«داعىستاندىقتار مەدالسىز قالسا دا، نامىستارىن تاپتاتپاي ەر مىنەزىن ساقتاپ قالۋى ءتيىس». بۇل كۇنى كەشە يرلانديالىق ماكگرەگوردى جەڭىپ، چەمپيوندىق بەلبەۋىن ساقتاپ قالعان بوكسشى حابيب نۇرماعامەدوۆتىڭ اكەسىنىڭ ايتقان ءسوزى. ابدۋلماناپ نۇرماعامبەتوۆتىڭ ەسىمىن بۇكىل رەسەي بىلەدى، سىيلايدى. سەبەبى ول ەركىن كۇرەستەن، سامبودان بىرنەشە چەمپيوندى تاربيەلەگەن باپكەر. ال سول ەلگە سىيلى ادامنان ۇلى حابيب قورقادى. نەگە؟ ابدۋلماناپ نۇرماعامەدوۆ دەگەن كىم؟ شولۋ جاساپ كورەلىك...
ۆيكيپەدياداعى مالىمەتكە سۇيەنسەك، ول ەركىن كۇرەستەن سسرو سپورت شەبەرى، رەسەيدىڭ قۇرمەتتى باپكەرى، سامبودان داعىستان رەسپۋبليكاسى ۇلتتىق قۇرماسىنىڭ باس باپكەرى، دزيۋدو مەن سامبودان ۋكراينا چەمپيونى. داعىستاندا تۋىپ وسكەن. جاستايىنان سپورت سالاسىنا دەن قويدى. سپورتتاعى مانسابىن ەركىن كۇرەستەن باستاپ، سپورت شەبەرى اتاندى. اسكەردە جۇرگەن كەزىندە دزيۋدو جانە سامبومەن اينالىستى. رەسەيگە تانىمال پەتر بۋتريي – ابدۋلماناپ نۇرماعامەدوۆتىڭ جاتتىقتىرۋشىسى.
باپكەردىڭ سپورت جولىنداعى ەڭ العاشقى ءارى ءوزى ماقتانىشپەن مويىندايتىن جەتىستىگى – 1992 جىلى چەمپيون بولعان شاكىرتى، ءىنىسى نۇرماعامەد نۇرماعامەدوۆ.
سونىمەن قاتار، ەركىن كۇرەستەن داعىستان مەن رەسەيدىڭ كەلەسى چەمپيوندارىن دايىندادى: قازييەۆ ماگومەدحان، داربيزششيەۆ سايدبەك، ماگومەدوۆ حاسان، مۋتاليموۆ قاجىمۇرات، وماروۆ دابادان، الييەۆ ماگومەدراسۋل.
سۇحباتتارىنا شولۋ
باپكەردىڭ بىرنەشە سۇحباتىن قاراپ شىقتىق. ءوزىن سالماقتى، بايسالدى ۇستايتىن نۇرماعامەدوۆ ءۇشىن نامىس ءبىرىنشى ورىندا ەكەنىن اڭعارۋ قيىنعا سوقپادى. بالكىم، بۇل تاۋلى ايماقتىڭ ەرلەرىنە ءتان ورتاق قاسيەت بولار. الايدا ابدۋلماناپتىڭ ەكى ءسوزىنىڭ بىرىنەن «نامىس» دەگەندى ەستيسىڭ ەرىكسىز. ابدۋلماناپ نۇرماعامەدوۆتىڭ سۇقباتتارىن نازارلارىڭىزعا ۇسىنامىز.
— ەر بالانى باتىر دەپ قانداي جاعدايدا ايتۋعا بولادى؟
ول ەڭ الدىمەن وتباسىن، ايەلىن، بالا-شاعاسىن ءارى وتانىن قورعاي الاتىن دارەجەدە بولۋى كەرەك. سەبەبى مۇنىڭ ءبارى ەر جىگىتتىڭ نامىسى. نامىسسىز ەر ەزبەن تەڭ.
— ءسىزدى قاتال تاربيەلەدى مە؟
ءيا، اكەم قاتال بولدى. ءبىراق بۇل دۇرىس. اكەسى قاتال بالا نامىستى بولىپ وسەدى.
— بالانى قالاي تاربيەلەگەن دۇرىس؟
داعىستاندىق بالالار تاڭنان كەشكە دەيىن بوس بولماۋى كەرەك. ەرتە تۇرۋ، جاتتىعۋ جاساۋ، مەكتەپكە بارۋ، ءبىر ساعات دەمالۋ، اتا-اناسىنا كومەكتەسۋ، كەشكە جاتتىعۋ جاساۋ، 2 ساعات ۋاقىتىڭدى ساباققا ارناۋ، ۇيىقتاۋ. ءبىزدىڭ بالالار وسىنداي تارتىپكە داعدىلانعان.
— ومىردە نەنى وزگەرتەر ەدىڭىز؟
ادامداردىڭ وزىمشىلدىگىن، مەنمەندىگىن.
— ءسىز ءۇشىن ومىردەگى ەڭ باعالى زات؟
اللاعا تابىنۋ.
— بويىڭىزداعى وزگەرمەيتىن ءۇش قاسيەت
ۇلكەن ادامدى تىڭداۋ، ءسوزىن بولمەۋ. جاسى كىشى ادامنىڭ قاتەلىگىن كورسەڭ، تۇزەتۋ. قوعامعا پايداڭدى تيگىزۋ.
— بالالارىڭىز ءۇشىن ءسىز كىمسىز؟
ديكتاتور.
