ءبىز ادەتتە جۇرەك اۋىرعاندا ونىڭ سەبەبىن بىلە بەرمەيمىز، وعان نازار اۋدارا قويمايتىنىمىز دا شىندىق. نەگىزىنەن ماماندار مۇنىڭ ءارتۇرلى سەبەبى بار ەكەنىن ايتادى. باسقا جىل مەزگىلدەرىنە قاراعاندا، ادامنىڭ جۇرەگى قىس كەزىندە كوپ اۋىرادى ەكەن. نەگە؟
جاقىندا شۆەسيانىڭ عالىمدارى مۇنىڭ جاي-جاپسارىن ناقتىلاپ بەرگەندەي بولدى. ولار شۆەدتىڭ 50-89 جاس ارالىعىنداعى 274 مىڭ تۇرعىنىنىڭ دەنساۋلىعىن باقىلاپ كورگەن. ناتيجە بارىسى كورسەتكەندەي، قىس كەزىندە اۋا تەمپەراتۋراسى 0 گرادۋستان تومەندەگەن كەزدە جۇرەك مازاسىزدانا باستايتىن كورىنەدى. ءبىراق «مۇنىڭ بارلىعى قىسقى اۋانىڭ لاستانۋى، ەكولوگيانىڭ ناشارلىعىنان بولۋى مۇمكىن» دەگەن تۇجىرىمنان اۋلاق بولۋ قاجەت. عالىمدار اتاپ كورسەتكەندەي، جۇرەك سىرقاتىنا قىس كەزىندەگى ەڭ نەگىزگى فاكتور سۋىق اۋا رايى كورىنەدى. سۋىقتىڭ سالدارىنان دا تامىرداعى قان قويۋلانادى، جۇرەككە اۋا جەتكىلىكتى دارەجەدە بارمايتىن كورىنەدى. ونىڭ ۇستىنە ادامدار قىسقى ۋاقىتتا توڭادى، سۋىق تيەدى، ءسويتىپ تىماۋعا ءجيى شالدىعادى. بۇل دا ادامنىڭ جۇرەك سىرقاتىنا ۇشىراۋ مۇمكىندىگىن جيىلەتەدى ەكەن.
ماماندار اۋا تەمپەراتۋراسى شامامەن +3+4 گرادۋس بولعاندا جۇرەك سىرقاتى بەلگىلەرىنىڭ ازاياتىنىن دا ايتقان. دەمەك، دارىگەرلەر اتاپ كورسەتكەندەي، قىسقى ماۋسىمدا جىلى كيىنىپ، ساقتانىپ جۇرگەنىڭىز ابزال.
ءبىراق جاقىندا كانادادا وتكەن كارديولوگتاردىڭ جيىنىندا ماماندار ءار 20 مينۋت سايىن تۇرىپ، وتىرىپ، ءار جەتى مينۋتتان سوڭ بولمەنىڭ ىشىندە ءجۇرۋ قاجەتتىگىن ەسكەرتكەن.
دۇنيەجۇزىلىك دەنساۋلىق ساقتاۋ ۇيىمى ماماندارىنىڭ ەسەبىنشە، ينفارك، ءينسۋلتتىڭ بەلگىلەرى قازىرگى كەزدە ادام ءولىمىنىڭ باستى بەلگىلەرى بولىپ وتىر. جىل سايىن الەمدە جۇرەك اۋرۋىنان 17 ميلليون ادام ولەدى. سوندىقتان بۇدان قۇتىلۋدىڭ جالعىز جولى بار، ءار مينۋت سايىن از دا بولسا، قوزعالىس كەرەك. شامادان تىس جۇگىرىپ جۇرەككە سالماق تۇسىرۋگە دە بولمايدى.
