بارار جەر باسار تاۋى قالماعان ۇلاعاتتى ۇستاز امالسىز وسىنداي كۇيگە تۇسكەن. ءتىپتى، بىلتىر قاتتى ايازدى ءبىر اياعى ءۇسىپ قالىپ، دارىگەرلەر ساۋساقتارىن كەسىپ تاستاپتى. ۇي-كۇيسىز جۇرگەن جان تۋرالى ەۋرازيا ءبىرىنشى ارناسى حابارلايدى.
«مەن تۇنەمەگەن ايالدامام قالمادى، بارار جەر، باسار تاۋىم قالماعاندىقتان، وسىندا تۇرۋعا ءماجبۇرمىن».
مىنا ايالداما ەلەنا دونسوۆانىڭ تۇراقتى مەكەنىنە اينالعانىنا ءبىر ايدان استى. 53 جاستاعى كەلىنشەك بارار جەر، باسار تاۋى قالماعان سوڭ، وسى جەرگە تۇراقتاپتى. ايتۋىنشا، ءوزى ۇستاز بولعان كورىنەدى. تاريح پانىنەن وقۋشىلارعا ساباق بەرىپتى. ءبىرىڭعاي ۇلتتىق تەستكە ءبىرقاتار ءبىتىرۋشى تۇلەكتى دايىنداپتى. ەندىگى وتىرىسى مىناۋ.
«كومسومولدان باستاپ ۇستازدىققا دەيىن ەڭبەك ەتتىم. شىمكەنتتەگى ءبىرقاتار مەكتەپتە ءمۇعالىم بولدىم» - دەيدى تۇراقتى مەكەنجايى جوق ەلەنا دونسوۆا.
كەزىندە مەكتەپتە اجەپتاۋىر ابىرويى بولعان ۇستاز بىرتە-بىرتە ءسپيرتتى ىشىمدىككە اۋەستەنىپتى. كەيىن قاتتى سالىنىپ كەتكەنى سونشالىقتى جۇمىستان قۋىلعان. ول از بولعانداي، كەلىنشەكتەن جولداسى مەن قىزى دا باس تارتقان. دالادا قالعان سوڭ شىمكەنتتەگى الەۋمەتتىك بەيىمدەۋ ورتالىعىنا بارىپ تۇرادى. ءقازىر، ول ءۇشىنشى كۇن وسىندا تۇنەپ ءجۇر. ىستىق تاماق پەن جاتىن ورىنعا تەز بەيىمدەلگەنى سونشالىقتى ازىرگە ەشقايدا كەتكىسى جوق. الداعى قىستى ەسكەردى مە، وسىندا قالا تۇرۋدى قالاپ وتىر. سەبەبى، بىلتىر قاتتى ايازدا ءبىر اياعى ءۇسىپ قالىپ، دارىگەرلەر ساۋساقتارىن كەسىپ تاستاپتى. ال، ورتالىق ماماندارى بولسا، ونى دارىگەرلىك تەكسەرۋدەن وتكىزىپ، جەكە باسىن انىقتاپ جاتىر ەكەن.
«قۇجاتىن قالپىنا كەلتىرگەن سوڭ جاڭاعى دەنساۋلىعىنا قاراپ، مۇگەدەكتىككە شىعارۋ نەمەسە قارتتار ۇيىنە جولداۋ نەمەسە دارىگەرلىك كومەك كەرەك بولسا، اۋرۋحاناعا وتكىزۋ ءبىزدىڭ مىندەتىمىز بولىپ سانالادى» - دەيدى ۋاقىتشا بەيىمدەۋ ورتالىعى باسشىسىنىڭ ورىنباسارى ساۋەن جانىسبايەۆ.
ەلەنا دونسوۆانىڭ تۇراقتى مەكەنجايىن ءبىز ىزدەپ تاپتىق. قالانىڭ شەتكى اۋداندارىنىڭ بىرىندە تۇرعان ەكەن. كورشىلەرى ونى تەرىس جاعىنان سيپاتتاپ بەردى. كۇيەۋىمەن اجىراسىپ، انالىق قۇقىعىنان دا ايىرىلىپتى. «بارىنە ىشكىلىك سەبەپ»،- دەيدى.
«ول پاتەردى جىن-ويناققا اينالدىرىپ جىبەردى. كۇندە توي، كەز كەلگەن ۋاقىتتا ىشىمدىك ءىشىپ ءجۇردى. ءتىپتى ەسىرتكى پايدالاندى دەپ تە ەستىدىك. سوندىقتان ونى ەشكىم قابىلداي المايدى»،-دەيدى كورشىسى ۆالەنتينا دياچەنكو.
53 جاستاعى كەلىنشەك مىنا ءۇيدىڭ 1-قاباتىندا تۇرعان. ءبىراق، ءقازىر كورشىلەرى ودان ازار دا بەزەر بولىپ قاشىپ وتىر. سەبەبى جۇمىستان شىعىپ قالعان بۇرىنعى ءمۇعالىم وسى ماڭداعى ىشىمدىككە اۋەس بوتەلكەلەستەرىن جيىپ الىپ، پاتەردى جىن-ويناققا اينالدىرىپ جىبەرگەن ەكەن. ونىڭ وسى ادەتىن ەستىپ بىلگەن كۇيەۋى اقىر سوڭىندا ۇيدەن قۋىپ جىبەرسە كەرەك. ءسويتىپ، پاتەردى قىزىنىڭ اتىنا راسىمدەگەن. مىنە، سوڭعى ەكى جىلدان بەرى پاتەر قاڭىراپ بوس تۇر.
وسى كۇنى بۇرىنعى ۇستازدىڭ قۇجاتتارى راسىمدەلىپ جاتىر. دايىن بولعان سوڭ قايدا ورنالاساتىنى بەلگىلى بولادى. وعان دەيىن ۋاقىتشا بەيىمدەۋ ورتالىعىندا قالا بەرمەكشى.
