلگەندە عانا مۇنارادان سەكىرۋگە ءماجبۇر بولعان. سەبەبى سىرتقا شىعاتىن باسقا جول قالماعان. انتونيۋس گۋناۆان اگۋنگ العان جاراقاتتارىنىڭ سالدارىنان اۋرۋحاناعا بارا جاتقان جولدا قايتىس بولدى.
«اگۋنگ ءوز قىزمەتىن اقتىق دەمى شىققانعا دەيىن ادال اتقاردى. ول ۇشاق اۋەگە كوتەرىلگەنشە ديسپەچەر بولمەسىنەن كەتپەدى»، - دەلىنگەن يندونەزيانىڭ ازاماتتىق اۆياسيا باسقارماسىنىڭ مالىمدەمەسىندە.
جۇما كۇنى انتونيۋس گۋناۆان اگۋنگ جەر سىلكىنىسى باستالعاندا Batik Air اۋە كومپانياسىنىڭ رەيسىن باقىلاعان. ول ۋاقىتتا ونىڭ ارىپتەستەرى اۋەدەگى قوزعالىستى باقىلاۋ قاجەت بولماعاندىقتان ءتورت قاباتتى مۇنارادان ەۆاكۋاسيالانعان بولاتىن.
لاينەردىڭ جەردەن اۋەگە كوتەرىلۋ ءساتى جەر سىلكىنىسىنىڭ باستالۋىمەن تۇسپا تۇس كەلگەن. سول ۋاقىتتا ديسپەچەر پۋنكتىنىڭ شاتىرى قۇلاعان. اگۋنگ تەرەزەدەن سەكىردى. سونىڭ سالدارىنان قولى، اياعى مەن قابىرعاسى سىندى.
اگۋنگ تىكۇشاقپەن ارنايى كلينيكاعا جەتكىزىلمەك بولعان، ءبىراق جولدا كوز جۇمدى.
جۇزدەگەن ادام ءومىرىن ساقتاپ قالۋ ءۇشىن جاساعان ەرلىگى ءۇشىن اگۋنگتىڭ قىزمەتى كوتەرىلدى. ارىپتەستەرى انتونيۋس گۋناۆانا اگۋنگتىڭ دەنەسىن جەرلەۋگە اپارا جاتقان فوتولارىن جاريالادى.
#RIPAgung pic.twitter.com/hLLaLRDCCC
— AirNav Indonesia (@AirNav_Official) 29 سەنتيابريا 2018 گ.
الەۋمەتتىك جەلى قولدانۋشىلارى جاس جىگىتتىڭ ارەكەتىن قىزۋ تالقىلاپ جاتىر. وعان قاھارمان اتاعىن بەرۋ كەرەك دەپ ەسەپتەيدى.
«ەرلىك جاسادىڭ. كوكتە قالىقتا، اگۋنگ» دەپ جازدى جەلى قولدانۋشىلارىنىڭ ءبىرى.
يندونەزيادا ماگنيتۋداسى 7،5 جەر سىلكىنىسى بولعان. ارتىنشا سۋنامي جەردى شايىپ كەتكەن. سونىڭ سالدارىنان 832 ادام كوز جۇمدى. مەرت بولعانداردىڭ سانى ءوسۋى مۇمكىن. قۇتقارۋشىلار تابيعات اپاتى بولعان الىس ايماقتارعا ءالى بارمادى.
مەرت بولعانداردىڭ كوبى - پالۋ ارالىندا. جۇزدەگەن ادام ارالداعى قوناق ءۇي مەن ساۋدا ورتالىقتارى ءۇيىندىسىنىڭ استىندا جاتقان بولۋى مۇمكىن. قۇتقارۋشىلار ارالعا ارنايى تەحنيكانىڭ كەلۋىن كۇتىپ وتىر.
كوبى ءسۋناميدىڭ سالدارىنان كوز جۇمدى. حالىق جاعاجايدا ءداستۇرلى فەستيۆال وتكىزۋگە دايىندالىپ جاتقان.
يندونەزيانىڭ ۆيسە-پرەزيدەنتى يۋسۋف كاللدىڭ ايتۋىنشا، تابيعي اپات قۇرباندارى مىڭعا جەتۋى مۇمكىن. قىزىل كرەستىڭ مالىمەتىنە سايكەس، جەر سىلكىنىسى مەن سۋناميدەن 1،6 ميلليوننان استام ادام زارداپ شەكتى.
يندونەزيا ۇكىمەتى مەرت بولعانداردى بىرگە كومۋگە ءماجبۇر بولعانىن ايتادى.