— مىقتى سپورتشى بولۋ ءۇشىن بالانىڭ بويىندا قانداي قاسيەتتەر بولۋى شارت؟
بالا بىلىكتى سپورتشى بولۋ ءۇشىن ماقساتى نىق بولسا، جولىندا كەزدەسكەن قيىندىقتارعا مويىنسىنباسا يگى.
— ءسىز ءۇشىن ەڭ باعالى دۇنيە
سسرو ۋاقىتىن ەرەكشە جاقسى كوردىم، ساعىنامىن. سسرو دەپ جازىلعان فۋتبولكا – مەن ءۇشىن باعالى.
— ءدىن جايلى ويىڭىز
ءدىن الەمگە تىنىشتىق اكەلەدى.
— ءدىنشىل ادامنىڭ ءبىر كۇنى
تۇنگى 4 جارىمدا تۇرىپ، اللاعا ويانعانىڭا شۇكىر ەتۋ. جۋىنۋ، سپورتپەن شۇعىلدانۋ. ءسويتىپ، كۇنى بويى سەرگەك كۇيى جوسپارلاردى جۇزەگە اسىرۋ.
— ەر ادامعا ءتان ەڭ ماڭىزدى قاسيەت
ءوزىڭدى لايىقتى ۇستاۋ.
— بوس ۋاقىتىڭىزدى قالاي پايدالاناسىز؟
مەنىڭ بوس ۋاقىتىم جوق. سول ءۇشىن باقىتتىمىن. ەكى ۇلىم، قىزىم بار، نەمەرەلەرىم بار، مەن اكەمىن، اتامىن، رەسەيدىڭ قۇرمەتتى باپكەرمىن.
كونور - بىزگە جاۋ ەمەس
حابيبتەن جەڭىلگەن كونور جەكپە-جەكتەن بۇرىن ونىڭ اكەسىنە «ءتىل تيگىزىپ» سويلەگەن ەدى. «قورقاق» دەدى العاشقى ءبىر سوزىندە.
-
كونور-حابيب جەكپە-جەگى: UFC بەلدىگى يەسىز قالدى (ۆيدەو)
-
سالماق ولشەۋ راسىمىنەن كەيىن كونور ءحابيبتى ۇرىپ جىبەردى (ۆيدەو)
-
عاسىر جەكپە-جەگى: كونور ماكگرەگور حابيب نۋرماگومەدوۆكە سپيرتتىك ىشىمدىك ۇسىندى (ۆيدەو)
«ءحابيبتىڭ اكەسى – قادىروۆتىڭ «ءبىر جەرىنە كىرىپ جۇرگەن» جاعىمپاز. ونىمەن سۋرەت سالىپ «بىرگە مىقتىمىز» دەپ جازىپ قويىپتى. قورقىنىشتان تۋعان جالعان سىيلاستىق بۇل»، - دەپ جازدى كونور.
اراعا 5 كۇن سالىپ كونور تاعى سويلەدى. سويلەگەندە ءبۇي دەدى.
«ابدۋلماناپ، سەنىڭ قانداي ەكەنىڭ جۇزىڭنەن-اق كورىنىپ تۇر. بەتپەردە كيىپ الىپ، ەلگە وتىرىك جالتاقتاپ ءجۇرسىڭ، ورتانشى ۇلىڭ دا سونداي. قورقاق»، - دەپ جازعان ەدى كونور ءوزىنىڭ Instagram-داعى پاراقشاسىنا. الايدا بۇعان اكەسى: «مەنىڭ اتىمنان بار جاۋاپتى ۇلىم قايتارادى»، - دەپ قىسقا قايىردى. ساراپشىلار مۇنى كونوردىڭ جەكپە-جەك الدىنداعى ايلاسى دەپ سانادى. ءوزىنىڭ قارسىلاسىنىڭ نامىسىنا ءتيىپ، اشۋىن كەلتىرۋ ماكگرەگوردىڭ ادەتى دەپ ەسەپتەدى ولار.
ال بۇعان قاتىستى ابدۋلماناپ «كونور – بىزگە جاۋ ەمەس» دەدى بايسالدى ۇنمەن. ايتا كەتەرلىگى حابيب نۇرماعامەدوۆ تە، ونىڭ اكەسى دە كونوردىڭ تالانتىن مويىنداپ، باعالايتىنىن ايتقان.
حابيب سۇقباتتارىنىڭ بىرىندە "كونوردى باعالايمىن. ول تالانتتى جىگىت. ونىڭ سول قولىمەن جويقىن سوققى جاساي الادى. الايدا مەن دە وسال ەمەسپىن. كونور مۇنى جاقسى بىلەدى"، دەگەن بولاتىن.
ال اكەسى «ول – تالانتتى سپورتشى، ءقاۋىپتى. ءبىراق حابيب – ودان قاۋىپتىرەك. كونور مۇنى بىلەدى. مەن قورىقپايمىن، ول قورقادى، سول ءۇشىن دايىندالىپ ءجۇر»، - دەدى تىلشىلەرگە بەرگەن سۇحباتىندا.
ءار جاۋابىنان بالانىڭ تاربيەسىن نازاردان تىس قالدىرمايتىن اكەنى بايقاۋعا بولادى. ءوزىن سالماقتى، بايسالدى ۇستايتىن اكە بالالارىنان دا سونى بەك تالاپ ەتەدى. ال شالىس كەتكەن بالاسىن قاتاڭ جازالايدى. جەكپە-جەكتەن كەيىن جانجال شىعارعان ءحابيبتىڭ اكەسىن ايتقاندا داۋىسىنىڭ دىرىلدەۋى، بويىن ۇرەي الۋىنىڭ سەبەبى دە سودان بولار.
