سوڭعى ۋاقىتتا «جۇڭگو ىقپالى» ەكونوميكانىڭ مايىن ءىشىپ، جىلىگىن شاعىپ جۇرگەن الەمدىك ساراپشىلاردىڭ دا مازاسىن الا باستادى. جۇڭگو ينۆەستيسياسى ورتالىق ازيا ەلدەرىن (سونىڭ ىشىندە قازاقستاندى دا) ودان ءارى قارىزعا باتىرىپ، قىتايدىڭ وسى وڭىردەگى ەكونوميكالىق ىقپالىن ارتتىرۋدا. مىسالى، قارىزعا باتىرىپ تاجىكستان جەرىن يەمدەندى. نازار اۋدارىڭىز، قازاقستانعا سالعان جۇڭگو ينۆەستيسياسى بۇگىندە 42،8 ملرد. دوللارعا جەتىپ، نەسيە كولەمى 50 ملرد دوللاردان اسىپ ءتۇستى. ال بۇرىنعى قارىزدان قازاقستان قۇتىلدى ما، قۇتىلمادى ما، ول جاعى بەلگىسىز. ەندى مىنە بۇرىنعى العانى از بولعانداي جۇڭگو قازاقستان جوباسىنا تاعى دا 20 ملرد دوللار ينۆەستيسيا قۇيىپ وتىر. 
بۇگىندە قازاقستاندا جۇڭگو كاپيتالىنىڭ 50-دەن 100 پايىزعا دەيىن ۇلەسى بار 20-دان استام مۇناي-گاز كومپانياسى جۇمىس ىستەيدى (ودان دا از ۇلەستەرى بار كومپانيالار جەتكىلىكتى). قازاقستانداعى جۇڭگو ينۆەستيسياسى تەك جىلۋ-ەنەرگەتيكالىق سالامەن عانا شەكتەلىپ وتىرعان جوق. سونداي-اق تاۋ-كەن ونەركاسىبى، ساۋدا جانە قارجى سەكتورىندا دا جۇڭگو ينۆەستيسياسىنىڭ سالماعى اۋىرلاپ كەلە جاتقانى بايقالادى. 
سوڭعى كەزدە وڭىرلەردە "جۇڭگو بانكتەرى" اشىلىپ، ولار قازاقستانداعى قىتايدىڭ بارلىق «ءىرى بيزنەس كوزدەرىن»، «ورتا كاسىپكەرلىگىن»، «ءوندىرىسىن» قارجىلاندىرۋدى قولعا الا باستادى. بۇعان ەرتەڭ جۇمىسشىلارى تەك قىتايلىقتاردان تۇراتىن 51 زاۆودتى جانە قوسىڭىز. قىتايدىڭ ءونىدىرىسى عانا ەمەس، ادام سانى ەسەلەپ ءوسىپ جاتىر. بايقاساڭىزدار قازاقستانداعى جۇڭگو ينۆەستيسياسى بىرتىندەپ باتىس ينۆەستيسياسىن ىعىستىرىپ بارا جاتىر. سوڭعى جىلدارى ەۋروپا، اقش سەكىلدى مەملەكەتتەردەن كەلەتىن ينۆەستيسيا جونىندە ەشتەڭە ايتىلمايدى. 
ءبىر سوزبەن ايتقاندا، جۇڭگو شيكىزاتقا باي قازاقستاندا جاڭا وتارشىلدىق ساياساتىن كۇشەيتىپ قانا قويماي، سونىمەن بىرگە ينۆەستيسيا مەن تەحنولوگيا ەسەبىنەن ءوز ونەركاسىبىن تەز ارادا تەحنيكالىق تۇرعىدان قايتا جابدىقتاۋ مەن كۇشەيتۋ ارقىلى دا ەكونوميكالىق تۇرعىدان ەكسپانسيالاۋعا مىقتاپ كىرىستى. جۇڭگو مەملەكەتىنىڭ ارامزا پيعىلى مەن ساياسي، الەۋەتتىك جوسپارى «قازاق پەن جۇڭگو حالىقتارى اراسىنداعى كاسىپكەرلىكتى ۇلعايتۋ، دوستىق اياسىندا» دەگەن ۇلكەن لەپىرمە سوزدەرمەن بۇركەمەلەنۋدە. 

ن.قوشامانۇلى