شەراعا ايتقان جۇلدىزى بيىك جۋالى سوڭعى كۇندەرى تۇنەرىپ، ءالسىن-السىن اسپان كوزى تامشىلاپ، ۇلى جازۋشىنىڭ جانىنداي جاقسى كورەتىن تۋعان جەرى ءبىر قايعىلى حاباردىڭ تارايتىنىن سەزگەندەي تۇنەرگەن قاباعىن اشپادى. شەراعام ايتاتىن ءتاڭىرتاۋدىڭ اق باسىن قويۋ سۇر بۇلت تورلاپ، قىزدىڭ قوس بۇرىمىنا تەڭەگەن اقساي مەن كوكساي لاي سۋعا تولدى. شاقپاقتىڭ جەلى كۇشەيدى. سول شاقپاقتىڭ جەلى كوكەمدى كوك اسپانعا كوتەرىپ اكەتكەندەي.

شەراعاڭنىڭ شاقپاق جەلىنە ايتقان نازى ويىما ورالدى: «اي، شاقپاق جەل، شاقپاق جەل! كىمدى ۇشىرارىڭدى بىلمەيسىڭ-اۋ... ارامداردان، ادىلەتسىز حايۋانداردان تازارتساڭ ەدى...». قانشا دۇلەي جەل بولسادا تازارتا الماي كەلەدى. ەندى جاماندىقتان تازارتار كوكەمنىڭ اۋزىنان شىققان قاناتتى سوزدەرى، كىتاپتارىنداعى كىسىلىك قاعيداتتارى تالىپ سۇيگەن قازاق حالقىنىڭ ۇزاق ۋاقىت رۋحىن كوتەرىپ，تاۋەلسىزدىگىمىزدىڭ باياندى بولۋىنا باستايتىنى انىق.

حالقىنان ۇنەمى الاسا كوپشىلىگىمىزدەن بيىك كوكەم اللانىڭ قالاۋىمەن كوك تاڭىرىنە كوتەرىلدى. ەندى توپىراعى تورقا بولعىر، قايران كوكەم مىنا ءومىردىڭ جاقسىسى مەن جامانىن كوك ءتاڭىرىنىڭ مامىعىنان ءۇنسىز شولادى. بولمىسى بولەك，اقىلى زەرەك، ءسوزى ساۋىتتى بۇزار جەبەنىڭ سايگەزىندەي، قازاقتىڭ اي ءمۇيىزدى اسىل ازاماتىمەن 1999 جىلدىڭ پارلامەنت سايلاۋىندا سەنىمدى وكىلى رەتىندە جانىندا ءجۇرىپ، ەكى اي بىرگە وتكىزگەن كۇن-تۇنىمدى ءومىرىمنىڭ ەڭ باقىتتى كۇندەرىنە بالايمىن. ۇناتپايتىن ادامىن جاماندامايتىن كىسىلىكتى كىسىنى ومىرىمدە تۇڭعىش رەت سول كەزدە كوردىم. ەسەسىنە قيماسى بولسا دا اقيقاتىنا كەلگەندە جالىنداپ تۇراتىن وتتى سوزىمەن بەتىنەن قايتارىپ تاستايتىن قايسار，قايتپاس مىنەزىن ءبىلدىم. حالقىنىڭ باقىتى ءۇشىن مانسابىن دا، اتاق -داڭقىن دا ايىرباستاي سالاتىن اتپال ازاماتتى تانىدىم. شەرحان كوكەمنىڭ شەكپەنىن، الماس قىلىشتاي ۋىتتى دا، وتتى ءسوزىن، كەۋدەسىن ەشكىمگە باستىرمايتىن ءور مىنەزىن，جىبەكتەي مايدا جىميىسىن، ادەمى قالجىڭدارىن，ەلجىرەپ تۇراتىن جۇرەگى مەن ەلى ءۇشىن جانىن پيدا ەتۋگە دايىن تۇلعاسىن سارعايا ساعىنامىز. ساعىنىشىمىز قازاقستان حالىق جازۋشىسى شەرحان مۇرتازا دەرتكە شالدىققان كۇنىنەن سارعايا باستاعانىن دا جاسىرا المايمىز. قايتەمىز ەندى، كوككە كوتەرىلگەن كوكەمنىڭ الدىنان اللانىنىڭ نۇرى شالقىسىن！